Zakariya 12:6 - Bhiblia Yo Sawuleka

⁶ Ka ditshiku donedo, ni na veka vathangeli va ka Judha va txi nga dikala di turako hahatshi ka tikhuni, ni ku nga dituro hagari ka milumbi; se ngu txinene ni txibhabha vona va na lovisa votshe vathu vale va ku madhawani kwawe, kembe Jerusalema a na aketwa ka wukhalo wakwe, kona Jerusalema kupune.

Zakariya 12:6 Referans Kwoze

Obhadhiya 1:18

Se nyumba ya Jakobe yi na va mndilo, nyumba ya Josefa yi na maha dituro, ni nyumba ya Esawu yi na maha mwasi, se va na va hisa, va txihya ve guma; ni wammweyo kha na mbi sala ka nyumba ya ka Esawu, nguko Mkoma a ti wombile.

Zakariya 2:4

Se yi txi yi gela tiya: Tutuma, u ya gela dizambi diya u txi khawe: Jerusalema ku na akiswa ku nga mikhokhola yo mbi na maguma, ngu mhaka ya kutala, ka vathu, ni ka sihari.

Zakariya 9:15

Mkoma wa Mabutho a Tiyimbi a na va vhikela; se va na dya msana ka kuva va di xute valala ngu marigwi a txibhalakaza; kambe va na sela ve maha diguwa nga va to leviswa ngu vhinya; se va na tala nga majingo txiluveloni.

Mika 4:13

Khukha u hula, awe dihorana da Siyoni, nguko ani ni na ku mahela tshoka yako ngu simbi, ni syala sako ngu kopora, u na balisela matiko amangi, se kuxula kwako ku na pfaliswa ka Mkoma, ni thomba yako, ka Nyamne wa mafu otshe.

Jeremiya 30:18

Mkoma a khene: Ni na wuyisa vo ñolwa va matenda a Jakobe, ni na pfela wusiwana dizumbo dakwe; didhoropa di na aketwa txizani ka dona, nyumba ya wukoma yi na nga tontile ta kale.

Isaya 54:3

Nguko u na nava u txiya ka dianza da txinene, se liveleko lako li na lumbwa ngu matiko, li txi wusa madhoropa ale ma nga sala i di marumbi.

Isaya 9:20

Se ngako a txi wila didhawa da txinene, a na tshumela e pfa nzala, ngako a txi wila didhawa da txibhabha, kha na mbi khura; mmweyo ni mmweyo a na dya nyama ya diwoko dakwe.

Mtuletelo 20:9

Va to huma ve hangalaka ni dotshe ditiko ve randela midhuti ya vasawuleki ni didhoropa do randeka; kambe ku to txhika mndilo ngu nzumani wu txi ta va heta.

2 Vakorinto 6:7

ngu dipswi da ditshuri, ngu mtamo wa Txizimu, ngu matxhari a kululama hi ma ñolako ngu manza a txinene ni a txibhabha,

Zakariya 11:1

Awe Libhanoni tula matimba ako, kasi ku mndilo wu na tshokomisa mikedhari.

Zakariya 2:12

Sekoko Mkoma a na fumela Judha, eva thomba yakwe ka ditiko do sawuleka, kambe a na sawula Jerusalema.

Zakariya 1:16

Ngu toneto, Mkoma a womba tiya: Ngu wumbilu ni tshumelete Jerusalema; nyumba yangu yi na akwa kona, kuwomba Mkoma wa Mabutho a Tiyimbi, se ngoti yi na gwimbwa txitimwi ka Jerusalema.

Zakariya 12:5

Sekoko vathangeli va ka Judha va na kha vona timbiluni kwawe: Vahanyi va Jerusalema ngu vona i ku mtamo wangu, se Mkoma wa Mabutho a Tiyimbi, Njizimu txawe.