Valamuli 19:9 - Bhiblia Yo Sawuleka

⁹ Sekoko wamwamna wule a to khukha kasi ku a txi tsula, ene, ni txikaba txakwe, ni dijaha dakwe; se tate wa msikati wakwe, a to m'gela ku khene: “Wona taku ditambo diya kuswani, se wusiku wa hoka, na ku kombela taku u txi otela kambe kona hawa wusiku wuwa; nguko se ditshiku da guma, otela kona hawa wusiku wuwa, niku mbilu yako yi na tsake; se mangwana ni mabimbi-kutxa, mi na wuka mi txi tsula ditendani kwanu.”

Valamuli 19:9 Referans Kwoze

Luka 24:29

Vona va to mkombela ngu kutamarisa va txi kha vona: “Zumba ni nathu, nguko ditambo di ya kuswani, se mbusiku.” Se Ene a to wulela m'tini e zumba navo.

Mavingu 27:1

U nga ti thembisele ngu ditshiku da mangwana, nguko khu ti zivi ati di no kuninga ditshiku da mangwana.

Valamuli 19:6

Se va to khalahatsha, vedya ni kusela ngu wumbidi wawe. Se tate wa dihorana a to khene ka wamwamna wule: “Na ku kombela, tumela, ti to u zumba kambe wusiku wuwa, kasiku mbilu yako yi txi tsaka.”

Valamuli 19:8

Se a di phindute ka ditshiku da wutxhanu kasi ku a txi tsula, tate wa dihorana a to khene: Na kukombela: “Susula.” Se va to zumba kala kugumani ka ditshiku, na va txi dya ngu wumbidi wawe.

Valamuli 19:10

Aniko wamwamna wule kha tumela kuotela kambe hale wusiku wule, se a to khukha a txi tsula, kala eya hoka hafuhi ka Jebhusi (i ku Jerusalema), kumweko ni timbongola takwe tatimbidi ti di lulamisetwe, ni txikaba txakwe.

Rute 3:7

Bhowazi ngako a di dyite ni kusela, na mbilu yakwe yi di tsakile, a to ya otela hafuhi ni mmumbu wa sevhadha; sekoko Rute a to ta ngu kunyanimela, a txi ya vhunungula didhamba ngu mikondoni ka Bhowazi, a txi otela.

2 Samuwele 13:28

Se Abhisalome a to leletela ka vafana vakwe, a txi khene: Wonisisani kha kwati; mbimo si mbilu ya Aminoni yi tsakako ngu vhinya, se ani ni txi mi gela ku khani: Dayani Aminoni! Sekoko mi na m'daya; mi nga thaveni; Ina hi ngani ni mi rumako kani? Tsanani, mi va tindena.