Zakariya 3:1 - Bhiblia Yo Sawuleka

¹ Se Txizimu txi to ni komba Joxuwa, mphaxeli wa hombe, awu a nga ti ti masoni ka Ngelozi ya Mkoma, se Sathani a ti ti ka dianza da txinene da Joxuwa, kasi ku mmangala.

Zakariya 3:1 Referans Kwoze

1 Pedro 5:8

Ti pimelani, mi txi ti wonela; nguko Sathani, mlala wanu, wa mi horolokela nga ngonyamo yi yi bhongako, yi txi lava wo m'kakatxula.

Luka 22:31

“Simoni, Simoni, wona: Sathani a kombete ku mi hehera nga kule ka fulaho.

Masalmo 109:6

Awe Txizimu, veka muonhi txitimwi ka mlala wangu, se Sathani a na eme ka didhawa dakwe da txinene.

Luka 21:36

Khutalani na mi txi khongela txotshe txikhati, kasiku mi va ni mtamo wa kuhuluka ka totshe ti ti no humelela, ni kuema mi di tsani masoni ka Mwanana wa M'thu.”

Malakiya 3:1

Wonani taku, ni mi rumela ngelozi yangu, ayi yi no ni lulamisela nzila, se msana keto, Mkoma wule anu mi mlavako, a nata ngu kukuluveta dithepeleni kwakwe, Ngelozi ya txitumelelano, ayile anu mi yi verelako; wonani taku yata, kuwomba Mkoma wa Mabutho a Tiyimbi.

Hagayi 1:1

Ka dilembe da wumbidi da mfumeli Dhariyo, ka mtxima wa wutxhanu ni wumwewo, ka ditshiku do khata da mtxima, kutile dipswi da Mkoma ngu ka mprofeti Hagayi, ka Zorobhabheli, mwana Salatiyeli, mthangeli wa Judha, ni ka Joxuwa, mwana Jozadhake, mphaxeli wa hombe, di txi kha dona:

1 Makronika 21:1

Sekoko Sathani a to wukela va ka Israyeli, e kujetela Dhavhidha kubala va ka Israyeli.

Zakariya 6:11

Eko ni khani amukela silivhela ni nzalama, u maha mibhoti, u yi veka ha msungo ka Joxuwa, mwana Jozadhake, mphaxeli wa hombe.

Zakariya 3:8

Engisa koko, awe Joxuwa, mphaxeli wa hombe, awe ni vangana vako, vale va nga khalahatsha masoni kwako, nguko mbavamna va mapimo amanene; wona taku ni na tisa txithumi txangu, atxi i ku kuthunga.

Hagayi 2:4

Se konkuwa, tsanisela awe Zorobhabheli, kuwomba Mkoma, tsanisela awe Joxuwa, mwana Jozadhake, mphaxeli wa hombe, tsaniselani motshenu anu vathu va ha mafuni, kuwomba Mkoma, aniko thumani, nguko ani ni na ni nanu, kuwomba Mkoma wa Mabutho a Tiyimbi,

Hagayi 1:12

Sekoko Zorobhabheli, mwana Salatiyeli, a to engisa, kumweko ni Joxuwa, mwana Jozadhake, mphaxeli wa hombe, ni votshe vathu vale va nga huluka, dipswi da Mkoma Txizimu txawe, ni mapswi a mprofeti Hagayi, nga tile Mkoma Txizimu txawe, a nga ti mrumisile tona; se vathu va to thava masoni ka Mkoma.

2 Makronika 29:11

Konkuwa vanangu, mi nga mahe mihoni, nguko Mkoma ami sawute ku mi txi ema masoni kwakwe mi mu khozela ni kuva sithumi sakwe mi mu hisela dibaselo.

Genesisi 48:16

Ngelozi yi yi nga ni hulukisa ka to biha, yi na katekisa vafana vava, ngu konaho kwakwe ditina dangu di na simame di txi ya masoni, kumweko ni ditina da Abrahamu ni Isaake, i ku vatate vangu; vafana vava va na kule va txi anda ha mafuni.

Zakariya 2:3

Se wona taku, ngelozi yi yi nga ti ti womba-womba ni nani yi to khukha, kukhukha yimwani ngelozi yi yi hingeta.

Zakariya 1:19

Kambe ni to wotisa ka ngelozi yile yi nga ti ti womba-womba ni nani, ni txi khani: Njitxani txiya kani? Se yi to kha yona kwangu: Atiya nditxheho tile ti nga hangalasa Judha, ni Israyeli, ni Jerusalema.

Zakariya 1:13

Mkoma a to xamula ka ngelozi yile yi nga ti ti womba-womba ni nani, ngu mapswi amanene, i ku mapswi o thavelela.

Zakariya 1:9

Se ani ni ti khani: Awe nyamne wangu, mba mani vava kani? Se ngelozi yi yi nga ti ti womba-womba ni nani yi to kha yona: Ani ni na kukomba taku avava mbamani.

Ezekhiyele 44:15

Aniko vaphaxeli vale va ka Levhi, i ku vanana va Zadhoki, vale va nga xayisa txileleto txa nyumba yangu yo sawuleka, mbimo yile vanana va ka Israyeli va nga hambuka kwangu, Valevhi va tshuketile kwangu, ku ta ni thumela, va na va masoni kwangu, ku ta ni ninga mafura ni mnoha, kuwomba Mkoma Txizimu.

Ezekhiyele 44:11

Hambi keto, va na thuma nyumbani kwangu ko sawuleka, va txi xayisa sike sa nyumba, va na thuma nyumbani; va na daya mningelo wa kuhiswa, ni mphaxo wa vathu, kambe va na va masoni ka vathu, kasi ku va thumela.

Jeremiya 15:19

Ngu konaho, Mkoma a khene: Ngako u txi tshumelela kwangu ni na ku wuyisa ti taku u txi maha mlondeteli wangu. Ni kungako u txi tisa sa lisima, u leka si so biha, awe u na va txisofu txangu. Vona va na tshumelela kwako, aniko awe khu na mbi tshumelela kwawe.

Masalmo 106:23

Txizimu txi pimisile ku va lovisa. Aniko, Mosi, msawuleki wa Txizimu, a va kombelete, kasiku Txizimu txi kuthutha, txi si va lovisi.

Ezra 5:2

Sekoko ku to khukha Zorobhabheli mwana Salatiyeli, ni Jesuwa, mwana Jozadhake, ve khata kuaka Nyumba ya Txizimu, txi txi zumbako Jerusalema; va ti ti vhunwa ngu vaprofeti va Txizimu.

1 Samuwele 6:20

Sekoko vavamna va Bheti-Semi, va to kha vona: I mani a nga emako masoni ka Mkoma, Txizimu txiya txo sawuleka kani? Ni ku i mani kwathu a no kwelela kani?

Dhewuteronome 18:15

“Mkoma, Txizimu txako, a na ku humisela mprofeti wo fana ni nani, hagari ka va ka kwanu; awule mi no fanela ku mu engisa”;

Dhewuteronome 10:8

Ngu ka yona mbimoyo ya yimweyo, Mkoma a to sawula nyumba ya ka Levhi, kasi kuva txi rwala dibhokiso da txitumelelano txa Mkoma, ni kumaneka masoni kwakwe va txi khozela Mkoma, va txi mthumela ni kukatekisa vathu ngu ditina dakwe, kala nyamsi.

Genesisi 3:15

Se ni na veka livengo hagari kwako ni wamsikati, hagari ka liveleko lako ni liveleko lakwe; aliya li no ku ganyata msungo, se awe u txi li luma txizenende.”

Ezra 10:18

Se ku to maneka hagari ka vanana va vaphaxeli avale va nga tekana ni vavasikati va mamwani matiko: Ka vanana va Jesuwa, vanana va Jozadhake, ni vanawe: I ku Mahaseya, ni Eliyezeri, ni Jaribhe, ni Gedhaliya.

Zakariya 4:14

Sekoko ene a to khene kambe: Avava ngu vale vavambidi va nga totwa, va ku masoni ka Mkoma wa otshe mafu.

Ezra 2:2

i ku vale va nga wuya ni Zorobhabheli, ni Jesuwa, ni Nehemiya, ni Seraya, ni Rehelaya, ni Mordhekayi, Bhilisa, Misipani, Bhigvhayi, Rewumi ni Bhahana. Ka vathu va ka Israyeli, mtengo wa vavamna ngu wuwa: