Nehemiya 9:6 - Bhiblia Yo Sawuleka

⁶ Awe ngawe wekha u ku Mkoma, ngawe u nga maha nzuma, nzuma ya tinzuma ni dotshe dibutho da yona, mafu ni sotshe si si ku ka ona, ni minambo ni sotshe si si ku ka yona; sotshe ngawe u si hanyisako, ni dibutho da nzumani da kukhozela.

Nehemiya 9:6 Referans Kwoze

Isaya 37:16

O Mkoma wa Mabutho a Tiyimbi, Txizimu txa ka Israyeli, awe u zumbako hagari ka Makerubhima; ngawe u ku Txizimu, awe wekha, ka yotshe mifumo ya ha mafuni; awe u vangile nzuma ni mafu.

Genesisi 1:1

Kukhatani Txizimu txi vangile nzuma ni mafu.

Mtuletelo 4:11

Ngawe u ku ni fanelo, Mkoma Txizimu txathu, Ya kuamukela kupfaliswa, wudhumo ni mtamo, Nguko ngawe u nga va nga sotshe simaha; Se ngu kuranda kwako, sona si tumbulukile, si mana kuhanya.

Dhewuteronome 10:14

Wona nzuma ni nzuma ya tinzuma, si lumba Mkoma, Txizimu txako, kumweko ni mafu ni sotshe si si kuho ka ona.

Dhewuteronome 6:4

Engisa awe Israyeli, Mkoma, Txizimu txathu, Mkoma mmweyo dwe.

Isaya 44:8

Mi nga thaveni, kambe mi nga dhudhumeleni, ina kha na mi maha mi tiengisa, niku kha na mi zivisa kani? Nguko anu mi tifakazi tangu. Ina txiho tximwani Txizimu hahanze kwangu kani? Ahim-him! Kha ku nga ni dimwani Dirigwi, ni di zivako.

Isaya 44:6

Mkoma, Mfumeli wa Israyeli, i ku Mtiruli wakwe, Mkoma wa Mabutho a Tiyimbi, a khene: Ani ngani wo khata, kambe ngani wo gwita, hahanze kwangu, kha ku nga ni Txizimu.

2 Vafumeli 19:15

A to khongela masoni ka Mkoma a txi khene: Awe Mkoma, Txizimu txa ka Israyeli, u zumbako hagari ka Makerubhima, awe upune ngawe wekha u ku Txizimu txa yotshe mifumo ya ha mafuni; awe u vangile tinzuma ni mafu.

Genesisi 2:1

Wu gwitisile tiya mthumo wa kuvangwa ka nzuma ni mafu, ni sotshe si si nga tumbulukiswa.

Isaya 43:10

Anu mi tifakazi tangu, kuwomba Mkoma; txithumi txangu txile ni nga txi sawula; kasi ku mi na tiziva, mi kholwa kwangu, ni ti to mi pfisisa taku ani ngani nipune, ni ti to hahanze kwangu kha ku khali ku va ho tximwani txizimu, ni msana kwangu kha ku na mbi vaho tximwani Txizimu.

Mtuletelo 14:7

Yona yi ti womba-womba ngu dipswi da hombe, yi txi kha yona: “Thavani Txizimu mi txi pfalisa, nguko txi hokile txikhati txa kulamula ka txona; khozelani awule a nga maha nzuma ni mafu, linene ni sisima.”

Masalmo 36:6

Kululama kwako nga hombe kufana ni mimango; mithetho yako yi etile kufana ni linene. Awe, Mkoma, wa xayisa vathu ni sihari.

1 Vafumeli 8:27

I na ngu ditshuri txi ndi na zumba Txizimu ha mafuni kani? Wona taku tinzuma kala ka nzuma ya tinzuma kha ti sikoti ku u enela ka tona, se ngutu-ngutu nyumba yiya ni nga yi aka.

Vahebheru 1:3

Ene, ngako i ku liwoningo la wudhumo wa Txizimu, ni txikombiso txa wudhumo wa txona, awu a hiketako sotshe simaha ngu mtamo wa dipswi dakwe, msana ka kuva a di gwitile kukuwula sionho, a ti ya zumba txineneni ka wuhombe wa Nyatxitimwi nzumani

Vahebheru 1:6

Na kambe, ngako Txizimu txi rumela Mwanana wa txona ha mafuni txi ti kha txona: “Totshe tingelozi ta Txizimu ti na mkhozele.”

Isaya 37:20

Konkuwa koko awe Mkoma, Txizimu txathu, hi txhatxhise manzani kwawe, kasi ku yotshe mifumo ya ha mafuni, yi tiziva tito, ngawe dwe u ku Mkoma.

Masalmo 86:10

Nguko ngawe wekha u ku Txizimu! Ngawe u ku wa hombe, u mahako sidiwukiso!

2 Vafumeli 19:19

Konkuwa koko, awe Mkoma, Txizimu txathu, thumelwa ngu kuva u di hi txhatxhisile, ngu kumaha keto, yotshe mifumo ya ha mafuni yi na tiziva ti to ngawe wekha u Mkoma Txizimu.

Ezekhiyele 20:11

Ni va ningile sileleto sangu, ni ku va komba milayo yangu, ngako m'thu a txi si londeta, a na hanya ngu sona.

Masalmo 146:6

a nga va nga tinzuma ni mafu, linene ni sotshe si si kuho ka sona, kambe a xayisako ditshuri kala kupinduka;

Masalmo 103:21

Dhumisani Mkoma anu mabutho a nzumani, anu sithumi sakwe mi mahako kuranda kwakwe!

Masalmo 33:6

Ngu dipswi da Mkoma; ku vangilwe nzuma ni sotshe sasingi sikuho ngu moya wa txisofu txakwe.

1 Vafumeli 22:19

Sekoko Mikaya a to khene: Engisa koko dipswi da Mkoma: Ni woni Mkoma a di khahatshile ka txikhalo txakwe txa wukoma, kambe dotshe dibutho da nzumani, di ti hafuhi ni nene, ngu didhawa kwakwe ka txinene, ni didhawa kwakwe ka txibhabha.

Johani 10:30

Ani ni Tate hi mmweyo.”

Genesisi 32:2

Mbimo yi Jakobe a nga ti wona a ti khene: “Ndide dibutho da Txizimu!” Wukhalo wuwa a to wu raya ditina daku i Mahanayime.

Mithumo 4:24

Vona ngako va di engisile toneto, va to guleta mapswi awe ka Txizimu ngu mbilu yimweyo va txi kha vona: “Mkoma, ngawe u nga maha nzuma ni mafu ni linene ni sotshe si si ku ka sona;

Nehemiya 9:5

Sekoko Valevhi, ni Jesuwa, ni Kadhimiyeli, ni Bhani, ni Hasabhineya, ni Serebhiya, ni Hodhiya, ni Sebhaniya, ni Petaya va to kha vona: Khukhani mi dhumisa Mkoma, Txizimu txanu, yotshe mbimo! Mahani mkombelo, mi dhumisa ditina da wudhumo wakwe, di di ku txitimwi ka sotshe si si katekiswako ni kudhumiswa.

Masalmo 24:10

I mani ene Mkoma wuwa wa Wudhumo kani? Mkoma wa Mabutho a Tiyimbi; ene ngene Mkoma wa Wudhumo.

Masalmo 102:25

U mahile mafu kukhukhela makhatoni; ngawe upune u nga va nga tinzuma.

Masalmo 115:15

Mkoma, a nga va nga mafu, a na mi katekise, anu motshe!

Isaya 45:12

Ani ni vangile mafu, kambe ni vangile m'thu ka ona; ani ni m'vangile, manza angu ma nawulutile tinzuma, se ni otshe mabutho a kona ni ma ningile mlayo wangu.

Jona 1:9

Se ene a to va gela a txi khene: Ani ni Muhebheru, ni thava Mkoma, Txizimu txa nzumani, awu a nga maha linene ni mafu a kuoma.

Genesisi 1:9

Se Txizimu txi to kha txona: “Ma na sengeletane mati a hahatshi ka nzuma wukhalo wumwewo; kasi ku na maneka mtxhefa wa kuoma.” Se eto ti to maheka.

Dhewuteronome 32:39

Se konkuwa, wonisisani tito: Ani, ani ngani, kha txi nga ho tximwani txizimu kwangu; ani na daya, kambe na hanyisa. Ani na dayisa, kambe na holisa; kha nga ho a kuhulukako, manzani kwangu.

Masalmo 124:8

Txivhuno txathu txi ta ngu ka Mkoma, awu a nga maha nzuma ni mafu.

Jeremiya 32:17

O! Mkoma Txizimu! Ngawe u nga maha nzuma ni mafu ngu mtamo wako wa hombe ni diwoko dako di nga nawulutwa; kha ku na txilo txi tandako kwako: