Sidilo 2:19 - Bhiblia Yo Sawuleka

¹⁹ Wuka, u peka nyandayeyo, u dila kukhatani ka sigava sa mikombelo ya wusiku, tshakunuta sotshe si si ku mbiluni kwako. U txi si humisa kubasani, masoni ka nyamne wa sotshe. Guleta mawoko ako kwakwe, u txi phaxela vanana vako, ava vafako ngu nzala sidingeni ka otshe magondo.

Sidilo 2:19 Referans Kwoze

Masalmo 62:8

Votshe va na themba txona Txizimu yotshe mbimo va txi txi dhumisa ngu yotshe mbilu! Txizimu mbuthavelo wathu!

Isaya 26:9

Ngu muhefemulo wangu ni ku lavile ni wusiku, se ngu moya wangu wu ku mndani kwangu, ni na phindula ni kulava, nguko, ku di ni wululami wako ha mafuni, vaaki va ha mafuni va gonda wululamo.

Masalmo 142:2

Ni tshakunuta txikarato txangu masoni kwakwe; ni mxawutela xomulo yangu:

Marku 1:35

Ni mixo, ku di ngadi phum, a to huma nyumbani eya ka wukhalo wa ekhalela, a txi ya khongela kona.

1 Samuwele 1:15

Aniko Ana a to xamula, a txi khene: Ahim-him nyamne wangu, ani ni wamsikati wo xaniseka moyani; kha na sela vhinya hambi sopa; kambe no tshakunuta dihika dangu masoni ka Mkoma.

Masalmo 141:2

Mkombelo wangu wu na fane ni dibaselo di di hiswako masoni kwako ni kuguletwa ka manza angu ku na fane ni mhamba ya minova.

Valamuli 7:19

Gidhiyoni a to hoka hale ka libhiyo la wugovelo, kumweko ni vathu vakwe va dizana. I ti ti mbimo ya kupilela dhina ya wusiku, na vawoneleli va di ngadi ku txitxana. Sekoko va to veta mipundu, va txi faya tidhuwa tile va nga ti ti nato manzani.

Masalmo 42:8

Aniko Mkoma a na ni rumela lirando lakwe, di di txite, kasiku ni txi m'dhumisa ngu lindando, di di swite, mkombelo ka Txizimu txi txi ni ningako wutomi.

Luka 6:12

Ka ale masiku Jesu a to ya mmangoni kuya khongela. Se e pila wusiku wotshe a txi khongela ka Txizimu.

Marku 13:35

Ngu toneto, ti woneleni, nguko kha mi yi zivi mbimo yi a no wuya ngu yona nyamne wa m'ti, mwendo ni minova, mwendo ni hagari ka wusiku, mwendo mbimo yi wu embako mkuku, mwendo ni mixo.

Matewu 14:25

Ngu txikhati txa wumune txa kupilela, Jesu a to va yela, na a txi tsimbila ngu txitimwi ka mati.

Masalmo 119:55

Ni wusiku, na kualakanya, Mkoma, kasiku ni xayisa mlayo wako.

Masalmo 28:2

Engisa mikombelo yangu, ngako ni txi kudhana, nga ti ni txi guleta manza angu, ni txi ma yisa nyumbani kwako ko sawuleka.

Isaya 51:20

Vanana vako va tsivate, va otete mahandakanyani ka totshe tinzila, kufana ni timhuti amu ka milawu; sekoko va tate ngu kuhenya ka Mkoma ni kukawuka ka Txizimu txako.

1 Timoti 2:8

Ngu toneto, ni lava ti to votshe vathu ve khongela ka otshe makhalo, ve guleta manza o sawuleka, va si nga ni txiviti mwendo mazunga,

Ezekhiyele 5:16

Mbimo yi ni no va rumela miseve ya nzala yo thisa, ni va lwisa kasi ku va fuvisa, ayi ni no yi rumela kasi ku mi fuvisa, sekoko ni na engetela nzala txitimwi kwanu, kambe ni na mi keleta dipawu.

Ezekhiyele 5:10

Ngu kumaha keto, vatate va na dya vanana vawe hagari kwanu, ni vanana va na dya vatate vawe; se ni na maha wulamuli wangu kwako, votshe vale va no sala, ni na va hangalasa ka otshe madhawa.

Masalmo 134:2

Gulani manza anu, nyumbani ko sawuleka, mi dhumisa Mkoma!

Masalmo 63:4

ni na ku bonga otshe masiku a kuhanya kwangu; ni na guleta manza angu me komba kwako ngako ni txi khongela.

Jobe 3:24

Nguko ni sanzi kudya dipawu dangu, kuta kukarateka kwangu; tihuwa tangu ti maha ngu kuthekela nga mati.

1 Samuwele 7:6

Se va to sengeletana kona Misipa, ve reka mati ve ma theletela masoni ka Mkoma, kambe ka ditshiku donedo va to titona kudya, va txi kha vona: Hi onhete Mkoma. Se Samuwele a to lamula vanana va ka Israyeli kona Misipa.

Nahume 3:10

Hambi keto, dona di tekilwe di tsula wukhumbini; vanana va dona va phatuletwe amu ka totshe tinzila ta hombe, se txitimwi ka vathaviseki vawe va to xaxuva tixolo, ni votshe vahombe vawe va sungilwe ngu titxhini.

Masalmo 42:3

Kudila mirongo, ngumba sakudya si ni dyako wusiku ni mitshikari, nguko ditshiku ni ditshiku va ni wotisa va txi kha vona: “Txi hani Txizimu txako kani?”

Masalmo 42:4

Moya wangu wa dhudhumela, ngako ni txi alakanya, mbimo yi ni nga ti longoloka ni vale va nga ti ya Nyumbani ka Mkoma va txi peka mikulungwani ya kutsaka ni kubonga, ni kugiringa ka vathu va kutsaka.

Masalmo 142:3

“Ngako moya wangu wu txi guma mtamo, awe Mkoma, wa yi ziva nzila yi ni fanelako kuteka yona. Ka nzila yi ni nga txi tsimbila ngu yona, va ni riyete ngu mlawu.

Jeremiya 9:20

Anu vavasikati, hi nga pfani mhaka ya Mkoma, ni tinzeve tanu ti na amukele dipswi da txisofu txakwe. Gondisani txidilo ka vanana vanu va txisikati, mmweyo ni mmweyo e gondisa lisima la txidilo.

Jeremiya 14:18

Nguko ni txi ya wona thembweni vaho va va nga dayiswa ngu ditxhari. Ni ku ngako ni txi wulela m'tini ni wona va va fako ngu nzala: Ina ngu wumbidi wawe mprofeti ni mphaxeli va zungulukela na va si kuzivi aha vayako kona.

Mika 1:16

Ti mahele lipala, u yola misisi, ngu mhaka ya vanana vako vo tsakisa; kulisa lipala lako kufana ni digama, nguko va tekilwe kwako ve yiswa wukhumbini.