Valamuli 10:13 - Bhiblia Yo Sawuleka

¹³ Hambi keto, anu mi ni tshuralete, mi thumela simwani sizimu; ngu mhaka yeto kha ni na mbi mi hulukisa kambe.

Valamuli 10:13 Referans Kwoze

Jeremiya 2:13

Nguko vathu vangu va mahile kubiha kumbidi: Va ni lekile ani txisima txa mati ma hanyako, ve ti akela mathange ma ku ni tifa, ma si sikotiko kuxayisa mati.

1 Makronika 28:9

Se awe mwanangu Solomoni, ziva Txizimu txa tate wako, u txi thumela ngu mbilu ya yinene, ni mhefemulo wo txhatxheka; nguko Mkoma wa xola totshe timbilu, ni kupfisisa totshe timhaka ta mialakanyo; se ngako u txo mlava, u na mmana; kambe ngako u txi mleka, a na kulamba kala kupinduka.

Valamuli 2:12

Se va to leka Mkoma, Txizimu txa vatate vawe, awu a nga va humisa ditikoni ka Egipta, ve londetela simwani sizimu, sa vathu vale va nga ti ti va ranganyetile, se va to khizama ka sona, veza ve wusa kuhenya ka Mkoma.

Jona 2:8

Avale va ti ningetetelako ka ti ti si vhuniko txilo, va leka wumbilu wa Mkoma vapune.

Dhewuteronome 32:15

Se Jesurumi a dyite e khura, a txi ena; u enile, u enile, u tala ngu mafura; se a lekile Txizimu txi txi nga mmaha; kambe a eyisile Dirigwi da kuhanyiswa kwakwe.

Valamuli 10:14

Tsulani mi txi ya dila ka sizimu sile mi nga si sawula; si na mi hulukisa sona, ka mbimo ya kuxaniseka kwanu!”

Valamuli 2:19

Aniko ku txi maheka taku, ngako a txi fa mlamuli, va ti ti tshumela va txi ti nyenyezisa, kupinda vatate vawe, va txi londetela simwani sizimu, va txi si thumela ni ku si khizamela; va si leki ni txa tximwetxo ka simaho sawe, hambi txieyiso txawe.

2 Makronika 12:5

Sekoko mprofeti Semaya a to ta ka Robhowamu ni ka vathangeli va va ka Judha a ava va nga ti ti sengeletanile Jerusalema ngu mhaka ya Sisake, a txi khene: Mkoma a womba tiya: Anu mi ni lekile, nani ni mi lekile manzani ka Sisake.

2 Makronika 15:2

Se a to huma eya ka Asa a txiya khene: Awe Asa ni nanu motshenu va ka Judha, ni va ka Bhenjamini ni engiseni, Mkoma ani nanu, ngako anu mi di ni nene; ngako mi txi mlava mi na mmana, mi txi m'leka nene a na mi leka.

2 Makronika 21:10

Ngu maha yeto, va ka Edhomi va to wukela mfumo wa ka Judha kala ka ditshiku da nyamsi; ka yoneyo mbimo Libhina nene a to vhutuka, nguko Jehoramu a ti ti lekile Mkoma Txizimu txa vatate vakwe.

Jeremiya 2:19

Kubiha kwako ku na kutsayisisa, u pekwa ngu wubihi wako, ngukonaho, ti zive ku tibihile kuleka Mkoma, Txizimu txako. Ni kwa mbi thava ka tisa kupandiseka, kuwomba ene apune Mkoma Txizimu txa Mabutho a Tiyimbi.