Zefaniya 1:6 - Bhiblia Yo Sawuleka

⁶ ni va va lekako kulondeta Mkoma, ni vale va si laviko Mkoma, hambi ku wotisa txilo ngu ngene.

Zefaniya 1:6 Referans Kwoze

Jeremiya 2:13

Nguko vathu vangu va mahile kubiha kumbidi: Va ni lekile ani txisima txa mati ma hanyako, ve ti akela mathange ma ku ni tifa, ma si sikotiko kuxayisa mati.

Isaya 1:4

Dikhombo ka ditiko da vaonhi, vathu votala ngu wubihi, lihunzu la mikhuwo yo biha, vanana vo hundeka! Va lekile Mkoma, ve ruketela Msawuleki wa Israyeli; va tshumelete msana.

Jeremiya 15:6

U ni lekile, kuwomba Mkoma, u tshumelete msana. Ngu konaho, ni nawulutile dianza dangu, ni kulovisa. Ni karate ngu ku kudivalela.

Jeremiya 2:17

Ina khwa ti vangela dikhombo upune! Nga ha u nga leka Mkoma Txizimu txako, ahawa ene a nga kuthangela nzilani kani?

Hoseya 11:7

Nguko vathu vangu va wekelela ku ni leka, hambiko va dhanako Nyatxitimwi, kha ngaho kwawe a m'guletako.

Jeremiya 3:10

Hambi keto, Judha, ndiyakwe wo mbi thembeka, kha wuya ngu mbilu yakwe yotshe, aniko ngu wuviyaku, kuwomba Mkoma.”

Isaya 9:13

Hambi keto, vathu vava, kha va tshumelela ka wule a va lwisako, kha va lava Mkoma wa Mabutho a Tiyimbi.

Vahebheru 2:3

se athu hi na hulukisa kutxani, ngako hi txi kanyisa kuhanyiswa kuwa kwathu ka hombe kani? Kuhanyiswa kuwa ku khatile kuhuwelelwa ngu Mkoma, ngu msana ku txi tsaniswa kwathu ngu va va nga tipfa,

Ezekhiyele 3:20

Kufana ni toneto, ngako m'thu wo lulama a txi huma ka nzila yakwe yo lulama, e maha to biha, se ani ni veka txa ku mu humba masoni kwakwe, a na fa; ngako u sa mtxharihisa, a na fa ka wubihi wakwe, se a tile to lulama a nga maha, kha ti na mbi alakanywa, aniko mnoha wakwe, ni na wu lava manzani kwako.

Masalmo 125:5

Aniko avale va hambukako ve londisa tinzila to gombonyeka Mkoma a na va lovise kumweko ni sigevenga. Kudikha ku nave ni va ka Israyeli!

Masalmo 10:4

Kutikulisani kwakwe m'thu wo biha kha khatali ngu Mkoma, a khene: “Txizimu kha txi mahi txilo ngu kuhenya ka txona.” Ene a pimisa tito; Txizimu kha txi nga ho.

1 Samuwele 15:11

Na tilaya nguku ni nga veka Sawule e maha mfumeli; nguko a lekile kulondeta sileleto sangu, kambe kha xayisa mapswi angu. Sekoko Samuwele a to henya, e dila ka Mkoma wusiku wotshe.

Hoseya 7:7

Votshe va hisa kufana ni txikho, kambe va heta valamuli vawe; votshe vafumeli wawe va wite, kha ku na ni wammweyo hagari kwawe a ni dhanako.

Masalmo 36:3

Kuwombawomba kwakwe nga kubiha ni makuhu; a lekile ni kuengisa ni kumaha ti i ku ta tinene.

Varoma 3:11

Kha ku nga ni wu a ku ni mapimo, kha ku nga ni wu a lavako Txizimu.

Isaya 43:22

Hambi keto, khwa ni dhana awe Jakobe, aniko u karate ngu ngani, awe Israyeli.

Jeremiya 10:25

Tshakunuta txiviti txako, txitimwi ka vamatiko, ava va si ku ziviko, ni txitimwi ka tixaka ti ti si dhaniko ditina dako; nguko va kakatxute Jakobe; va mkakatxute, va txi mmita, ni m'ti wakwe va wu mahile dirumbi.

Hoseya 7:10

Se kutikulisa ka Israyeli mbu fakazi masoni kwakwe; hambi keto, kha va na mbi tshumelela ka Mkoma, Txizimu txawe, hambi ku mlava ka totshe tiya.

Joxuwa 23:12

Nguko, mi txi hambuka, mwendo kunamarela ka vamatiko va va nga sala hagari kwanu, mi txi tekelana navo vasikati, anu mi teka kwawe, ni vona ve teka kwanu,

2 Samuwele 22:22

Nguko ni xayisile tinzila ta Mkoma, kambe kha na hambuka ka Txizimu txangu.

2 Makronika 15:13

ni ti to votshe avale va si laviko Mkoma, Txizimu txa Israyeli a fanete kufa, kukhukhela ka vavadotho kala ka va hombe, wamwamna kala ka wamsikati.

Isaya 9:12

Vasiriya va nata ngu wutxani, se Vafilista va nata ngu wuphemba, ve ta khadamula Israyeli ngu txisofu txo asama; hambi keto, kuhenya kwakwe kha ka pinda, aniko dianza dakwe di ngadi nawulutilwe.

Zefaniya 3:2

Kha di engisi dipswi, kha di tumeli kukawukwa, kha di thembi Mkoma, hambi kutshuketa ka Txizimu txa dona.