Zakariya 2:9 - Bhiblia Yo Sawuleka

⁹ Nguko wonani taku, ni na guleta dianza dangu txitimwi kwawe, se vona va nata maha sikarawa, sa va va nga va thumela. Ngu kumaha keto, mi na tiziva tito, Mkoma wa Mabutho a Tiyimbi a ni rumile.

Zakariya 2:9 Referans Kwoze

Isaya 19:16

Ka yona yile mbimo, Vaegipta va na nga vavasikati, va na dhudhumela, va na thava ngu mhaka ya kuthuma ka dianza da Mkoma wa Mabutho a Tiyimbi, nguko di na guleka di va wukela.

Zakariya 6:15

Se avale va ku kule, va nata ve ta aka dithepeleni ka Mkoma, anu mi na tiziva ti to Mkoma wa Mabutho a Tiyimbi a ni rumile kwanu; kambe eto ti na maheka, ngako mi txi pfisisa dipswi da Mkoma, Txizimu txanu.

Zakariya 4:9

Manza a Zorobhabheli ma khatile nyumba yiya, kambe manza akwe ma na yi heta, kuva mi txi na tiziva taku, Mkoma wa Mabutho a Tiyimbi, a ni rumile kwanu.

Ezekhiyele 39:10

Kambe kha va na mbi tisa tikhuni ngu txitingani, hambi kuganga txipoponi, aniko va na turisa mndilo ngu matxhari; va na pa ka vale va nga va pela, ni kuhanda ka vale va nga va handa. Kuwomba Mkoma Txizimu.

Isaya 14:2

Se vathu va na va amukela ve va yisa makhaloni kwawe, sekoko nyumba ya va ka Israyeli, yi na va fumela, amu ditikoni ka Mkoma, veva tikhumbi ta txiwamna ni ta txisikati. Va na maha tikhumbi ta vale va nga ti va mahile tikhumbi, ni kufumela vale i nga ti vaxanisa vawe.

Isaya 11:15

Se Mkoma a na khundumusa do gwita diwoko da Linene la Egipta, a na guleta dianza dakwe e wukela mnambo ngu mtamo wa moya wakwe, e wu peka wu maha mtxhanu wa minambo ni yimbidi, ti to ni wuhi e txhatuka a di ni tikathula.

Johani 16:4

Se ni mi gete timhaka tiya kasiku mbimo yi txi no hoka txikhati txa txona, mi na khumbula ti to ni ti mi gete. ‘Kha na mi gela tiya kukhukhela kukhatani, nguko ni ti ngadi ni nanu.’

Johani 13:19

Na mi gela mhaka yiya, yi sinzi kumaheka, kasiku, ditshiku di yi humelelako, mi na kholwa ti to ‘Ani Ngani.’

Zakariya 2:8

Nguko Mkoma wa Mabutho a Tiyimbi a khene: Msana ka wudhumo, ene a ni rumete ka matiko ale ma nga mi handa; nguko wule a mi gwesako, a gwesa pfhaka ya diso dakwe.

Zefaniya 2:9

Ngu toneto, ni xambanya ngu kuhanya kwangu, kuwomba Mkoma wa Mabutho a Tiyimbi, Txizimu txa Israyeli, ngu ditshuri Mowabhi a na nga Sodhoma, se vanana va Amoni va na nga Gomora, kumaha ditiko da mindonga ya mipa, ni sisima sa mnyu, di na fuviselwa magwito, miboti ya vathu vangu yi na va handa, se miboti ya vathu vangu yi na va khozisa.

Habhakuki 2:17

Nguko kulwa ko wukela Libhanoni ku na kufenengeta, ni kuloviswa ka sihari sa tshofu ku na kuvangela kuthava, ngu mhaka ya mnoha wa vathu, ni kulwa ngu mhaka ya mafu, didhoropa ni votshe va zumbako ka dona.

Habhakuki 2:8

Ngako u nga hoxota matiko amangi, votshe vathu va na kuhoxota nawe, ngu mhaka ya mnoha wa vathu ni kulwa ngu mhaka ya mafu, didhoropa, ni votshe vale va zumbako ka dona.

Jeremiya 28:9

Aniko ngako mprofeti a txi profeta ngu kuthutha, yi txi tatiseka mhaka ya mprofeti, mprofetiyo a na zivaneka tito, ngu ditshuri a rumilwe ngu Mkoma.

Jeremiya 27:7

Otshe matiko ma na mthumela, ene ni mwanana wakwe ni mtukulu wakwe, kala ku txi hoka mbimo ya ditiko dakwe, ngu msana keto nene a na khoziswa, ngu matiko amangi ni vafumeli va hombe.

Isaya 33:23

Tingoti tako ti dhesekile; kha ta tsanisa phande yako, kambe kha ta nawuluta ditanga; sekoko so handwa so tala si na abaniselwa, se hambi silima si napa sile si nga handwa.

Isaya 33:1

Dikhombo kwako u handako na u sa handwa, awe u kanganyisako vale, va nga mbi kukanganyisa! Mbimo yi u no heta kuhanda, u na handwa; u txi na heta kukanganyisa, u na kanganyiswa nawe.

Isaya 13:2

Gwimbani m'jeke txitimwi ka mmango wa kwa mbi na txilo; va dhaneni ngu dipswi do guleka, mi va dyoweta ngu dianza, kasi kuva txi wulela ngu sike sa vathangeli.

Isaya 10:32

Ka ditshiku donedo, a na hoka Nobhe, e kombisa txibhakela mmangoni ka dihorana da Siyoni, ni ka mmango wa Jerusalema.

Isaya 48:16

Tshuketani kwangu mi ta engisa tiya: Kukhukhela kukhatani kha na womba-womba txihujani; kukhukhela mbimo yile timhaka tile ti nga maheka ani ni ti tiho; se konkuwa, Mkoma Txizimu a ni rumete Moya wakwe.

Zakariya 2:11

Se ka ditshiku dile, matiko amangi ma na sengeletana ka Mkoma, meva vathu vangu; ni na aka hagari kwako, kambe u na ziva tito, Mkoma wa Mabutho a Tiyimbi, a ni rumile kwako.

Isaya 4:5

Txitimwi ka wotshe wuako wa mmango wa Siyoni, ni txitimwi ka msengeletano wakwe, Mkoma a na maha direfu ni mitshikari ngu wutshi, ni dituro da mndilo ni wusiku; nguko txitimwi ka wotshe wudhumo, ku nava ni kutsivelwa.

Isaya 12:6

Anu vaaki va Siyoni, tsakani mi peka mikulungwani nguko Msawuleki wa Israyeli mbwa hombe hagari kwanu.

Isaya 26:1

Ka ditshiku dile, ku na embelelwa ndando ditikoni ka Judha: Hi ni didhoropa do tsana, adi Txizimu txi nga veka ka dona kuhuluka ngu maguma ni tibhingo.

Isaya 33:21

Aniko Mkoma haleya a na va wa hombe kwathu, wukhalo wa minambo ni milonga yo anama, ni ya yimweyo ngalava yo txungelwa kha yi na mbi pinda ngu kona, hambi txitimela txa hombe txa mati, kha txi na mbi tsimbila ngu kona.

Isaya 60:18

Kha ku na mbiswa kambe kupfala kulwisana ditikoni kwako, hambi kuxaselwa ni kukhundumuselwa mihinganoni kwako; aniko u na dhana “Kuhanyisa” ngu magumani kwako, ni matimbani kwako u na khawe “Kudhumisa.”

Isaya 60:19

Kha di na mbiswa di kuthumela ditambo kasi ku kuwoninga, hambi kuwoningwa ngu mtxima; aniko Mkoma a na va liwoningo lako la kwa mbi guma, ni Txizimu txako mbudhumo wako.

Jeremiya 8:19

Hi nga pfa dipswi da txidilo da mwanana wa txisikati wa vathu vangu, adi di humako ditikoni ka kule, di txi kha dona: Kasi Mkoma khangaho Siyoni kani? Ina Mkoma wakwe kha nga kwakwe kani? Ngu kutxani va nga vhinjukisa kuhenya kwangu ngu sifananiso sawe, ni sizimu sa vamatiko kani?

Joyeli 2:27

Se anu mi na tiziva ti to ani niho hagari ka Israyeli, ni ti to ani ngani Mkoma, Txizimu txanu, kha ku na mmwani kambe; ni vathu vangu kha va na mbi theleka tingana yotshe mbimo.

Zefaniya 3:15

Mkoma a thavisile kulamulwa kwako, a lovisile valala vako; Mkoma, Mfumeli wa Israyeli a hagari kwako; awe khu na mbiswa u txi wona kambe wubihi ni wawumwewo.

Zakariya 9:15

Mkoma wa Mabutho a Tiyimbi a na va vhikela; se va na dya msana ka kuva va di xute valala ngu marigwi a txibhalakaza; kambe va na sela ve maha diguwa nga va to leviswa ngu vhinya; se va na tala nga majingo txiluveloni.