Zakariya 6:12 - Bhiblia Yo Sawuleka

¹² Se m'gele, u txi khawe: Mkoma wa Mabutho a Tiyimbi, a khene: Ndiyo m'thu wu ditina dakwe i ku Kuthunga; Ene a na mila ka wukhalo wakwe, kambe a na aka dithepele da Mkoma.

Zakariya 6:12 Referans Kwoze

Zakariya 3:8

Engisa koko, awe Joxuwa, mphaxeli wa hombe, awe ni vangana vako, vale va nga khalahatsha masoni kwako, nguko mbavamna va mapimo amanene; wona taku ni na tisa txithumi txangu, atxi i ku kuthunga.

Jeremiya 33:15

Keyo masiku ni ka yoneyo mbimo ni na wusela Dhavhidha mpuka wo lulama; ene a na lamula ngu nongameto ni wululamo amu ditikoni.

Jeremiya 23:5

Se mata masiku, kuwomba Mkoma, aawa ni no wusela ka ona Dhavhidha dikhukhu do lulama. A nava mfumeli wa txitshurwa, a na humelela, ene a na lamula ngu mlayo ni wululamo, ha ditikoni.

Isaya 11:1

Nguko ku na mila dikhukhu ditshinani ka Jese, ni ka mitwi yakwe ku na mila didhavi di veleka mihando.

Isaya 4:2

Ka ditshiku dile, Dikhukhu da Mkoma di na tala ngu wudhumo ni kutshura; se mihando ya mafu nja, Vaisrayeli vale va nga sala.

Isaya 53:2

Nguko a humile masoni ka Mkoma nga txiluva, e fana ni m'twi ka mafu a kuoma; asi nga ni wuwono ni kutshura ka hombe; se mbimo yi athu hi nga muwona, kha ha wona kutshura ni kakumweko, kasi ku hi txi mnavela.

Mithumo 17:31

Nguko Txizimu txi vekile ditshiku di txi no lamula mafu ngu dona, ngu malamulelo o lulama, ngu m'thu wu txi nga ti sawulela ene, txi tsanisa mhaka yiya ka votshe ngu ku mu wusa ka vakufa.”

Vahebheru 8:3

Nguko, mphaxeli wa hombe, wuhi ni wuhi, a veketwe kasiku e maha miningelo ni timhamba. Ngu toneto, ta laveka ti to nene mphaxeli e va ni txilo txa kuningela.

Vahebheru 7:24

Aniko Jesu, ngako wutomi wakwe wu si gumiko, wuphaxeli wakwe ni wona kha wu nga ni magwito.

Vahebheru 7:4

Hi ngani wona wuhombe wa m'thu wuwa, awu hambi Abrahamu, i ku kokwani wathu wa hombe, a nga mninga wugumi wa sile sa sinene, asi a nga si mana yimbini:

1 Vakorinto 3:9

Kha ditshuri, athu hi vavhuneteli va Txizimu, anu mi wudimi wa Txizimu, mi Nyumba ya Txizimu.

Mithumo 13:38

Vanathu, ti ziveni ti to kudivalelwa ka sionho ku nuwelwa kwanu ngu ngene m'thu wuwa.

Johani 1:45

Filipi a to mana Nathaniyele, a txi khene kwakwe: “Hi mmani wule Mosi a nga bhala timhaka takwe Mlayoni, ni Vaprofeti ni vona va bhate: I Jesu wa Nazareta, Mwana Josefa.”

Luka 1:78

Ngu wumbilu wa hombe wa Txizimu txathu, ha mana kuendelwa ngu wutxa wa kuta ngu txitimwi;

Marku 15:39

Se nduna ya dizana, yile yi nga ti emile masoni kwakwe, ngako yi di woni ti a nga fisa tona, yi to diwuka yi txi kha yona: “Ngu ditshuri awuwa m'thu i ti Mwanana wa Txizimu!”

Marku 15:29

Ava va nga txi pinda va ti ti mu ruketela, va txi zinginika misungo yawe, va txi kha vona: “Ha! Awe u khundumusako Dithepele, u txi di aketa ngu masiku mararu.

Marku 14:58

“Hi mu engisile a txi khene: ‘Ani ni na hasula Dithepele diya do mahwa ngu manza a vathu, se mndani ka masiku mararu, ni na aka dimwani do mbi mahwa ngu manza a m'thu.’ ”

Matewu 26:61

ava va nga kha vona: “Awuwa m'thu a ti khene: ‘Ni nga sikota kukhundumusa Dithepele da Txizimu ni tshumela ni di aketa ngu masiku mararu.’ ”

Matewu 16:18

Ngu toneto, nani na kugela, ni khani: Awe u Pedro, se txitimwi ka dirigwi diya, ni na aka Dibanza dangu, ani mtamo wa lifo kha wu na mbi di xula.

Zakariya 13:7

Awe ditxhari khukha u lwa ni m'dyisi, lwana ni wamwamna wule i ku mngana wangu, kuwomba Mkoma wa Mabutho a Tiyimbi; peka m'dyisi, se ti na hangalaka tinvuta; aniko ni na nawuluta dianza dangu, ni peka vale vavadotho.

Zakariya 8:9

A womba tiya Mkoma wa Mabutho a Tiyimbi: Ma na ti karate manza anu motshenu, mi nga engisa masikwanano mapswi awa a vaprofeti, vale va nga ti tiho, ka ditshiku dile ku nga vekwa makhato a Nyumba ya Mkoma wa Mabutho a Tiyimbi, kasi ku dithepele di mana kuakwa.

Mika 5:5

Se awuwa a na va kudikha kwathu. Mbimo yile Asiriya a nota ditikoni kwathu, ni mbimo yile a no pinda ngu txitimwi ka tinyumba tathu ta wukoma, hi na emisa mtxhanu wa vadyisi, ni mtxhanu wa vakoma ni vararu hagari ka vavamna, kasi kulwa nayo.

Ezra 3:10

Mbimo yile vaaki va nga maha makhato a kuaka Dithepele da Mkoma, va to ti henjeleta vaphaxeli ni siya sawe ni mipundu, Valevhi i ku vanana va Asafe, ni sitende kasi kudhumisa Mkoma, madingano ni txileleto txa Dhavhidha, mfumeli wa ka Israyeli.

Ezra 3:8

Se ka dilembe da wumbidi da kuta kwakwe Jerusalema Nyumbani ka Txizimu, ka mtxima wa wumbidi, Zorobhabheli, mwana Seyaltiyeli, ni Jesuwa mwana Jezadhake, ni vamwani vanawe, vaphaxeli ni Valevhi, ni votshe vale va nga wuya Jerusalema ngu wukhumbini, va to emisa Valevhi va tanga ya magumi mambidi a malembe ni kuya masoni, kasiku ve rwala mthumo wa kuakwa ka Nyumba ya Mkoma.

Vahebheru 10:12

Kasi ene Kristu, a phaxile mhamba ya kudivalela sionho kumweko dwe. Msana keto, a ti ya khalahatsha txineneni ka Txizimu kala kupinduka;

Johani 19:5

Sekoko, a to huma Jesu, a di ni m'bhoti wa mipa ni nguwo ya disilika. Pilato a to va gela a txi khene: “Ndiyo m'thu!”

Ezekhiyele 37:25

Va na zumba ka ditiko dile ni nga ninga txithumi txangu Jakobe, emo va nga ti zumbile kona vatate vanu; se va na zumba ka dona, vona ni vanana vawe, ni vatukulu vawe, yotshe mbimo; kambe txithumi txangu Dhavhidha a na va mthangeli wawe, ngu ha ku si gwitiko.

Amosi 9:11

Ka ditshiku dile, ni na tshumela ni guleta ditenda da Dhavhidha, di nga wa, ni vhaletela amule ku nga vharuka, ni tshumela ni wusa marumbi, ni ma aketa kufana ni masiku a kale;

2 Samuwele 7:13

Awuwa a na akela nyumba ditina dangu, se ni na tsanisa txikhalo txa mfumo wakwe kala kupinduka.

Ezekhiyele 41:1

Sekoko a to ni yisa dithepeleni, eya pima tisika: Mtxhanu wa mikono ni wumwewo kuanama ka didhawa dimwedo, ni mtxhanu wa mikono ni wumwewo kuanama ka dimwani, i nga ti ti kuanama ka nyumba.