Valamuli 2:17 - Bhiblia Yo Sawuleka

¹⁷ Aniko ni ka kudotho kha va engisa valamuli; va to maha wugango wo londeta simwani sizimu, kambe va txi si khizamela; va to kuluveta kuleka nzila yi va nga tsimbila ngu yona vatate vawe, yo engisa sirumo sa Mkoma; se vona kha va mahisa eto.

Valamuli 2:17 Referans Kwoze

Vagalatiya 1:6

Na xamala, ti to mi kuluvetile ngutu kuhambana ni wule a nga mi dhanela makatekwa a Kristu, mi txi ya ka yimwani Evhangeli.

Dhewuteronome 9:12

Konako Mkoma a ni gete a txi khene: “Khukha, relela konkuwa, nguko vathu vako, avale u nga va humisa ditikoni ka Egipta, se va mahile kubiha; va kuluvetile kuleka nzila yi ani ni nga va leleta; va ti mahete txithombe txo tshulwa!”

Valamuli 2:7

Se vathu va to thumela Mkoma, ka otshe masiku a kuhanya ka Joxuwa, ni ka otshe masiku a madhota ale ma nga simama me hanya msana ka kufa ka Joxuwa, kambe va nga wona wotshe mthumo wule wa hombe wa Mkoma, awule a nga wu maha ka Israyeli.

Hoseya 2:2

Khongotelani mame wanu, mkhongoteleni, nguko ene hi nga msikati wangu, se ani kha ni nga mwamna wakwe; a na hambane ni wugelegele khoheni kwakwe, ni wungango wakwe titshumbuni kwakwe.

Masalmo 106:43

Sikhati so tala Mkoma a va hulukisile, aniko vona va eyisile makungo akwe, ve ti beta ngutu mu kubihani kwawe.

Masalmo 106:39

Ka toneto ni vona va ti nyenyezisile ngu mithumo yawe ve maneka va sa thembeka ka Txizimu.

Masalmo 73:27

Nguko ava va zumbako kule ni nawe va na lova; awe wa va fuvisa votshe vale va ku phikizako.

1 Samuwele 12:19

Se vathu votshe va to kha vona ka Samuwele: Kombelela sithumi sako ka Mkoma Txizimu txako, kasiku hi si fi; nguko ka sotshe sionho sathu hi engetete wubihi wuwa, wa ku ti kombelela mfumeli.

1 Samuwele 12:17

Ina hi nga dona ditshiku do hula fulaho nyamsi kani? Ni na dila koko ka Mkoma, se ene a na rumela txingwalangwanda, ni kunisa mati; se mi na ziva ni ku ti wona taku wubihi wanu, awule mi nga wu maha masoni ka Mkoma mbwa hombe, wa ku ti kombelela mfumeli.

1 Samuwele 12:12

Se mbimo yile mi nga wona ti to Nahasi, mfumeli wa vanana va ka Amoni, wata ku ta mi wukela, mi ti khanu kwangu: Ahim-him, aniko mfumeli a na fuma txitimwi kwathu; i ku ene koko, Mkoma, Txizimu txanu, Mfumeli wanu.

Joxuwa 24:31

Israyeli a thumete Mkoma amu ka otshe masiku a kuhanya ka Joxuwa, ni ka masiku otshe a madhota awa ma nga hanya msana ka kufa ka Joxuwa, i ku vale va nga ziva mithumo yotshe yile, Mkoma a nga yi maha ka vanana va ka Israyeli.

Joxuwa 24:24

Vathu va to womba ka Joxuwa va txi kha vona: “Athu hi na khozela Mkoma, Txizimu txathu, ni dipswi dakwe hi na di engisa.”

Dhewuteronome 9:16

Ni woni ti to kha ditshuri, mi onhile ka Mkoma, Txizimu txanu, ngu ku ti mahela dirole da simbi yo tshulwa, mi kuluveta ku ti hambukisa ka nzila yi Mkoma a nga mi leleta.

Levhi 17:7

Va nga engete kambe va txi maha mningelo wa mhamba ka madhimoni, va nga ti ti patile nawo, va txi maneka va si thembeki. Awuwa mlayo wa kala kupinduka, ka lotshe liveleko lakwe.

Eksodha 32:8

Ngu kukuluveta va hambukile ka nzila yi ni nga va leletela. Va ti mahete dirole da nzalama yo khandwa, ve di khozela, ni ku di mahela mphaxo, va txi kha vona: “Asiya nzizimu sako awe Israyeli, asi si nga kuhumisa ditikoni ka Egipta!”

Amosi 2:4

Mkoma a womba tiya: Ngu kuhambunyeta kuraru ka Judha ni ka wumune, kha ni na mbi thavisa txitsayiso, nguko va lambile Mlayo wa Mkoma, kambe kha va xayisa sileleto sangu, va ti lekile kukhata, ve xengwa ngu makuhu awe, aawa va nga tsimbila ngu ka wona vatate vawe.

Dhewuteronome 31:16

Se Mkoma a wombile ka Mosi a txi khene: Wona, u hafuhi ni kutsula u txi ya humula kumweko ni vatate vako; se vathu vava, va na khukha va txi ya maha wugango ni simwani sizimu sa ditiko dile u lavako kuwulela ka dona. Vona va na ni leka va txi ndaka mlayo wa txitumelelano, txi ni nga txi sunga navo.

Dhewuteronome 31:18

Kunene ka ditshiku donedo, ani ni na va sisela khohe yangu do gwita ngu mhaka ya totshe to biha, tile vona va no ti maha ngu kutshumelela ka simwani sizimu.

Valamuli 8:33

Se ku to maheka taku, msana ka kufa ka Gidhiyoni, vanana va ka Israyeli va to tshumela va txi ti nyenyezisa ngu kulondetela va ka Bhahali, ve teka Bhahali-Bheriti va txi mmaha txizimu txawe.

Jeremiya 3:6

Mkoma a to womba kwangu ka masiku a mfumeli Josiya, a txi khene: “Ina u ti woni ti a nga maha Israyeli wu wo tiwuka kani? Ene a kwete mimango yotshe yo guleka, ni hahatshi ka yotshe mindonga yo nyuka, konamo a ta so mbetete wugangoni.

Jeremiya 6:16

Mkoma a khene: Emani tinzilani, mi wonisisa; mi wotisela tinzila ta kale, mi txi khanu: Kasi nzila ya yinene ngu yihi kani? Sekoko, tsimbilani ngu yona. Mi na mana kuhumula ka mihefemulo yanu. Aniko vona va to xamula, va txi kha vona: Kha hi tumeli kutsimbila ngu yona.