Zefaniya 3:19 - Bhiblia Yo Sawuleka

¹⁹ Wona ti taku, ka yona yile mbimo, ni na wukela votshe vale va kuxanisako, ni hanyisa vale va khwitako, se ni wuyisela avale va nga tutumiswa; kambe ni na va ninga kudhundeka ni wudhumo, ka otshe matiko ale va nga thelwa tingana ka ona.

Zefaniya 3:19 Referans Kwoze

Isaya 60:14

Kambe va nata ve ta nama kwako, vanana va vale va nga kuxanisa, ve ta khizama mikondoni kwako, votshe vale va nga kutxhipisa, se va na kudhana ku Didhoropa da Mkoma, i ku Siyoni wa Msawuleki wa Israyeli.

Jeremiya 30:16

Votshe ava va ku kakatxulako va na kakatxulwa ni vona, ni votshe valala vako va na yiswa wukhumbini, ava va ku handako va na handwa ni vona, ni vale va ku honyolako va na honyolwa ni vona.

Zefaniya 3:15

Mkoma a thavisile kulamulwa kwako, a lovisile valala vako; Mkoma, Mfumeli wa Israyeli a hagari kwako; awe khu na mbiswa u txi wona kambe wubihi ni wawumwewo.

Mika 7:10

Se mlala wangu wa txisikati a na ti wona eto, se a na fenengetwa ngu pfilu-pfilu, awu a ku khene: Ahayi Mkoma, Txizimu txako kani? Maso angu ma na mu wona a txi kadetelwa, kufana ni madhaka a tiruwani.

Ezekhiyele 34:16

Ni na tsimbila ni lava yile yo mwalala, kambe ni na wuyisa yile yo penga, ni txi tsanisa yile yo khudukiswa, ni kuthuma yile yo lwala; aniko ayile yo ena ni yile ya mtamo ni na ti khundumusa; tona ni na ti dyisa ngu wululamo.

Isaya 61:7

Ngu mhaka ya tingana tanu to wuyetwa kumbidi ni kuxaniseka kwanu, va na tsaka ngu txyavelo txawe; ngu kumaha keto, ditikoni kwawe, va na mana ngu kuwuyetwa kumbidi, kambe va na va ni kutsaka ko mbi guma.

Jeremiya 33:9

Se adiya didhoropa di na va da ditina da litsako ni kudhumisa ni wudhumo, hagari ka otshe matiko a ha mafuni, ma no pfa wotshe wunene wu ni mmahelako; kambe va na xamala, ni kudhudhumela, ngu mhaka ya wotshe wunene, ni mhaka ya kotshe kuthutha, aku ni di ningako.

Vahebheru 12:13

Lulamiselani mikondo yanu tinzila ta tinene, kasiku txihango txi txi nga limala, txi si khuduki, aniko txi na hanyiswa.

Isaya 60:18

Kha ku na mbiswa kambe kupfala kulwisana ditikoni kwako, hambi kuxaselwa ni kukhundumuselwa mihinganoni kwako; aniko u na dhana “Kuhanyisa” ngu magumani kwako, ni matimbani kwako u na khawe “Kudhumisa.”

Ezekhiyele 39:26

Se va na rwala tingana tawe, ni wotshe wueyisi wawe, awule va nga ni eyisa ngu wona, ngako va txi zumba va di tsani ditikoni kwawe, ku si maneki wa ku va dhukisa;

Mtuletelo 20:9

Va to huma ve hangalaka ni dotshe ditiko ve randela midhuti ya vasawuleki ni didhoropa do randeka; kambe ku to txhika mndilo ngu nzumani wu txi ta va heta.

Jeremiya 46:28

U nga thave, awe txithumi txangu Jakobe, kuwomba Mkoma, nguko ni ni nawe; nguko ni na heta otshe matiko ale ni nga kutshotsha ka ona; aniko awe kha ni na mbi kuhetisa, ni na kupeka ngu kupimela, kha ni na mbi leka ku kutsayisa.

Isaya 62:7

kambe mi nga maneke mi di malate, kala kuza e tsanisa, ni ku kala kuza e veka Jerusalema kuva wudhumo ha mafuni.

Isaya 26:11

Mkoma, dianza dako di guletilwe, hambi keto, kha va di woni; va na di wona, hambiko va no kanganyiseka, ngu mhaka ya ku u pfelako vathu vako; kambe mndilo wu na tshokomisa valala vako.

Jeremiya 31:8

Ni na va wuyisa ngu ditikoni ka Wuphemba, ni txi va sengeleta ngu magemeta-mitshi ka mafu; kumweko navo, ku ni mabhofu ni silima, vo khosa, va na wuya i ti didhendele da hombe.

Ezekhiyele 16:27

Ngu kumaha keto ni nawulutile dianza dangu txitimwi kwako, ni hungute txokari kwako, ni kuningela ka vale va ku nyenyako, i ku vanana va Vafilista, vale va nga ti tipfa tingana ngu tinzila tako ta walo.

Ezekhiyele 16:57

na ku si se tumbulwa wubihi wako kani? Konkuwa, u tshumete u fana nayo, a nga txhipiswa ngu vanana vamahorana va Siriya, ni votshe vale va nga ti ti madhawani kwakwe, i ku vanana va Vafilista, va nga ti ti ku randete.

Ezekhiyele 39:13

Ina, votshe vathu va ditiko va na ya va tshotsha, kambe kwawe di na alakanywa ditshiku di ni no dhumiswa ngu dona, kuwomba Mkoma Txizimu.

Zakariya 8:23

A womba tiya Mkoma wa Mabutho a Tiyimbi: Ka ditshiku donedo, ku na maheka taku, digumi da vavamna, va totshe tidimi ta matiko, ve ñola ha ka mrungo wa txyambalo txa M'judha, va txi kha vona: Hi na tsula ni nanu, nguko ha tolovela kupfa taku, Txizimu txi ni nanu.

Dhewuteronome 26:19

Kasi ku a na kuguleta txitimwi ka otshe matiko awa a nga ma maha, u txi ma pala otshe ngu wudhumo ni nduma, ni kupfaliswa, u txi maha ditiko di di nga sawulekiselwa Mkoma, Txizimu txako, nga ti ene apune a nga wombisa tona.

Valamuli 1:7

Sekoko, Adhoni-Bhezeki a to khene: Mtxhanu wa magumi ni mambidi a vafumeli, va nga ti wiletwe titiho ta vanyagotwe, ta manzani ni ta mikondoni, va ti ti rolela maruru hahatshi ka meza yangu; ngu kumaha keto, Txizimu txi ni tshumetete madingano ni ti ni nga va mahela. Se va to tsula nayo Jerusalema, eyo a nga ya fela kona.

Isaya 33:1

Dikhombo kwako u handako na u sa handwa, awe u kanganyisako vale, va nga mbi kukanganyisa! Mbimo yi u no heta kuhanda, u na handwa; u txi na heta kukanganyisa, u na kanganyiswa nawe.

Jeremiya 30:19

Ku na huma ngu konemo kudhunda ni mapswi a litsako; ni na va andisa, va si hunguleki; ni na va kulisa, kha va na mbiswa ve kanyiswa.