Sidilo 2:21 - Bhiblia Yo Sawuleka

²¹ Mazambi ni vathu vahombe va mwalate, ha lithuluni ka magondo. Majaha ni votuma vangu, va datwe ngu matxhari. Ditshiku dile u nga ti henyile, u txi dayela u si divaleli.

Sidilo 2:21 Referans Kwoze

2 Makronika 36:17

Nguko a to va rumela mfumeli wa va Kaldheya, awule a nga daya majaha awe ngu ditxhari, nyumbani kwakwe ko sawuleka, kha pfela wusiwana, majaha, hambi mahorana, ni sikosana, votshe a to va ningela manzani kwakwe.

Zakariya 11:6

Kha ditshuri kha ni na mbi ngadi ni pfela wusiwana vahanyi va ditiko diya, kuwomba Mkoma, aniko wona taku ni na ningela vathu, mmwani ni mmwani manzani ka mkwawe, ni ka dianza da mfumeli wakwe; vona va na onhetela mafu, kambe kha ni na mbi va txhatxhisa manzani kwawe.

Sidilo 3:43

Ha kupandisekani kwako, u hi baramete, u txi hi tovelisela ni ku hi dayela u si divaleli.

Jeremiya 13:14

Ni na va phwatisa ve gumulana, vatate ni vanana, kuwomba Mkoma. Kha ni na mbi va divalela, hambi ku va tsetsa. Kha ni na mbi va ni wumbilu ha ka ku ni si va lovisi.

Sidilo 2:17

Mkoma Txizimu a hetisile makungo akwe, a mahile ngu ha a nga womba ngu kona; a kha hindula makungo akwe a kale. A hasute, asi divaleli, a tsakisile valala ngu kuwa kwako a txi va engetela mtamo.

Sidilo 2:2

Mkoma a khundumusete yotshe miti ya va ka Jakobe, kha yi pfela wusiwana; kupandisekani kwakwe a khundumusete mikhokhola ya mwanana wa dihorana wa Judha; a txi yi wisa hahatshi; a onhetete wukoma ni vafumeli va kona.

Sidilo 1:15

Mkoma a txhipisile totshe tindena tangu hagari kwangu; a sengeletile vathu vo talwa ni majaha angu a ni kandetete a txi nga o suka mauvha ha libangani, ani ni ku dihorana da Judha.

Jeremiya 18:21

Ngu konaho ningela vanana vawe nzalani, u va henjeleta kudawani ngu ditxhari; vasikati vawe va na felwe ngu vanana, ni kuva tinoni. Vamna vawe va na dawe ngu mtungu, ni mazambi awe ma na dawe ngu ditxhari kulwani.

Amosi 4:10

Ni rumete mtungu kutalwa ni nanu, ku nga va Egipta: Majaha anu ni ma date ngu ditxhari, mahantxhi anu ni malekile me tekwa, kununga ka mabutho anu, ni ku kwetile tithonvuni kwanu; aniko kha ma hundulukela kwangu, kuwombile Mkoma.

Ezekhiyele 9:10

Kwangu koko, ngu dangu didhawa, diso dangu kha di na mbi tsetsa, kambe kha ni na mbi maha wumbilu; mithumo yawe yo biha yi na wa txitimwi ka misungo yawe.

Ezekhiyele 8:18

Ngu kumaha keto, nani ni na va henyela; diso dangu kha di na mbi va tsetsa, kambe kha ni na mbi va ni wumbilu; hambi va txo kwangula tinzeveni kwangu ngu dipswi da hombe, kha ni na mbi va engisa.

Ezekhiyele 7:9

Se diso dangu kha di na mbi kutsetsa, kambe kha ni na mbi va ni wumbilu; madingano ni tinzila tako, ngu kumaha keto, ni na kunemetisela, manyala ako ma nava txitimwi kwako; se mi na tiziva taku ani Mkoma na tsayisa.

Ezekhiyele 7:4

Diso dangu kha di na mbi kutsetsa, kambe kha ni na mbi va ni wumbilu ni nawe, aniko ni na kutsayisa madingano ni dihanyo dako do biha, manyala ako ma nava hagari kwako; se mi na tiziva ti to ani ngani Mkoma.

Ezekhiyele 5:11

Ngu kumaha keto, ni xambanya ngu kuhanya kwangu, kuwomba Mkoma Txizimu, nguko u nyenyezisile wukhalo wangu wo sawuleka, ngu totshe ta kwa mbi tumeleka, ni otshe manyala ako, kambe ni na kuhungula, diso dangu kha di na mbi kudivalela, hambi ni ku kupfela.

Sidilo 1:18

“Mkoma a lulamile, nguko ani koko ni eyisile milayo yakwe; engisani koko anu motshenu, vathu, mi txi wona kupandiseka kwangu; votuma vangu ni majaha angu va tsute wukhumbini.

Jeremiya 51:22

kambe kumweko ni nawe ni na phatulela wamwamna ni wamsikati; kambe kumweko ni nawe ni na phatulela wo kumba ni wamphya; kambe kumweko ni nawe ni na phatulela dijaha ni dihorana;

Jeremiya 21:7

Se msana keto, kuwomba Mkoma, ni na ningela Zedhekiya, mfumeli wa ka Judha, ni maxonga akwe, kumweko ni vathuvo va no maneka va di hulukile mtungu, ka didhoropa diya, ni txi va ningela manzani ka Nebhukodhonosori, mfumeli wa Bhabhilona, ni manzani ka valala vawe, ni ka va va xotako wutomi wawe. Ene a na va dayisa ngu ditxhari, kha na mbi va nyenyeletela, hambi ku va pfela, hambi ni kuva ni wumbilu ka vona.

Jeremiya 11:22

Ina, Mkoma wa Mabutho a Tiyimbi, a khene: Ni na va tsayisa; majaha ma na dawa ngu ditxhari; vanana vawe va txiwamna ni va txisikati va na fa ngu nzala.

Jeremiya 9:21

Nguko kufa kukwete ngu mafasitela athu, kuwulete tinyumbani kwathu ka wukoma; kudaya vanana tiruwani ni mazambi sidingeni.

Jeremiya 6:11

Ngu konaho, ni taletwe ngu kuhenya ka Mkoma. Ni karate ngu ku ti ñola. Tshakunuta kuhenya txitimwi ka vanana amu tinzilani ka hombe, ni txitimwi ka tisengeletano ta majaha, mwamna ni msikati va na ñolwa kumweko, txikosana ni wule a nga talelwa ngu masiku.

Isaya 27:11

Mbimo yile madhavi a kona ma no oma, ma na funywa; vavasikati va nata ma dhivela, nguko vathu vava, hi nga vathu vo pfisisa; ngu toneto, wule a nga m'va nga kha na mbi mpfela wusiwana, ni wule a nga muwumba, kha na mbi va mahela wumbilu.

Esteri 3:13

Se mapapilo me rumelwa ngu dianza da sirumwa ka otshe matiko a mfumeli, kasi kuxasela ni kudayela votshe Vajudha, kukhukhela ka mfana kala ka txikosana, vanana ni vavasikati ngu ditshiku dimwedo, da digumi ni mararu ka mtxima wa wugumi ni yimbidi (i ku mtxima wa Adhari), ve handa ni tithomba ta kona.

1 Samuwele 15:3

Tsula koko, konkuwa, u ya xasela Vaamaleki, u onhetela sotshe si va ku naso, u nga vatsetse; aniko u na daya vavamna ni vavasikati, vafana ni vanana va ha tshumbuni, tihomu ni tinvuta, makamelu ni timbongola.

Joxuwa 6:21

Se va to lovisa ngu ditxhari sotshe si si nga ti ti ho didhoropani, kukhukhela ka wamwamna, wamsikati, mfana, txikosana, tihomu, sifuyo sa sidotho, ni timbongola.

Dhewuteronome 28:50

Awule mfumo wu ku ni khohe yo banga, awule wu si tsetsiko vale i ku vo kumba, mfumo wu wu si tsetsiko vanana.

Dhewuteronome 32:25

Hahanze va na dawa ngu ditxhari, nyumbani va na dawa ngu dizowa; votshe va na fuva: Mazambi ni mahorana, vanana vo mama, hambi ni vo kumba va tinvi.

Sidilo 1:4

Tinzila ta Siyoni ta dila nguko kha nga ho wu a tako ha msengeletanoni ka habanza; sike sakwe sotshe si savatisilwe vaphaxeli vakwe vatilaya; votuma vakwe va pandisekile, ni nene apune a ni kupandiseka.

Amosi 8:13

Ditshiku dileya, mahorana ni mazambi o tutuma ma na tsivala ngu ditora.

Jeremiya 4:31

Nguko napfa dipswi do fana ni da wamsikati a lumwako, na di txi dikwila nga wamsikati wo tiwula. Dipswi da m'horana wa Siyoni, a hefemutekako ni kunawuluta manza akwe, a txi khene: “Yowe, dikhombo dangu koko! Moya wangu wa tsivala masoni ka sidayi.”

Jeremiya 9:20

Anu vavasikati, hi nga pfani mhaka ya Mkoma, ni tinzeve tanu ti na amukele dipswi da txisofu txakwe. Gondisani txidilo ka vanana vanu va txisikati, mmweyo ni mmweyo e gondisa lisima la txidilo.

Ezekhiyele 24:21

I nda khawe ka nyumba ya ka Israyeli: Mkoma Txizimu a khene: Wonani taku ni na nyenyezisa nyumba yangu yo swuleka, i ku wudhumo wa kutsaniswa kwanu, ni kunavela ka maso anu, ni kutsaka ka mihefemulo yanu; se vanana vanu va mazambi ni vamahorana vale mi nga va siya, va na dawa ngu ditxhari.