Vaefesu 4:1 - Bhiblia Yo Sawuleka

¹ Na mi khongotela koko ani txibotxhwa txa Mkoma, ti to mi hanya ngu nzila yi yi fanelako wukholwa wu mi nga dhanelwa wona,

Vaefesu 4:1 Referans Kwoze

Vakolosa 1:10

ti to mi txi tsimbila ngu tifanelo ti ti lavekako masoni ka Mkoma, mi txi mtsakisa ka totshe timhaka, mi txi veka mihando ngu kuthuma mithumo ya yinene, mi txi kula amu ka kuziva Txizimu,

Vafilipiya 1:27

Kambe khutalani kuhanya dwe ngu tifanelo ta Evhangeli ya Kristu, kasiku, mwendo nata ni ta mi wona, mwendo ni maneka kule ni nanu, ni na engisa ti to mi ngadi tsanisilwe ngu moya wumwewo, mi lwa kumweko mi di tshanganisilwe ngu moya wumwewo, kulwela likholo la Evhangeli,

1 Vatesalonika 2:12

Ngu toneto, nanathu hi nga ti mi gondisa tona, ni ku mi tsanisa, ni kukhongotela mmweyo ni mmweyo wanu, kasiku mi tsimbila ngu fanelo masoni ka Txizimu, atxi txi nga mi dhanela ka mfumo wa txona ni kupfaliswa ka txona.

2 Pedro 1:3

Mtamo wa wuzimu wakwe wu hi ningile sotshe si si lavekako ka wutomi ni wukhongeli ngu ku hi ninga kateko ya kuziva awule a nga hi dhana, ngu kupfaliswa kwakwe ni mtamo wakwe;

2 Timoti 1:9

atxi txi nga hi hanyisa, txi hi dhana ngu madhanelo o sawuleka; txi hi dhani i si nga ngu mhaka ya mithumo yathu, aniko ngu mhaka ya kuranda ka makungo a mbilu ya txona ni kateko ya txona. Hi ningilwe kateko yiya ngu ka Kristu Jesu, ti sinzi ku va ho timbimo.

1 Vakorinto 4:16

Ngu toneto, na mi kombela ti to mi va vaeteteli vangu.

2 Vatesalonika 1:11

Ha mi kombelela yotshe mbimo, ti to Txizimu txathu txi txi mi maha ava va fanelwako ngu wutomi wu txi nga mi dhanela wona, txi txi thuma ngu mtamo wa txona ti to yotshe mixuvo yanu ya yinene yi txi tatiseka ngu kuenela, ni mthumo wa likholo lanu.

Vaefesu 4:17

Ndiye mhaka yi ni mi gelako, na ni txi yi tsanisa ngu ditina da Mkoma: Mi nga tshumeleni kambe mi hanya nga vamatiko, avava va londetelako mipimiso yawe yo biha.

Genesisi 17:1

Mbimo yi Abramu a nga va ni tanga ya mtxhanu ni mune wa magumi ni mtxhanu ni mune a malembe, Mkoma a to humelela masoni kwakwe, a txi khene: “Ani ni Txizimu txa Mtamo-Wotshe, u fanete kuhanya masoni kwangu, u txi ni engisa ngu kuhetiseka.

Varoma 12:1

Na mi khongotela koko vanathu ngu wumbilu wa Txizimu, ti to mi ningela mimidi yanu, yi maha mhamba ya kuhanya ni ya kusawuleka, ayi yi tsakisako Txizimu, i kuwona mphaxo wu wu lavekako.

Vakolosa 2:6

Ngu toneto, kufana ni ku mi nga amukela Mkoma Kristu Jesu, hanyani mi di txilo tximwetxo nayo;

1 Pedro 3:9

Mi nga tshumeteleni wubihi ngu wubihi, hambi txiruko ngu txiruko, aniko, kukatekisa nguko ngu toneto mi nga dhanelwa tona, kasi ku mi txi maha vadyi va thomba ya kateko.

2 Vakorinto 6:1

Se athu hi thumisanako ni Txizimu, ha mi khongotela kasi ku mi si amukeli walo kateko ya txona.

2 Johani 1:5

Se konkuwa, awe khosikazi, na ku kombela, i si nga ti to no kubhalela txirumo txa txiphya, aniko ni womba ti hi nga rumwa kukhukhela makhatoni: Ti to hotshe hi randana.

1 Pedro 5:10

Se Txizimu txa makatekwa otshe, txi nga mi dhanela kupfaliswa ka txona ko mbi guma, ngu ka Jesu Kristu, msana ka kuxaniseka ngu mbimo ya yidotho, txi na mi wusa ni ku mi aka, ni ku mi tsanisa, mi si xulwi ngu txilo.

1 Pedro 2:11

Na mi kombela, vo randeka ngutu, nga vaendi ni valuveli ditikoni muwa, mi leka kutiningetetela ka minavelo ya mmidi, ayi yilwako ni moya yotshe mbimo.

Vahebheru 13:21

Mkoma wathu Jesu, txi na mi longisele sotshe si i ku sa sinene, kasi ku si mi vhuna kumaha kuranda ka txona; txona Txizimu txi na thume kwathu ati ti txi tsakisako, ngu Jesu Kristu, awu a fanelako kupfaliswa ngu malembe ni malembe.

Vafilipiya 3:14

ni tsimbilisa kuya magwito, kala kuya mana txhatxhazelo ya kuxula, ayi ni dhanelwako yona nzumani ngu Txizimu, ditinani ka Kristu Jesu.

Vaefesu 5:2

Se tsimbilani ngu lirando, kufana ni Kristu, na nanu vanani ni lirando, nguko Ene a mi randile. Ene a ti ningete apune ngu kota yathu, a txi ti maha gandelo ni mhamba yo bhumula ya kutsakisa Txizimu.

Vaefesu 4:4

Ku ni mmidi wumwewo ni moya wumwewo, kota nga ti i ku txithembo tximwetxo, atxiya nanu mi nga dhanelwa txona.

Vaefesu 3:1

Ngu konaho, ani Paulo ni maneka ku khotelwani ngu mhaka ya Jesu Kristu, kufela kuvhuna anu vamatiko,

Vagalatiya 4:12

Na mi khongotela, vanathu, ti to mi fana ni nani, kufana ni kuwa nani ni nga phinduka ni txi fanana ni nanu. Kha ma ni onhela ngu ta txilo.

Genesisi 5:24

Se Enoki a tsimbite kumweko ni Txizimu; se kha wonwa kambe aniko, Txizimu txi ti tekete ene.

Vahebheru 3:1

Ngu toneto, vanathu va vakusawuleka, anu mi nga mana txihiwa txa kudhanwa ngu Txizimu: Alakanyani Jesu, mpostoli ni Mphaxeli wa Hombe wa kukholwa kwathu.

2 Vakorinto 10:1

Ani, Paulo ngu wutumbu wangu, na mi khongotela ngu kudikha, ni wunene wa Kristu, ani ni ti vekako hahatshi masoni kwanu, kambe ni mahako wurena ni di kule ni nanu.

Jeremiya 38:20

Jeremiya a to khene: Kha va na mbi kuningela; hi nga engisa dipswi da Mkoma, adi ni ku gelako dona; u na zumbiseka u hanya.

Titosi 2:10

si si thuki si pa, aniko, si na mahe mithumo yi yi kombako kuthembeka ka kuhetiseka, si ninga lisima, ngu mahanyelo oneyo, ka gondo ya Txizimu, Muhanyisi wathu.

Vakolosa 4:12

Wa mi dingula Epafrasi, i ku mmweyo wanu, txithumi txa Kristu Jesu, txi lwako yotshe mbimo ngu nganu mikombeloni kwakwe, kasiku mi zumba mi di va kuhetiseka, mi di va kutsana amu ka kumaha totshe ti Txizimu txi ti randako.

2 Vakorinto 5:20

Athu hi sirumwa sa Kristu, Txizimu ngu txona txi mi layako ngu ngathu. Ngu toneto, ha mi khongotela ngu ditina da Kristu: Kombelani divalelo ka Txizimu.

Mithumo 9:31

Hambi keto, Dibanza di ti ni kuthutha ka dotshe ditiko da Judheya ni da Galileya ni da Samariya, di txi kula, di txi hanya ngu kuxonipha Mkoma, di txi anda ngu kuvhunetelwa ngu Moya wo Sawuleka.

Varoma 11:29

Kasi siningo sa Txizimu ni kudhanwa ngu txona kha si na kutshumelela msana.

Vaefesu 2:10

Nguko athu hi mthumo wa kuhuma manzani ka Txizimu txi nga hi va nga ngu ka Kristu Jesu ngu mhaka ya mithumo ya yinene yi Txizimu txi nga hi sikela ngu kale, kasiku hi yi maha.