Vafilipiya 4:8 - Bhiblia Yo Sawuleka

⁸ Vanathu, ngu kugwitisa, ni khani: Totshe ti i ku ta ditshuri, totshe ti i ku ta lisima, totshe ti i ku ta kululama, totshe ti ti dhundekako, totshe ti ti ku ni nduma ya yinene, totshe ti i ku ta mahanyelo amanene ni kudhumiseka, ngu toneto mi fanelako kuzumba mi txi ti alakanya.

Vafilipiya 4:8 Referans Kwoze

Jakobe 3:17

Kasi wuzivi wu wu tako ngu txitimwi, kukhata wu basile, kambe wu ni lidikho, ni wunene, ni kuengisa, kuhonisela, ni mihando ya yinene, ku ambi kana-kana, ni ku ambi kanganyisa.

Titosi 2:7

Thanga awe u va txikombiso txa mithumo ya yinene, u si vi ni txisolo, u va wa kuthutha amu ka kugondisa ditshuri;

2 Vakorinto 8:21

Nguko, hi thela kota ngu kumaha mithumo ya yinene i si nga masoni ka Mkoma dwe, kambe ni masoni ka vathu.

Vagalatiya 5:22

Kasi mihando ya Moya ngu yiya: Lirando, litsako, kudikha, kutimisela, wunene, kutshambisa, kuthembeka,

1 Pedro 2:12

Wutomi wanu hagari ka va va si kholwiko, wu nave wa wunene ngutu, kasi ku ngako va txi mi lumbeta, kuva mi di vabihi, vona va na yi ziva mithumo yanu ya yinene, se ve dhumisa Txizimu ka ditshiku da kuta ka txona.

Vahebheru 13:18

Hi kombeleleni, nguko ha themba ti to hi ni livhalo la linene, na hi txi navela ngu yotshe mbilu kutsimbila ngu nzila ya yinene yotshe mbimo.

1 Timoti 4:12

Ku nga ve ni m'thu wo dhelela wuzambi wako, aniko, kuhambana nito, kulaveka u va txikombiso masoni ka makholwa, amu ka kutxhumayela dipswi, amu ka mahanyelo, amu ka lirando, amu ka likholo, amu ka kubasa mbilu.

Vaefesu 5:9

Nguko mihando ya liwoningo ngu wunene ni kululama ni ditshuri.

Titosi 1:8

Kulaveka a txi ziva kuamukela vapfhumba, i di wamnene, wa kutipimela wo lulama, wa kusawuleka, wa kutiñola ka to biha,

1 Johani 3:3

Wuhi ni wuhi a ku ni txithembo txiya ni nene, wa ti sawulekisa apune, nga ti nene Jesu i ku wo sawuleka.

1 Pedro 1:22

Ngu kuengisa ditshuri, mi basisilwe mimoyani kwanu ngu lirando la txikoma ni txinanda. Randanani ngu kukhutala ka lirando la kuta ngu mndani ka mbilu,

Titosi 3:14

Votshe va ka kwathu va fanete kugonda kukhutalela mithumo ya yinene, kasi kuvhuna amu si pwatekako ngutu, va si mahi sifule so mbi veka mihando.

Varoma 13:13

Nga tiya i ku mitshikari, he tsimbileni ngu fanelo, hi hambana ni limito mwendo wudevi, ni wugango mwendo wugelegele, ni livengo mwendo dibava.

Mavingu 20:7

M'thu wo lulama a tsimbila ditshurini kwakwe; va na kateka vanana vakwe vale va mu engisako.

Jakobe 1:27

Nguko, wukholwa wa ditshuri wo mbi na dikhwiti masoni ka Txizimu, Tate wathu, ngu kudingula va vo felwa ngu vaveleki, ni vale i ku tinoni, kuxanisekani kwakwe, ni ku ti vhikela kambe ka nzambwa ya ditiko.

1 Johani 3:18

Sivananananu sangu, hi nga randeni ngu txisofu ni lidimi, aniko he randaneni ngu mithumo ni ditshuri.

Titosi 2:2

Vavamna va madhota va nave va kutipimela, vo xonipheka, va mapimo amanene, va kutsana amu ka likholo ni mu ka lirando ni mu ka kutimisela.

2 Vakorinto 13:7

Se, na mi kombelela ka Txizimu ti to mi si mahi kubiha, kuxuva kwathu hi nga kutikomba kota nga va va nga sikota, aniko hi xuva ti to anu mi maha ta tinene, hambi hi txi woneka nga hi vatandeki.

Vakolosa 4:5

Hanyani ngu wuzivi ni va va ku hahanze, mi txi londola ta tinene mbimo yi mi ku ka yona.

1 Pedro 4:8

Ngutu-ngutu, khatalelani kurandana, nguko lirando la fenengeta mtalo wa sionho.

2 Samuwele 23:3

Kuwombile Txizimu txa ka Israyeli Dirigwi da Israyeli di wombile tiya kwangu: Ku nava ni mlulami wu a no fumela txitimwi ka vathu, a na fuma ngu kuthava Txizimu.

Varoma 13:3

Nguko ava va fumako hi nga valala ka mithumo ya yinene, aniko hahanze ka yile yo biha. Ina u dhunda kuhanya u si nga ni txithavo ka wuthangeli kani? Maha ta tinene, u na dhundwa ngu wukoma;

Titosi 2:14

Ene a ti ningete ngu mhaka yathu, kufela ku hi tirula ka wotshe wubihi, kasiku ene e ti basisela ngamu yi yi no va i di yakwe, ayi yi khutalako amu ka mithumo ya yinene.

Vafilipiya 3:1

Ngu kugwitisa, vanathu, tsakani ngu ka Mkoma. Kha ti ni karati kuengeta ni mi bhalela toneto ta timweto, nguko eto ti vhuna ku mi tsanisa.

Varoma 2:29

aniko Mujudha ngu wu i ku toneto ni mbiluni, ni wukwera wa ditshuri ngu wa mbilu, awu wu mahwako moyani, i si nga ngu mibhalo; se kudhumiswa kwakwe kha ku humi ka vathu, aniko kuhuma ngu ka Txizimu.

Isaya 26:7

Nzila ya wo lulama, yi lulamile yotshe, awe ngu kululama, u pima matsimbilelo a mlulami.

Mavingu 31:31

Mningeni mihando ya manza akwe, kambe mithumo yakwe yi na m'dhunde txikenini.

1 Timoti 2:2

Kombelelani vafumeli ni votshe vale va fumako, ti to hi txi mana kuhanya ngu kurula ni kuzumbiseka, ngu wunene ni wululamo.

1 Timoti 5:10

Ta laveka ti to e ziwa ngu mithumo yakwe ya yinene; kufana ni kuwunja vanana ngu nzila ya yinene, kuamukela vapfhumba, kukuwula mikondo ya vasawuleki, kuvhuna ava va xanisekako, ni kutiningetela ka yotshe mithumo ya yinene.

Dhewuteronome 16:20

Tsimbilisa kululama dwe, kasi ku u na hanya, u txi mana thomba ya ditiko di Mkoma, Txizimu txako, a no kuninga.

Vaefesu 6:14

Emekani ngu kutsana. Sungani siwunu ngu ditshuri, di txi maha libhande lanu. Ambalani kululama ku txi maha txivhikelo txa khana yanu.

1 Vatesalonika 4:12

Mahanyelo anu ma nava i di a lisima masoni ka vathu va hahanze, kasi mi na va mi si vileli kuvhunwa ngu m'thu.

Vaefesu 4:25

Ngu konaho, lekani makuhu mi txi womba ditshuri mmwani ni mmwani ka mkwawe, nguko hotshethu hi sihango sa mmidi wumwewo.

2 Vakorinto 6:8

amu kudhundwani ni mu kunyenywani, ka nduma ya yinene ni ka nduma yo biha, hi wonwa hi di vakanganyisi, kasi hi va ditshuri.

Mithumo 10:22

Vona va to xamula, va txi kha vona: “Korneliyo, mthangeli wa dizana, awu i ku wamwamna wo lulama, a di ni txithavo ka Txizimu, awu a dhumiswako ngu dotshe ditiko da Judha, a leletilwe ngu ngelozi ya kusawuleka ya Txizimu, ku ta kudhana u ya m'tini kwakwe, kasi kuya engisa ti u no ya mu gela tona.”

Johani 7:18

Awu a wombawombako ngu ta wutumbu wakwe, a lava kudhumiswa; aniko awu a lavako kudhumiswa ka wule a nga mruma, eyo ngene i ku wa ditshuri, kwakwe kha ku nga ho kukanganyisa.

Luka 2:25

A ti ti ho m'thu Jerusalema a nga txi dhanwa ku i Simiyoni. Ene i ti wa kululama ni kutiningetela ka wukhongeli. Ene a ti ti rinzela kuthavelelwa ka Israweli, se Moya wo Sawuleka wu ti ti ni nene.

Marku 6:20

Nguko Herodha a ti thava Johani, ngu kuziva ti to ene i m'thu wo lulama ni wo sawuleka, kambe a ti ti mu vhikela. Mbimo yi a nga txi mu engisa, a ti thelwa mphume, aniko a ti mu engisa ngu kutsaka.

Mavingu 11:1

Txikalo txo dyelela wa txi venga Mkoma, aniko mpimo wo lulama wa mtsakisa.

Rute 3:11

Se konkuwa, mwanangu, u nga thave; ni na ku mahela totshe ti u nga ti womba, nguko vathu votshe va didhoropa dangu, va tiziva ti to u wamsikati wamnene.

Luka 16:15

Ene a ti khene kwawe: “I di anu, mi ti maha valulami masoni ka vathu, kambe Txizimu txa tiziva timbilu tanu; nguko atxi txi nga guleka masoni ka vathu, i manyala masoni ka Txizimu.”

1 Vakorinto 4:5

Ngu toneto, mi nga tekeleni kulamula, txi sinzi kuhoka txikhati, kala kuwuyani ka Mkoma, awu a nota woninga mithumo yi yi nga sisala mtemani, e wonekisa makungo a timbilu. Se ngu konaho mmwani ni mmwani a nota amukela ka Txizimu wudhumo wu wu m'fanelako.

Mithumo 22:12

“Koneyo ku ti ni m'thu wokari, a nga ti dhanwa ku i Ananiya, i nga ti m'thu wa wukhongeli ni mlondeteli wa Mlayo, awu a nga ti sumwa wunene ngu Vajudha va didhoropa.

Ndando ya Tindando 5:16

Ka tsakisa kuwombawomba kwakwe ka kunene; ina, ene wa navetisa ngutu. Txirandwa txangu txi zumbisileto, kambe ngu toneto mngana wangu, Anu vanana vamahorana a Jerusalema,

Genesisi 18:19

Nguko ani ni msawute kasi ku a txi gondisa vanana vakwe, ni votshe va ka kwawe msana kwakwe, kasiku ve maha kuranda ka Mkoma, ni kumaha kululama ni wunene, se ngu mhaka yeto, ani Mkoma, ni na maha ka Abrahamu ati ni nga mthembisa.”

1 Johani 4:1

Vorandeka, mi nga kholweni ka yotshe mimoya, aniko, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko.

1 Timoti 5:2

vavasikati va hombe va khongotele nga vamame vako, mahorana ma angule nga tindiyako ngu kotshe kubasa ka mbilu.

Luka 23:50

Ku ti ti ho wamwamna, a nga ti dhanwa ku i Josefa, i nga ti txihango txa Dibanza, m'thu wamnene, na a di lulamile,

Mavingu 31:29

Mahorana amangi ma vile ni mamahelo amanene, aniko awe wa va pinda ngutu votshe.

Mavingu 16:11

Lipimo la linene ni txikalo txo lulama nza Mkoma; otshe marigwi a kona ma mahilwe ngu ngene.

Mavingu 12:4

Wamsikati wamnene m'bhoti ka mwamna wakwe, aniko awule a wisako tingana a fana ni kusina mndani ka marambu akwe.

1 Timoti 3:4

Kulaveka a txi ziva kuxayisa ta tinene m'ti wakwe apune, a txi ziva kugondisa vanana vakwe kuengisa ngu fanelo yi yi lavekako.

Mithumo 6:3

Ndinene, vanathu, kukhedha hagari kwanu, mtxhanu wa majaha ni mambidi a kuthembeka ta tinene, na ma di tate ngu Moya wo Sawuleka ni wuzivi, kasiku hi va veka ve thuma mthumo wuwa.

Matewu 22:16

Se va to m'rumela vagondiswa vawe ni va ka Herodha, va txi ya kha vona: “M'gondisi, ha tiziva ti to u na ni ditshuri ni ti to u gondisa nzila ya Txizimu ngu ditshuri, u si khatali ngu m'thu, nguko khu yi ngu txiemo txa m'thu.

Mavingu 31:10

I mani a nga sikotako kumana msikati wamnene kani? Mtengo wakwe wa pinda ngutu wa marigwi a lisima.

Vahebheru 11:2

Ngu mhaka ya likholo, vakale va mani nduma ya yinene.

1 Timoti 3:11

Vavasikati ni vona, kulaveka i di vo ti ñola, vo thembeka ka totshe tinzila.

2 Vakorinto 8:18

Hi mruma ku ta ni mmwani mwanathu awu a dhundwako mabanzani kotshe ngu mhaka ya mthumo wakwe wo txhumayela Evhangeli.

2 Samuwele 1:23

Sawule ni Jonatani va ti ti dhundana ni kurandana ngutu kuhanyani kwawe, hambi kufani kwawe kha va hambana! Va ti ti ni livilo ngutu kupinda magama, ni mtamo ngutu kupinda tingonyamo.

2 Pedro 3:1

Vo randeka, adiya dipapilo nda wumbidi ni txi mi bhalela, na ni txi duketa, ka otshe mapapilo a mambidi, kuwuseta mialakanyo yanu ya yinene ngu sialakanyiso sokari;

Masalmo 82:2

“Mi na leka ditshiku muni kulamula ko soholoka ni kuemela vabihi kani?

Varoma 14:18

Nguko awu a thumelako Kristu ngu nzila yiya, wa tsakisa Txizimu, na a txi dhundeka ka vathu.