Nehemiya 6:12 - Bhiblia Yo Sawuleka

¹² Se ni to pimisa ni wona ti taku, kha rumwa ngu Txizimu; aniko a to womba wuprofeti wo ni wukela, nguko a ti xavilwe ngu Tobhiya ni Sambalati.

Nehemiya 6:12 Referans Kwoze

Ezekhiyele 13:22

Nguko mi pandisile mbilu ya wo lulama ngu wukanyisi wanu, na ani ni sa mpandisekisa, kambe mi tsanisile manza a wa kubiha, kasi ku asi humi ka nzila yakwe yo biha a txi hanyiswa,

Mtuletelo 18:13

kinamoni, i ku mafura o bhumula, mira ni dibaselo, vhinya ni mtona, mpupu wa mafaka ni fulaho, tihomu ni tinvuta, mahantxhi ni sikotxikani, tikhumbi ni mimoya ya vathu.

2 Pedro 2:3

Se ngu mhaka ya timbiti tawe, va na lava mabhindu ngu nganu, ngu kuthumisa mawombawombelo a kukanganyisa. Aniko, kulamulwa kwawe i kale ku di lulamisilwe, ni kulova kwawe kha ku na mbi swela.

1 Pedro 5:2

Dyisani mtxhambi wa Txizimu, awu mi nga vekelwa, mi txi wu xayisa, i si nga ngu kukurumetwa, aniko, ti maheni ngu kuranda ka mbilu, i si nga ngu moya wa nzambwa ya kulava dibhindu; ti maheni ngu kutiningetetela ka mbilu;

Titosi 1:7

Mthangeli wa dibanza a fanete kuva a si nga ni txisolo, ngako i ku muwoneleli wa Txizimu; kulaveka i si nga wo tikulisa, a si nga ni txihenyisani, i si nga disela, i si nga muwusi wa mazunga, a si nga ni timbiti ta dibhindu do mbi lulama.

1 Timoti 3:3

i si nga disela mwendo m'thu wa mazunga, aniko a nave i di wo dikha, a si nga ni wukhuxu ni timbiti.

1 Vakorinto 12:10

mmwani a ningwa mtamo wa kumaha sidiwukiso; mmwani a ningwa kutxhumayela dipswi; mmwani a ningwa kuwona kuhambana ka mimoya; mmwani a ningwa kuwombawomba tidimi; mmwani nene a ningwa txihiwa txa ku ti txhamusela.

1 Vakorinto 2:15

Kasi m'thu wa Moya wa lamula ka totshe, kambe ene kha lamulwi ngu m'thu.

Mithumo 20:33

Kha na navela male ya silivhela mwendo ya nzalama, hambi syambalo sa m'thu;

Mika 3:11

Vathangeli vawe va wila mahungu ngu kuxawa, se vaphaxeli vawe va gondisa ngu kulava txokari, vaprofeti vawe va huta ngu kulava male; kambe va ngadi va txi khigela ka Mkoma, va txi kha vona: Ina kha ngaho Mkoma hagari kwathu kani? Kha hi na mbi telwa ngu to biha ni tatimweto.

Ezekhiyele 13:19

Anu mi ni poyite hagari ka vathu vangu, ngu sevhadha ya yidotho, ni sikhwemu sa mapawu, kasi kudaya mihefemulo yi yi nga si dingani kufa, ni kuxayisa mihefemulo yile yi nga si dingani kuhanya, mi womba makuhu ka vathu vangu, va engiselako makuhu.

Ezekhiyele 13:7

Mi nga woneni siwoniso sa kwa mbi yawula, kambe mi nga huteteleni ta makuhu mi txi khanu: Mkoma a wombile, na kuve to nga eto kha na womba.

Jeremiya 28:15

Mprofeti Jeremiya a to engeta e womba ka mprofeti Hananiya, a txi khene: Engisa-ka, Hananiya; Mkoma kha kuruma; aniko u maha ti taku vathu vava ve lumba makuhu.

Jeremiya 23:25

Ni pfite ti va wombako vaprofeti, ava va profetako makuhu ngu ditina dangu, va txi kha vona: Ni lorile, ni lorile!

Jeremiya 23:16

Mkoma wa Mabutho a Tiyimbi a khene: Mi nga engiseleni timhaka ta vaprofeti vava va profetako kwanu, nguko va mi kanganyisa; va txhumayela siwoniso sa timbilu tawe vapune, na si si humi ngu ka txisofu txa Mkoma.

Jeremiya 14:14

Mkoma a to ni xamula, a txi khene: Vaprofeti va profeta makuhu ngu ditina dangu; kha na va ruka, kha na va laya; kha na womba txilo kwawe. Va profeta kwangu siwoniso sa makuhu ni kuhuta, ta walo to divalisa timbilu tawe.

Isaya 56:11

Se timbwa tiya nda limito, kha ti na kukhura; vona mbadyisi vo mbi pima txilo; votshe va tshumelela tinzilani kwawe, mmweyo ni mmweyo ka matshanza akwe, mmweyo ni mmweyo ngu dakwe didhawa.

1 Johani 4:1

Vorandeka, mi nga kholweni ka yotshe mimoya, aniko, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko.

Nehemiya 6:11

Aniko ni to khani: M'thu wo fana ni nani a nga tutuma kani? I mani a kuho wo fana ni nani, a wulelako dithepeleni e hanya kani? Ngu mamahelo eyo, kha ni na mbi wulela.

Nehemiya 6:13

Ngu toneto, va to mxava, kasi ku e ni dhukisela, ni maha toneto, ni ku ni onha, ve mana mhaka yo ni tokometa ngu yona, ni ku ni xanisa.