Valamuli 11:39 - Bhiblia Yo Sawuleka

³⁹ Se ngako ku di pindile mitxima yimbidi, a to tshumela a txi wuya ka tate wakwe, ahawa tate wakwe a nga maha nga ti a nga xambanya tona. Kambe ene kha nga va a di zivile wamwamna.

Valamuli 11:39 Referans Kwoze

Valamuli 11:31

a wule a no khata ene a txi huma ngu ha txikeni ka nyumba yangu, a txi ni hingeta, mbimo yi ni no wuya ni di xute vanana va ka Amoni, eyo ni na maha ngu ene minigelo wo hiswa ka Mkoma.

Isaya 66:3

A wule a dayako homu, a fana ni wule a dayako m'thu; awu a phaxako ngu txinvutana, a fana ni wule a dayako yimbwa; awu a ningelako sa thembweni a fana ni wule a ningelako mnoha wa khumba; awule a hisako dibaselo a fana ni wule a khozelako txithombe; ni vona vava va ti langela tinzila tawe vapune, se muhefemulo wawe wa tsaka ngu wubihi wawe.

1 Samuwele 2:18

Aniko Samuwele a txi thuma masoni ka Mkoma, na i di ngadi mfana, adi ambate efodhe ya linyu.

1 Samuwele 1:28

Ngu kumaha keto, ani kambe ni mningete ka Mkoma, ka otshe masiku a kuhanya kwakwe; nguko a kombetwe ka Mkoma. Se ene a to khozela Mkoma koneho.

1 Samuwele 1:24

Se ngako a di mlumute, a to tsula nayo, ni marole mararu ni efa ya mpupu, ni fuko ya vhinya, se e si tisa Nyumbani ka Mkoma, kona Silo. Aniko mfana i ti ti ngadi mwanana ngutu.

1 Samuwele 1:22

Hambi keto, Ana kha kwelela, aniko a to khene ka mwamna wakwe: Mbimo yi mwanana o no lumulwa, sekoko, ni na mteka kasi ku eya woneka masoni ka Mkoma, se koneyo a na ya zumba kona yotshe mbimo.

1 Samuwele 1:11

Se a to maha txixambanyo, a txi khene: Awe Mkoma wa Mabutho a Tiyimbi! Ngako ngu ditshuri u txi wona kuxaniseka ka txithumi txako, se u ni alakanya, kambe u si divali txithumi txako, aniko u ninga txithumi txako mwanana wa mfana, ni na mningela ka Mkoma masiku otshe a kuhanya kwakwe, ha msungo kwakwe kha ku na mbi pinda limo.

Dhewuteronome 12:31

U nga ti mahe eto masoni ka Mkoma, Txizimu txako! Nguko totshe ti Mkoma a ti nyenyako, totshe ti ene asi ti laviko, vona va ti mahile ka sizimu sawe, aha koza va txi hisa vanana vawe vavafana ni vamahorana, va txi dhumisa sizimu sawe.

Valamuli 11:38

Tate wakwe a to m'gela a txi khene: Tsula. Se a to mleka e tsimbila-tsimbila ni vangana vakwe a txi ti salukela wumbiri wakwe, amu mimangoni.

Valamuli 11:40

Kukhukhela konako ku to tumbuluka mkhuwo ka va ka Israyeli, wa ti to dilembe ni dilembe, timbiri ta ka Israyeli ti huma amu ka mune wa masiku, ti txi ya saluka mwanana wa Jefta wa dihorana, mugileyadhi.

2 Makronika 35:25

Se Jeremiya a to maha txidilo txo dila Josiya; se votshe vaembeleli vavamna ni vavasikati va to womba-womba ngu timhaka ta Josiya tindandoni kwawe, kala ka ditshiku da nyamsi; nguko va ti mahile txileleto ka Israyeli; wonani taku “ti bhatwe ka dibhuku da sidilo.”