Varoma 1:23 - Bhiblia Yo Sawuleka

²³ Se va phindute wudhumo wa Txizimu txi, txi si fiko, ve wu maha wa sithombe sa m'thu wu a fako, ni wa sinyana, ni wa sihari sa mune wa minenge, ni wa so tsimbila ngu dibindi.

Varoma 1:23 Referans Kwoze

Masalmo 106:20

va to leka Txizimu, txi i ku wudhumo wawe, ve khozela txithombe txa txihari txi txi dyako mwasi.

Jeremiya 2:11

Di ngava di diho ditiko di di nga hundulusa sizimu sa dona, hambiko i singako sizimu kani? Aniko vathu va vangu va lekile wudhumo wawe, ve khozela sisi si vhuniko txilo.

Mithumo 17:29

Se hi di va liveleko la Txizimu, kha hi faneli kupimisa ti to wuzimu wu nga fananiswa ni nzalama, mwendo silivhela mwendo dirigwi do vatwa ngu wutxhari ni mapimo ya vathu.

Varoma 1:25

Vonavo va to phindula ditshuri da Txizimu ve di maha makuhu, ve khozela ni kuthumela siwumbwa, ve leka Muwumbi, awu a fanelako kubongwa ngu malembe ni malembe. Amen.

1 Pedro 4:3

Se ti dingani ati mi nga ti hanyisa tona kale, to tsakelwa ngu vamatiko, ta kuhanya ngu wugelegele, ni kunavela ko biha, ni wudevi, ni makolo, ni masuke, ni kukhozela sa mafu.

Ezekhiyele 8:10

Se ni to wulela ni wona, ni mana taku, totshe tixaka ta sindindandinda, sihari so nyenyeza, ni sotshe sithombe sa nyumba ya ka Israyeli, si di pendilwe ka otshe madhawa a diseta.

Dhewuteronome 5:8

Awe khu na mbi ti mahela txifananiso txo vatwa, hambi txo fana ni txokari txa si si ku txitimwi nzumani, mwendo hahatshi ha mafuni, mwendo matini hahatshi ka mafu;

Isaya 44:13

M'vati a nawuluta dipulango, se e bhala mindenda yo bhilivila, e vata ngu txivatelo, e pima ngu lipimo, kambe a maha txizimu txakwe txi fanana ni m'thu, madingano ni zumbelo ya m'thu, kasi ku txi veka nyumbani.

Isaya 40:18

Mi nga txi fananisa ni mani koko Txizimu, mwendo mi nga txi fananisa ni txani kani?

1 Vakorinto 12:2

Ma tiziva tito, mbimo yi mi nga ti vamatiko, mi ti tumela kundindwa mi yiswa ka sizimu sa walo sa siduma.

Isaya 40:26

Gulani maso mi wona txitimwi, mi wona taku i mani a nga vanga sona siya. I mani a nga ti vangela so talisa tiya, i mani asi dhanako sotshe ngu matina a sona; ngu mhaka ya wuhombe wa mtamo wakwe, ni kutsana ka mtamo wakwe, kha ku na mbi pwateka ni txa tximwetxo.

Mtuletelo 9:20

Vamwani vathu va nga mbi dawa ngu sixaniso siya, kha va nga hunduluka ka mithumo ya manza awe, ti to ve leka kukhozela madhimoni, ni sithombe sa nzalama ni silivela ni simbi ya disotxe ni sa dirigwi ni sa mindonga, asi si sikotiko kuwona, hambi kuengisa mwendo kutsimbila.

Mithumo 10:12

Mndani ka txona ku ti ni sotshe sihari sa mune wa minenge, ni so tsimbila ngu mrumbu ni sinyana sa nzuma.