Nehemiya 8:3 - Bhiblia Yo Sawuleka

³ Se a to di gonda a di masoni ka mtendela, wu wu ku masoni ka Txike txa Mati, kukhukhela ni mixo kala mitshikari, masoni ka vavamna, ni vavasikati ni titxhari; se tinzeve ta votshe vathu ti ti kuengisani ka dibhuku da Mlayo.

Nehemiya 8:3 Referans Kwoze

Mtuletelo 3:22

Awu a ku ni tinzeve a na engise ati Moya wu embelako Mabanza.”

Mtuletelo 2:29

Awule a ku ni tinzeve, a na engise ati Moya wu embelako Mabanza.”

1 Vatesalonika 2:13

Ngu toneto, nanathu ha bonga yotshe mbimo ka Txizimu, nguko msana ka kuva mi di amukete dipswi da Txizimu, adi hi nga txhumayela, mi di amukete kota nga dipswi da Txizimu mpela, i si nga ku di fananisa ni dipswi da kuhuma ka m'thu. Atiya ngu tona ti ti mi ningako mtamo anu mi kholwako.

Mithumo 28:23

Ngako va di mu vekete ditshiku, va to ta nyumbani kwakwe, i di vangi. Ka mapswi a kutxhamusela kwakwe, Paulo a ti fakaza ngu ta Mfumo wa Txizimu se kukhukhela ha mixo kala minova, a txi zama ku va kholwisa ngu ta Jesu, a txi va dinganisela ngu Mlayo wa Mosi ni Vaprofeti.

Mithumo 17:11

Vona va ti ni mialakanyo ya yinene kupinda ya Vatesalonika. Va amukete dipswi ngu yotshe mbilu. Ditshiku ni ditshiku va ti gonda dibhuku, kasi kuwonisisa ditshuri da totshe timhaka.

Mithumo 16:14

Se mmweyo wa wamsikati, awu a nga ti dhanwa ku i Lidhiya, mxavisi wa tinguwo ta masilika o bhilivila, wa kuta ngu Tiyatira, awu a nga ti ni txithavo ka Txizimu, a ti ti hi engisela; se Mkoma a to tula mbilu yakwe, kasiku e engisa mapswi awa Paulo a nga ti womba-womba ona.

Mithumo 15:21

Nguko kukhukhela ka timbimo ta kale, Mosi ana ni vagondisi ka otshe madhoropa, ava va gondako dibhuku da Milayo yakwe masinagogani, otshe masiku a Sabbata.”

Mithumo 13:27

Nguko ava va nga aka ditikoni ka Jerusalema, ni vathangeli vawe, ngako va nga mbi ti lava ku m'ziva Jesu, va mu abanisile, ve ninga kutatiseka ka mapswi a vaprofeti, aawa ma gondwako Sabbata ni Sabbata.

Mithumo 13:15

Msana ka kugondwa dibhuku da Mlayo ni Vaprofeti, vathangeli va disinagoga, va to rumela dipswi, va txi kha vona: “Vanathu, ngako mi di ni dipswi do laya vathu, mi ngadi womba.”

Luka 19:48

Aniko ve tandeka kumana nzila yo ti maha eto, nguko votshe vathu va ti namarete ka mapswi akwe, va txi mu engisa.

Luka 8:18

Ngu konaho, ti engiseni kha kwati ati ni mi gelako. Nguko awuwa a ku naso, a na engetelwa; aniko awu a ku si nga naso, a na tekelwa ni si a nga ti si themba ku a naso.”

Marku 12:37

Se akuwa Dhavhidha a m'dhanako ku i Mkoma, a nga va mwanakwe ngu ha ko txani kani?” Se dibutho di da hombe di ti mu engisa ngu kutsaka.

Mithumo 20:11

Se a to tshumela a txi kwela, a txi bhanda dipawu e dya: E womba-womba kambe ngu mbimo yo lapha, kala kuhuma wuronga. Konaho a to khukha e tsula.

Mithumo 20:7

Ka ditshiku do khata ka divhiki, hi ti tshanganile kasiku hi bhandelana dipawu. Paulo, awu a nga ti fanela kukhukha e tsula mangwanani ka kona, ene a ti ti bhula navo va Trowasi. A to laphisa kuwombawomba kwakwe navo, kuza kuya hoka dhina ya wusiku.

Nehemiya 8:1

Se ku di hokile mtxima wa wutxhanu ni yimbidi, vanana va ka Israyeli va di madhoropani kwawe, vathu votshe va to sengeletana ngu mbilu yimweyo, ka mtendela wu ku masoni ka Txike txa Mati; se ve gela mabhalani Ezra, ti to e neha dibhuku da Mlayo wa Mosi, a di Mkoma a nga ti ti leletete Israyeli.

Nehemiya 8:4

Se Ezra, mabhalani, a to ema txitimwi ka wurathu wa mapulango, va nga ti ti wu mahete mthumo wule. Hafuhi kwakwe ngu didhawa da txinene ku ti ti emile Matitiya, ni Xema, ni Anaya, ni Uriya, ni Hilikiya, ni Mahaseya; se ka didhawa da txibhabha ku ti ni Pedhaya, ni Mixayeli, ni Malikiya, Hasumi, ni Hasibhadhana, ni Zakariya, ni Mesulamu.

Nehemiya 8:5

Se Ezra a to tula dibhuku masoni ka votshe vathu; nguko a ti ti txitimwi ka votshe vathu; se mbimo yi a nga tula dibhuku, vathu votshe va to khukha va txi ema.

Dhewuteronome 31:9

Se Mosi a to bhala mlayo wuwa, e wu ningela ka vaphaxeli, vanana va Levhi, avale va nga ti rwala dibhokiso da txitumelelano txa Mkoma, kumweko ni otshe madhota a va ka Israyeli,

Joxuwa 8:35

Kha ka maneka ni dipswi ni da dimwedo, ka totshe tile Mosi a nga ti leletile, di nga mbi gondwa ngu Joxuwa masoni ka wotshe msengeletano wa ka Israyeli, ni ka vavasikati, ni ka vafana, ni ka valuveli vale va nga ti ti hagari kwawe.

Nehemiya 8:18

Se ditshiku ni ditshiku, a ti ti gonda dibhuku da Mlayo wa Txizimu, kukhukhela ditshiku do khata kala ka do gwita. Se va to maha m'buso wa mtxhanu wa masiku ni mambidi, ngu ditshiku da wutxhanu ni mararu, va to maha m'buso wo vhala, madingano ni kuruma ka mlayo.

Nehemiya 10:29

va to tsana ka vanawe, i ku vamwevo va tinduna hagari kwawe, ve tumelelana kufakazelana ni kuxambanya tito, va na tsimbila ngu Mlayo wa Txizimu va nga ningwa ngu tsisofu txa Mosi, txithumi txa Txizimu; ni ti to va na xayisa ni kumaha sotshe sirumo sa Mkoma, Txizimu txathu, ni wululamo wakwe, ni sileleto sakwe;

Nehemiya 13:1

Ka ditshiku dile, ku to gondwa mu ka dibhuku da Mosi, tinzeveni ka vathu; se ka dona ku to maneka taku, va ka Amoni ni va ka Mowabhi, va nga swe ve wulela ka msengeletano wa Txizimu,