Vaefesu 5:2 - Bhiblia Yo Sawuleka

² Se tsimbilani ngu lirando, kufana ni Kristu, na nanu vanani ni lirando, nguko Ene a mi randile. Ene a ti ningete apune ngu kota yathu, a txi ti maha gandelo ni mhamba yo bhumula ya kutsakisa Txizimu.

Vaefesu 5:2 Referans Kwoze

Johani 13:34

Na mi ninga mlayo wa wuphya: Randanani! Nga ti ani ni nga mi randa, na nanu mi fanete kurandana.

Vagalatiya 2:20

Ngu toneto, hi nga ngadi ani ni hanyako, aniko i Kristu a hanyako kwangu. Konkuwa, ni txi hanya wutomi wa mmidi, ni hanya ngu kukholwa ka Mwanana wa Txizimu, awu a nga ni randa, a txi ti ningela ngu ngani.

Vakolosa 3:14

Kambe txitimwi ka sotsheso, ambalani lirando, i ku txitsaniso txo hetiseka;

2 Vakorinto 2:15

Nguko, athu hi kubhumula ka kunene ka Kristu masoni ka Txizimu, kubhumula ku ku hangalakako hagari ka vale va hanyiswako ni ka vale va lovako.

Titosi 2:14

Ene a ti ningete ngu mhaka yathu, kufela ku hi tirula ka wotshe wubihi, kasiku ene e ti basisela ngamu yi yi no va i di yakwe, ayi yi khutalako amu ka mithumo ya yinene.

1 Vakorinto 16:14

Totshe ti mi ti mahako, ti maheni ngu lirando.

Matewu 20:28

Nga toneto, Mwanana wa M'thu nene, kha tela ku ta thumelwa, aniko a tete ku ta thumela, ni kuningela wutomi wakwe, kasi kutirula vavangi.”

1 Pedro 4:8

Ngutu-ngutu, khatalelani kurandana, nguko lirando la fenengeta mtalo wa sionho.

2 Vakorinto 8:9

Ma wu ziva wunene wa Mkoma wathu Jesu Kristu. Ene hambiko i ku nyamne wa sotshe, a ti mahile txisiwana, kasiku anu mi txi mana sotshe ngu mhaka ya wusiwana wakwe.

1 Johani 3:16

Lirando hi li zivisa tiya: Jesu a ningete wutomi wakwe ngu mhaka yathu; se nathu hi fanete kuningela wutomi wathu ngu mhaka ya vanathu.

Genesisi 8:21

Se Mkoma a to hefemula, a txi pfa kubhumula, a txi khene kha Mkoma mbiluni kwakwe: “Ani kha ni na mbi ngadi ni ruketela ditiko ngu mhaka ya m'thu, nguko mipimiso ya mbilu ya m'thu njo biha, kukhukhela wananani kwakwe; kha ni na mbi ngadi ni daya kambe sotshe sivangwa si si hanyako, kufana ni ti ni nga ti maha.

Mtuletelo 1:5

ni ka Jesu Kristu i ku fakazi ya kuthembeka, matiwula ya vafi, Mkoma wa votshe vafumeli va mafu. Kwakwe, ene a hi randako, ene a nga hi kuwula sionho sathu ngu mnoha wakwe,

Vahebheru 9:26

Idiku a to mahisa toneto Kristu a ndi na fanekela kuxaniseka sikhati sasingi kukhukhela makhatoni ka kuvangwa ditiko; aniko a humelete kumweko dwe, kuhetisekani ka timbimo, a ta fuvisa txionho ngu mhamba ya mmidi wakwe wupune.

Vahebheru 9:14

ngutu-ngutu mnoha wa Kristu, awu a nga ti ningela apune, na a si nga ni txionho, ngu Moya wo Sawuleka, ka Txizimu txi txi hanyako, ngu wona wu ku ni mtamo wa kubasisa timbilu tathu ka mithumo ya lifo, ti to hi sikota kuthumela Txizimu txa kuhanya.

1 Timoti 2:6

a nga ti ningela kasi kutirula votshe vathu. Awuwa ngu wona wufakazi wu wu nga vekwa ka masiku awa ma fanelako,

Vaefesu 4:15

Kambe, ngako hi txi londetela ditshuri ngu lirando, hi na kula ka totshe ngu kulondisa awule i ku msungo, ene Kristu.

1 Johani 3:23

Txirumo txa Txizimu ngu txiya: Kukholwa ka ditina da Mwanana wa txona Jesu Kristu, ni kurandana nga ti a nga hi rumisa tona.

1 Timoti 4:12

Ku nga ve ni m'thu wo dhelela wuzambi wako, aniko, kuhambana nito, kulaveka u va txikombiso masoni ka makholwa, amu ka kutxhumayela dipswi, amu ka mahanyelo, amu ka lirando, amu ka likholo, amu ka kubasa mbilu.

1 Vatesalonika 4:9

Ngu mhaka ya kurandana ni vananu, kha mi faneli kubhalelwa nguko, anu mipune mi gondisilwe kurandana ngu Txizimu.

Vaefesu 4:2

ngu kotshe kutiveka hahatshi, ni kudikha, ni kuhonisela, mi divalelana ngu lirando,

Vaefesu 3:17

ni ti to Kristu a txi aka timbiluni kwanu ngu kukholwa, kufela ku lirando li txi maha mkoloti wa kutsanisa dihanyo danu.

Vagalatiya 1:4

awu a nga ti ningela ngu mhaka ya sionho sathu, kufela ku hi hulukisa ka nyango yiya yo biha, ya masiku awa, madingano ni kuranda ka txona Txizimu Tate wathu.

Levhi 1:17

txinyana txiya, a na txi bhanda ngu hagari ka mabhapi, aniko asi txi tshaputi; se mphaxeli a na txi hisa txiluveloni, txitimwi ka tikhuni ti ti ku ha mndiloni; i mhamba yo hiswa, mningelo wo fanela kuhiswa, wa kubhumula ko tsakisa Mkoma.

Levhi 1:13

Kambe ku na kuwulwa masembe ni maswondo, se ngu msana mphaxeli a na maha mningelo ngu sotsheso, ngu ku si hisa ha txiluveloni. I mhamba yo hiswa, mningelo wu fanelako kuhiswa, kasi kutsakisa Mkoma, ngu kubhumula ka wona.

Mtuletelo 5:9

va txi embelela ndando ya yiphya va txi: “U ni fanelo yo amukela dibhuku, u txi tula sixambanyo sa dona, nguko u datwe, se ngu mnoha wako u xavete Txizimu vathu va totshe tihunzu, totshe tidimi, otshe matiko ni yotshe mifumo.

Vahebheru 9:23

Ngu toneto, ngako sifananiso sa simaha sa nzumani si basiswako ngu miphaxo yo nga toneto, ta laveka ti to sona simaha siya sa nzumani si basiswa ngu miphaxo yo pinda yile.

Vaefesu 3:19

Ni kombela ti to mi txi li ziva lirando liya, i ku la hombe ngutu kupinda sotshe si hi si zivako, kufela ku mi txi talelwa ngu yotshe thomba ya kuhetiseka ya Txizimu.

Varoma 8:3

Nguko ati mlayo wu nga ti tanda ngu mhaka ya dikhodho da mmidi, Txizimu txi ti mahile, ngu kurumela Mwanana wa txona, a di ni txiemo txa wuthu wa txionho, kasi ku ta xula txionho, ni ku txi abanisa kona mmidini;

Amosi 5:21

Na venga, na txhipisa mibuso yanu, ni mitshangano yanu ya hombe, nguko kha si ni tsakisi ni kakumweko.

Levhi 1:9

Kambe va fanete kukuwula masembe ni maswondo a kona; se mphaxeli a na hisa sotshe siya ha txiluveloni; i mhamba yo hiswa, ya kubhumula ko tsakisa Mkoma.

Vaefesu 5:25

Nananu vavamna, randani vasikati vanu, kota nga ti Kristu a nga randisa tona Dibanza, a txi ti ningela ngu mhaka ya dona,

1 Vakorinto 5:7

Ti basiseni ka mtshumbelo wa kale, kasiku mi maneka mi di wurathi wa wuphya, nguko kha mi nzi kutshumbelwa. Kristu, i ku Txinvutana txa Pasika yathu se a bhayilwe.

Varoma 4:25

ene wu a nga ningelwa ngu kuonha kwathu, e wuswa ka vafi, kasi ku hi txi mana kumahwa valulami.

Johani 6:51

“Ani ni dipawu da kuhanya di nga txhika ngu nzumani. Awu a dyako dipawu diya a na hanya wutomi wo mbi guma. Dipawu di ni no mninga, ngu mmidi wangu ni no wu ningela ngu kulava kuhanyisa ditiko.”

Varoma 8:37

Aniko ka sotshelele siya, ha xula ka kupindisa ngu mtamo wa wule a nga hi randa.

Levhi 3:16

Otshe mafura ma nava a Mkoma; mphaxeli a fanete ku mahisa ha txiluveloni. Nzakudya si si ningelwako kumweko ni mhamba, ti to si na hiswa, kasi kutsakisa Mkoma, ngu kubhumula ka sona.

Eksodha 29:18

Ngu toneto, u na hisa hamba yotshe ha txiluveloni; mningelo wa kuhiswa wo lumba Mkoma, wo bhumula, mningelo wuwa mbwo mahela Mkoma.

Eksodha 29:25

Se u na si teka manzani kwawe, u txi si hisa ha txiluveloni, ngu txitimwi ka mningelo wo hiswa wo mahela Mkoma.

Varoma 15:16

yo ni maha txithumi txa Jesu Kristu hagari ka vamatiko, ani ni nga sawulwa ni txi mahwa mthumeli wa Evhangeli ya Txizimu, kasiku vamatiko ve va i di mningelo wa kutsakisa Txizimu, na wu di basisilwe ngu Moya wo Sawuleka.

2 Vakorinto 2:14

Txi na bongwe Txizimu, atxi, ngu Kristu, txi hi guletako yotshe mbimo, kudhumiswani ka txona; atxi kambe ngu ngathu txi lavako kuhangalasa ka otshe makhalo kubhumula ka wuzivi wa txona.

Vaefesu 1:4

Ngu kota yakwe, Txizimu txi hi sawute, di sinzi kumahwa ditiko, kasi ku hi txi mana wululami wa lirando ni kuzumba hi si nga ni txisolo masoni ka txona.

Vaefesu 5:15

Ti di ngeto, wonisisani ta tinene mahanyelo anu; mi nga hanyiseni ku nga vathu va va si ziviko, aniko hanyani nga vathu va va zivako,

Vafilipiya 4:18

Ngu toneto, sotshe ni naso, so tala si sala. Ni taletwe ngu ku ni nga amukela manzani ka Epafrodhito asi mi nga ni rumela, matolo o bhumula ta tinene, mhamba yo amukeleka ni kutsakisa Txizimu.

Vahebheru 8:3

Nguko, mphaxeli wa hombe, wuhi ni wuhi, a veketwe kasiku e maha miningelo ni timhamba. Ngu toneto, ta laveka ti to nene mphaxeli e va ni txilo txa kuningela.

Mitengo 7:21

ni dirole da matune, ni hamba, ni txinvutana txa dilembe dimwedo, kasi kumaha mphaxo wa kuhiswa;

Dhewuteronome 27:6

Ngu marigwi o mbi khwekhwetwa u na ya aka txiluvelo txa Mkoma, Txizimu txako; se txitimwi ka txona u na ningela mphaxo wo hiswa ka Mkoma, Txizimu txako.