Zakariya 8:3 - Bhiblia Yo Sawuleka

³ A womba tiya Mkoma: Ni na tshumela ni ya Siyoni, se ni na ya zumba hagari ka Jerusalema; se Jerusalema a na dhanwa ku didhoropa da ditshuri, ni mmango wa Mkoma wa Mabutho a Tiyimbi, wu na dhanwa ku mmango wo sawuleka.

Zakariya 8:3 Referans Kwoze

Zakariya 1:16

Ngu toneto, Mkoma a womba tiya: Ngu wumbilu ni tshumelete Jerusalema; nyumba yangu yi na akwa kona, kuwomba Mkoma wa Mabutho a Tiyimbi, se ngoti yi na gwimbwa txitimwi ka Jerusalema.

Mtuletelo 21:3

Se ni engisile kambe dimwani dipswi da hombe di nga pfala di txi khukhela ka txikhalo txa wukoma, di txi kha dona: “Ndide ditenda da Txizimu di ku hagari ka vathu! Txona txi na aka hagari kwawe, vona va na va i di vathu va txona; se txona Txizimu txipune txi na va txi di navo, txi maha Txizimu txawe.

Vakolosa 2:9

Nguko wuzimu wotshe wu akile ngu kutala mmidini kwakwe,

2 Vakorinto 6:16

Ngu sengela muni ku kuho hagari ka dithepele da Txizimu ni sithombe sa sizimu sa makuhu kani? Nguko athu hi dithepele da Txizimu txi txi hanyako kota nga ti Txizimu txi nga kha txona: “Ni na zumba navo ni txi tsimbila hagari kwawe; ani ni na va Txizimu txawe; vona va na va i di vathu vangu.”

Johani 14:23

Jesu a to mu xamula, a txi khene: “Ngako m'thu a txi ni randa, a na vekisa dipswi dangu. Tate wangu a na mu randa, se hi nata kwakwe, hi ta maha wugovelo wathu.

Johani 1:14

Dipswi di ti mahile m'thu, e aka hagari kwathu; hi wu woni wudhumo wakwe, wudhumo wu Tate a nga ninga Mwanana wakwe wa Mmweyo ekha, wo tala ngu makatekwa ni ditshuri.

Joyeli 3:17

Se anu mi na tiziva ti to ani ngani Mkoma, Txizimu txanu, ni zumbako Siyoni, mmangoni kwangu ko sawuleka; kambe Jerusalema a na va msawuleki; vamatiko kha va na mbiswa ve pinda ngu ka kona.

Jeremiya 33:16

Judha a na hanyiswa kayo masiku, ni Jerusalema a na zumba ngu kuthutha. Va na m'dhana ngu ditina do kha vona, Mkoma ngene kululama kwathu.

Jeremiya 31:23

Mkoma wa Mabutho a Tiyimbi, i ku Txizimu txa Israyeli, a khene: Mi ngadi mi txi na womba dipswi diya ka Judha ni madhoropani kwakwe, mbimo yi ni no heta wukhumbi wawe: Mkoma a na kukatekisa, awe m'ti wa kululama, awe mmango wo sawuleka!

Isaya 66:20

Se va na wuyisa votshe vananu, va hagari ka otshe matiko, kasi kumaha mningelo ka Mkoma, na va di txitimwi ka mahantxhi, ni mu ka sikotxikani, ni mu ka misingo, ni txitimwi ka mamula, ni txitimwi ka mibhedhu, mmangoni kwangu ko sawuleka, kona Jerusalema, kuwomba Mkoma, kufana ni kuva vanana va ka Israyeli va txi tisa miningelo yawe ngu ka siya so basa, Nyumbani ka Mkoma.

Isaya 1:26

Se ni na kutshumetela valamuli vo fana ni vale va kale; ni madhota o fana ni ale o khata; sekoko, u na dhanwa ku u didhoropa do lulama, didhoropa do thembeka.

Mtuletelo 21:27

Ka dona kha ku na mbi thuka ku txi wulela ni txihi txilo txa nzambwa, hambi va va mahako to nyenyeza ni vamakuhu. Va na wulela dwe avale va nga bhalwa dibhukuni ka wutomi wa Txinvutana.

Mtuletelo 21:10

Ngelozi yi to ni teka ngu moya yi ni yisa txitimwi ka mmango wo lapha, yi ni komba didhoropa do sawuleka da Jerusalema, adi di nga txi relela ngu nzumani, di txi ta ngu ka Txizimu.

Joyeli 3:21

Se ni na sawulekisa mnoha wa va ni nga sa va sawulekisa: Nguko Mkoma a na zumba Siyoni.

Ezekhiyele 48:35

Kuranganyetwa ngu 18.000 wa tipimo; kambe ditina da didhoropa kukhukhela ditshiku dile i nava: Mkoma Waho Hale.

Isaya 65:25

Dixolwa ni txinvutana si nadya kumweko, se ngonyamo yi na dya mwasi kufana ni homu; se lithulu li na maha sakudya sa mnyoka. Kha si na mbi maha wubihi mwendo kuonha txokari ka wotshe mmango wangu wo sawuleka, kuwomba Mkoma.

Isaya 60:14

Kambe va nata ve ta nama kwako, vanana va vale va nga kuxanisa, ve ta khizama mikondoni kwako, votshe vale va nga kutxhipisa, se va na kudhana ku Didhoropa da Mkoma, i ku Siyoni wa Msawuleki wa Israyeli.

Isaya 12:6

Anu vaaki va Siyoni, tsakani mi peka mikulungwani nguko Msawuleki wa Israyeli mbwa hombe hagari kwanu.

Isaya 11:9

Kotshe mmangoni kwangu ko sawuleka, kha ku na mbi va ni kubiha hambi kuonhwa txilo, nguko mafu ma na tala ngu kuziva Mkoma kufana ni mati awa ma fenegetako linene.

Isaya 1:21

Eto di nga wekelisa tona didhoropa do thembeka! Adi di nga ti tate ngu wululamo! Wululamo wu ti akile ka dona, aniko konkuwa, didhoropa da wudayi.

Masalmo 48:1

Mkoma mbwa hombe, kambe a fanela kudhumiswa didhoropani ka Txizimu txathu, mmangoni kwakwe ko sawuleka!

Isaya 8:18

Ngani wuwa, ni vanana va Mkoma a nga ni ninga, kuva sikombiso, ni sixamaliso, kona Israyeli, ngu didhawa da Mkoma wa Mabutho a Tiyimbi, awu a zumbako mmangoni ka Siyoni.

Isaya 32:16

Se kulamula ku na zumba txiwulani, ni wululamo wu na maneka thembweni ko nona.

Jeremiya 26:18

Mika a to profeta, ka masiku a Ezekhiya, mfumeli wa ka Judha, e gela votshe vathu va ka Judha, a txi khene: Mkoma wa Mabutho a Tiyimbi a khene: “Siyoni ku na dimwa nga thembwe. Ni Jerusalema ku na maha mmumbu wa marigwi; ni ku kuguleka ka dithepele ku nava mmango wa txitinga.”

Dhaniyeli 9:16

Awe Mkoma, mandingano ni wotshe wululamo wako, ku na khukhe kuhenya kwako ni txiviti txako txitimwi ka dihoropani dako Jerusalema, ka mmango wako wo sawuleka; se ngu mhaka ya sionho sathu, ni ngu mhaka ya sihambunyeto sa vatate vathu, Jerusalema ni votshe vathu vako va hundukile txisekiso ka votshe vale va ku mabambe kwathu.

Mika 4:1

Se ka masiku o gwitisa, ku na maheka to mmango wa Nyumba ya Mkoma, wu na vekwa txitimwi ka mmango, se wu na guleka txitimwi ka simangwana, kambe vathu va na tutumela ka wona.

Zefaniya 3:13

Miboti ya Israyeli kha yi na mbi maha wubihi, hambi kuwombawomba makuhu, ni mkanani kwawe kha ku na mbi huma mapswi o kanganyisa, nguko va na dyiswa, va na otela, kambe kha ku na mbi va ni wo va dhukisa.

Zakariya 8:16

Ati mi dinganako kumaha tona ngu tiya: Wombawombani ditshuri mmwani ni mmwani ka mkwawe, lamulani ngu ditshuri ni kudikha sikenini kwanu.

Zakariya 8:19

A womba tiya Mkoma wa Mabutho a Tiyimbi: Kutitona ka mtxima wa wumune, ni kutitona ka mtxima wa wutxhanu, ni kutitona ka wa wutxhanu ni yimbidi, ni kutitona ka mtxima wa wugumi, ku nava kunengela ni kutsaka, ni mibuso ka nyumba ya ka Judha, ngu toneto dhundani ditshuri ni kudikha.

Zakariya 12:6

Ka ditshiku donedo, ni na veka vathangeli va ka Judha va txi nga dikala di turako hahatshi ka tikhuni, ni ku nga dituro hagari ka milumbi; se ngu txinene ni txibhabha vona va na lovisa votshe vathu vale va ku madhawani kwawe, kembe Jerusalema a na aketwa ka wukhalo wakwe, kona Jerusalema kupune.

Eksodha 29:45

Ni na va ni txi aka hagari ka vanana va ka Israyeli kambe ni na va ni di Txizimu txawe.

Masalmo 2:6

“Ngani ni nga fumisa mfumeli wangu txitimwi ka wukhalo wangu wo sawuleka, mmango wangu wa Siyoni.”

Jeremiya 14:9

Ngu kutxani u txi nga u m'thu wo dhukiswa, nga ndena yile yi si sikotiko kuhanyisa kani? Kuve awe waho hagari kwathu, awe Mkoma, hi dhanwa ngu ditina dako; u nga hi leke!

Zakariya 14:10

Dotshe ditiko di na maha libala, kukhukhela Gebha kala Rimoni, ngu wulambwe ka Jerusalema; ene a na guletwa, ni kuaketwa wukhaloni kwakwe, kukhukhela ka txike txa Bhenjamini, kala ka wukhalo wa txike txo khata, kala ka txike txa Dikhonani, ni kukhukhela ka txitezi txa Hananeli, kala ka mapipa a mfumeli.