Zakariya 1:14 - Bhiblia Yo Sawuleka

¹⁴ Se ngelozi yile yi nga ti ti womba-womba ni nani, yi to ni gela tiya: Kwangula u txi khawe: Mkoma wa Mabutho a Tiyimbi a womba tiya: Ngu kuhiseka ka hombe, na hiseka ngu Jerusalema ni Siyoni.

Zakariya 1:14 Referans Kwoze

Joyeli 2:18

Sekoko Mkoma a na pfela ditiko dakwe, kambe a na va ni wumbilu ka vathu vakwe.

Zakariya 1:17

Kwangula kambe u txi khawe: A womba tiya Mkoma wa Mabutho a Tiyimbi: Madhoropa angu ma na engeta me anda ni kuhumelela; nguko Mkoma a ngadi a txi na thavelela Siyoni, kambe a ngadi a txi na sawula Jerusalema.

Zakariya 1:9

Se ani ni ti khani: Awe nyamne wangu, mba mani vava kani? Se ngelozi yi yi nga ti ti womba-womba ni nani yi to kha yona: Ani ni na kukomba taku avava mbamani.

Isaya 40:6

Dipswi di kha dona: “Kwangula.” Se wokari a nje khene: Na kwangula ni txi khani txani kani? Yotshe nyama yi fana ni mwasi, ni kotshe kutshura ka yona kufana ni siluva sa txitinga.

Isaya 40:1

Thavelelani, thavelelani vathu vangu, kuwomba Txizimu txanu.

Zakariya 1:13

Mkoma a to xamula ka ngelozi yile yi nga ti ti womba-womba ni nani, ngu mapswi amanene, i ku mapswi o thavelela.

Nahume 1:2

Mkoma i Txizimu txa txiluse ni kuphota; Mkoma wa ti photela ni kutala ngu kuhenya; Mkoma wa ti photela ka vale va m'wukelako, txiviti txakwe a txi vekela valala vakwe.

Hoseya 11:8

Ni ndi na kulekisa kutxani, awe Efrayime kani? Ni ndi na kuningelisa kutxani, awe Israyeli kani? Ni ndi na kumahisa kutxani ku nga Adhama kani? Ina ni ndi na kuveka ku nga Zebhoyimi kani? Mbilu yangu yi txitxile mndani kwangu, kotshe kunavela kwangu ka tura.

Isaya 63:15

Wona na u di nzumani, se u wona na u di ka wukhalo wako wo sawuleka, ni kudhundeka. Txi hayi txiluse txako, ni mithumo yako ya mtamo kani? U nga thavise kwangu lirando la mndani kwako ni la wumbilu wako!

Isaya 59:17

Nguko a ti ambekile kululama, ku nga txikatawu txa simbi, e sanzeka txigoko txa kuhanyisa ha msungo kwakwe, se a to ambala syambalo so ti photela, e fenengela txiluse txi txi nga dijasi.

Isaya 42:13

Mkoma a na huma kufana ni ndena, kufana ni m'thu wa yimbini, a na wusa kukhatala; a na kwangula, e maha diguwa da hombe, kambe a na veka hahatshi valala vakwe.

Isaya 38:22

Kambe Ezekhiya a to khene: Ngu txihi txikombiso txaku ni na kwelela Nyumbani ka Mkoma kani?

Isaya 9:7

Kuanda ka kufuma ni kudikha kwakwe, kha ku na mbi va ni magwito txitimwi ka txikhalo txa wukoma txa Dhavhidha, ni ka mfumo wakwe, kasi kutsanisa ni kuseketela ngu wulamuli ni kululama, kukhukhela konkuwa, kala kupinduka; lirando la Mkoma wa Mabutho a Tiyimbi, a na maha eto.

Zakariya 4:1

Se ngelozi yile yi nga womba-womba ni nani, yi to wuya kambe, yi ta ni wusa, ku nga m'thu wu a wuswako ha wukoheni kwakwe;

Isaya 37:32

Nguko ngu Jerusalema, ku na huma vale va nga sala, se ngu mmangoni ka Siyoni, avale va nga huluka; kukhutala ka Mkoma wa Mabutho a Tiyimbi, ku na maha eto.

Isaya 40:2

Wombawombani ngu wumbilu ka Jerusalema, kambe kwangulani mi m'zivisa ti to wukhumbi wakwe wu gumile, ti to sionho sakwe si divaletwe, ni ti to ka sotshe sionho sakwe a amukete hakhelo kumbidi ngu ka dianza da Mkoma.

Ezekhiyele 36:5

Ngu konaho, Mkoma Txizimu a khene: Ngu ditshuri kuhisekani ka kuhenya kwangu, ni wombawombile ni wukela matiko ale ma nga sala, ni ditiko da Edhomi. Vona va honyote mafu angu, ngu kutsaka ka totshe timbilu, ni kutxhipisa muhefemulo, kasi ku wu rinza kuñolwani.