Titosi 3:14 - Bhiblia Yo Sawuleka

¹⁴ Votshe va ka kwathu va fanete kugonda kukhutalela mithumo ya yinene, kasi kuvhuna amu si pwatekako ngutu, va si mahi sifule so mbi veka mihando.

Titosi 3:14 Referans Kwoze

Vakolosa 1:10

ti to mi txi tsimbila ngu tifanelo ti ti lavekako masoni ka Mkoma, mi txi mtsakisa ka totshe timhaka, mi txi veka mihando ngu kuthuma mithumo ya yinene, mi txi kula amu ka kuziva Txizimu,

Titosi 3:8

Di thembekile dipswi diya. Nanani ni lava ku u sunamisa kugondisa mhaka yiya, ti to avale va kholwako ka Txizimu va na khutala amu ka mithumo ya yinene. Atiya tina ni lisima kambe ta vhuna vathu.

Vafilipiya 1:11

mi txi pfunelwa ngu mihando yo lulama, yi tako ngu ka Jesu Kristu, kasiku Txizimu txi pfaliswa ni kudhumiswa.

Matewu 7:19

Mndonga wuhi ni wuhi wu si velekiko mihando ya yinene, wu na gangwa wu vinzwa ha mndiloni.

2 Pedro 1:8

Nguko, yotshe mitamo yiya, yi txi maneka kwanu ngu kutala ka yona, kha yi na mbi mi leka mi di mikara mwendo sifule amu ka kuziva Jesu Kristu Mkoma wathu.

Vafilipiya 4:17

Hi nga ti to no vilela kuhiwa, aniko ni vilela ni m'hando wu wu no mi ninga dibhindu.

Vaefesu 4:28

Awu a nga ti hanya ngu kupa, a nge ngadi e pa, aniko a na ti thumele ngu manza akwe, e maha ti i ku ta tinene, kasiku e mana sa kuabana ni wu a ku si nga naso.

Johani 15:16

Hi nga anu mi nga ni sawula, ani ngani ni nga mi sawula, ni txi mi rumela ti to mi ya veleka mihando, se mihando yanu yi txi zumba, kasiku, txihi ni txihi mi no kombela ngu ditina dangu, Tate a na mi ninga.

Johani 15:8

Tate wangu a na dhumiswa, ngako mi txi veleka mihando yo tala, mi maha vagondiswa vangu.”

2 Vatesalonika 3:8

Hagari kwanu, kha ha hanyisa wukara, kambe kha ha dya sakudya sa m'thu mahala, aniko hi thumile wusiku ni mitshikari, ngu kukhutala ni kukarateka, kasiku hi si nemeti ni wammweyo kwanu.

Mithumo 20:35

Ngu totshe tinzila, ni mi kombisile tito, ngu kuthumisa tiya, hi fanela kuvhuna ava i ku sisiwana, na hi txi alakanya mapswi a Mkoma Jesu, a nga khene: ‘Kuha i kateko ya hombe ngutu kupinda kuhiwa.’ ”

Matewu 21:19

Se a to wona mkuwu hafuhi ni nzila, a txi wu tshuketela, aniko kha mana txilo ka wona, hahanze ka mazokoro. Konaho, a to womba, a txi khene: “Yi nge ngadi yi velekwa mihando kwako!” Se kunukunuko mkuwu wu so oma.

Mithumo 18:3

Se ngako i nga ti wa mthumo wumwewo navo, va ti ni mthumo wa kuluka matenda, a to zumba navo a txi thuma.

Isaya 61:3

ni kurumete ka votshe vale va dilako Siyoni, kasi ku va sanzeka m'bhoti wukhaloni ka dikhuma, ni ku va tota mafura a kutsaka wukhaloni ka kudila, ni ku va ambeka wudhumo hahanze ka moya wo xupheka, kasi kuve dhanwa ku mindonga ya kululama, yi nga phaywa ngu Mkoma, kasi ku e mana kudhumiswa.

1 Vatesalonika 2:9

Alakanyani, vanathu, mithumo yathu ni mikaralo yathu! Hi thumile wusiku ni mitshikari kufela ku hi si nemeti ni mmweyo wanu, mbimo yi hi nga ti txhumayela Evhangeli ya Txizimu hagari kwanu.

Varoma 15:28

Ngako ni di hetile tiya, na se ni di ningete ngu mlayo manzani kwawe msengo wuwa, ni na pinda ngu kwanu, ni txi ya Espanya.

Varoma 12:13

Vhunetani vasawuleki ka si va si pwatako, mi txi amukela vapfhumba ngu manza mambidi.

Vafilipiya 4:16

Nguko hambi ku ni nga ti Tesalonika, mi ni rumete so ni vhuna ka si ni nga txi si pwata, i si nga kumweko dwe.

Titosi 2:8

thumisa dipswi da dinene, adiya di ku si nga ni dikhwiti, di si sikotiko kukambulwa, kasiku mlala, ngako asi mani txilo txo soleka kwathu, a na wiswa tingana.