Nehemiya 4:17 - Bhiblia Yo Sawuleka

¹⁷ Avale va nga ti aka diguma, ni vale va nga ti neha thundu, ni vale va nga ti rwalela, mmwani ni mmwani a ti thuma ngu dianza dimwedo, se dimwani di ti ñote matxhari.

Nehemiya 4:17 Referans Kwoze

2 Timoti 4:7

Ni lwite yimbi ya yinene, ni hetile mnava wa kututuma kwangu, ni veketile likholo.

2 Timoti 2:3

Nawe, xaniseka kumweko ni nani, nga disotxhwa da dinene da Jesu Kristu.

2 Vakorinto 6:7

ngu dipswi da ditshuri, ngu mtamo wa Txizimu, ngu matxhari a kululama hi ma ñolako ngu manza a txinene ni a txibhabha,

Vafilipiya 1:28

mi si thavi kudhukiselwa ngu valala, kasi eto, kha ditshuri ti kombisa ti to vona va ya kulovani, ani anu mi ya kuhanyiswani. Atiya ti ta ngu ka Txizimu,

1 Vakorinto 16:13

Wonelelani, mi zumba mi di tsani mu ka likholo, mi hanyisa txiwamna, mi va ni mtamo.

1 Vakorinto 16:9

nguko ahawa mthumo wangu wu tuletwe ditimba da hombe, na kasi valala mbavangi.

1 Vakorinto 9:12

Ngako vamwani va thathelako asi si ku kwanu, ina athu kha hi fanekelwi ka kupindisa kani? Aniko athu kha hi nzi ku yi thumisa faneloyo. Kambe hi zumba hi txi timisela ka totshe, ngu mhaka ya Evhangeli ya Kristu.

Dhaniyeli 9:25

Tizive u pfisisa, kukhukhela kuhumani ka txileleto txa kutshumetela ni kuaketa Jerusalema kala ka Mesiya, Mthangeli, ku nava ni mtxhanu wa mavhiki ni mambidi, ni mtxhanu wa magumi ni dimwedo a mavhiki ni mavhiki mambidi, magondo ni madhoropa si na aketwa; kambe ngu mbimo ya xomulo.

Nehemiya 4:13

Se ni to veka vawoneleli ka makhalo a hahatshi, ngu msana ka diguma ni ka makhalo o guleka; se ni to veka vathu ngu mimwaya yawe, ni matxhari awe, ni tingove tawe, ni malaho awe.

Nehemiya 4:16

Se ku to maheka taku, kukhukhela ka dona ditshiku dile, hafu ya majaha angu ma ti mu ko thuma, se yimwani hafu yi ti ni tingove, sitxhavangu, malaho, ni sikatawu sa sivhikelo; se vathangeli va ti ngu msana ka yotshe nyumba ya ka Judha.

Nehemiya 4:18

Se ka vaaki, mmwani ni mmwani a ti ni ditxhari txiwununi kwakwe, ve simama kuaka; aniko m'veti wa mpundu, a ti kumweko ni nani.

Masalmo 149:6

Va na kulungele ngutu va txi dhumisa Txizimu, va di ñote matxhari o lotwa khe ni khe, manzani kwawe,

Ndando ya Tindando 3:8

Votshe va di xomile matxhari, ni mitamo ya yimbi; mmweyo ni mmweyo ni ditxhari dakwe txiwununi, ngu mhaka ya dizowa da wusiku.

Joyeli 2:8

Ni wammweyo kha na mbi kama mwanawe; mmweyo ni mmweyo a tsimbila ngu nzila yakwe; va na pinda ngu txitimwi ka ditxhari, aniko kha va na mbi dayiswa.