Zefaniya 1:3 - Bhiblia Yo Sawuleka

³ Ni na fuvisa vathu ni sihari, ni na fuvisa sinyana sa nzuma ni sihaka sa linene, ni sikhunguvanyiso sa va wubihi; kambe ni na fuvisa vathu txitimwi ka mafu, kuwomba Mkoma.

Zefaniya 1:3 Referans Kwoze

Hoseya 4:3

Ngu kumaha keto, ditiko di na dila, ni wuhi wule a zumbako ka dona a na guma mtamo, ni sihari sa txitinga ni sinyana sa nzumani; hambi sihaka sa linene si na loviswa.

Ezekhiyele 7:19

Silivhela yawe va na tshotshela tinzilani, ni nzalama yawe yi na nga nzambwa; hambi silivhela yawe mwendo nzalama yawe, kha si na mbi sikota ku va hulukisa ka ditshiku da kuhenya ka Mkoma; sona kha si na mbi khurisa mimoya yawe, hambi kukhurisa mirumbu yawe, nguko ngu sona si nga va humba ve wa kubihani.

Mtuletelo 2:14

Aniko, ni ni sisolo sokari ni lavako ku si womba: U na ni vathu konaho, va londetelako gondo ya Bhalahamu, awu a nga ti gondisa Bhalake kuveka txikhuvekiso masoni ka vanana va Israyeli, kasiku ve dya tinyama ta timhamba ta sikwembu sa walo, ni kumaha wugango.

Matewu 23:39

Nguko ani na mi gela ku khani: Kha mi na mbiswa mi ni wona, kala mbimo yi mi no womba mi txi khanu: A na bongwe awu a tako ngu ditina da Mkoma!”

Zakariya 13:2

Se ku na maheka ka ditshiku donedo, kuwomba Mkoma wa Mabutho a Tiyimbi, ti to ni thavisa matina a sithombe ha mafuni, kha va na mbi ngadi ve si alakanya kambe; niku ni tovela vaprofeti, ni moya wa kwa mbi sawuleka ha ditikoni.

Hoseya 14:8

Efrayime a na khene: Ni ngadi ni txani kambe ani ni sithombe kani? Ani ni khala ku tiengisa, se eto na ti pfisisa; ani ni fana ni mndonga wa faya wa mkungu; ngu kwangu ka manwa mihando yako.

Hoseya 14:3

Asiriya kha na mbi hi hulukisa, kha hi na mbi tsula hi di gadhile mahantxhi, ka mithumo ya manza athu, kha hi na mbi womba kambe ku khathu: Awe u Txizimu txathu; nguko ngu ngawe, awule wo felwa ngu vaveleki, a na mahelwa wumbilu.

Jeremiya 12:4

Ina ditiko di na keta kala yihi mbimo kani? Mwasi wu txi oma txitingani, ngukonaho ka wubihi wa va va zumbako emo kani? Sihari ni sinyana sa lova, nguko va kha vona: Kha na mbi wona kugwitelwa kwathu.

Isaya 27:9

Ngu mhaka yeto, txi na thaveka txionho txa Jakobe, se awuwa wu na va m'hando wotshe wa kuva ku di thavisilwe txionho txakwe; mbimo yi a no maha ti to, otshe marigwi a ha txiluveloni, kufana ni marigwi a dibumba, ma nga khundumuselwa, tiphande ni sithombe sa ditambo, kha si na mbi ema

Ezekhiyele 44:12

Nguko va va thumete masoni ka sithombe sawe, ve maha ti to nyumba ya ka Israyeli yi txi nyenyeza; ngu tona eto, ni gute dianza txitimwi kwawe, kuwomba Mkoma Txizimu, se vona va na rwala wubihi wawe vapune.

Matewu 13:41

Mwanana wa M'thu a na rumela tingelozi takwe, ati ti no thavisa ka Mfumo wakwe votshe va i ku vakhuvekisi ni votshe va va mahako to biha,

Isaya 6:11

Sekoko ani ni to khani: Kala yihi mbimo kani Mkoma? A to xamula a txi khene: Kala kuza madhoropa me maha marumbi, kupwateka ni vaaki, ni tinyumba ti si nga ni vathu, ni ditiko dotshe di maha dirumbi.

Isaya 6:12

Se Mkoma a na leka vathu kule ni didhoropa, ditiko di na sala i di txiwula txa hombe.

Jeremiya 9:10

Ni na theketa mirongo ni peka huwa ngu mhaka ya mimango, ni dilela wudyiseloni ka txiwula, nguko ku hyite; kha ku ngadi ni m'thu a pindako ngu kona, hambi kupfa kubhoma ka tihomu; sinyana sa nzuma ni sihari si tutumile, si tsute.

Jeremiya 50:3

Nguko a wuketwe ngu ditiko dimwedo da Wuphemba, di no maha ti taku ditiko dakwe di maha txiwula, kha ku na mbi maneka wo zumba ka dona: Vathu va tutumile kumweko ni sifuyo sawe, va tsute.

Genesisi 6:7

Se Mkoma a ti khene: “Ni na fuvisa txitimwi ka mafu, m'thu wu ni nga mmaha, ni fuvisa kambe sihari, ni sihari so tsimbila ngu dibindi, ni sinyana sa nzumani; nguko na ti laya ngu kuva ni di si mahile.”

Jeremiya 7:20

Ngu konaho, Mkoma Nyamne wa sotshe, a khene: Ni na tshakunuta kuhenya kwangu ni txiviti txangu ka wuwa wukhalo, txitimwi ka vathu ni txitimwi ka sihari, ni txitimwi ka mindonga ya txitinga ni mihando ya mafu, si na tura si si koteki kutimwa.