Nehemiya 3:1 - Bhiblia Yo Sawuleka

¹ Eliyasibhe, mphaxeli wa hombe, a to khukha ni vanawe, i ku vaphaxeli kulowe, veya aka Txike txa Sifuyo, atxi va nga txi tsanisa, ve guleta ni matimba a txona; va to aka diguma an'ze ka Txitezi txa Meya, ve di tsanisa kala ka Txitezi txa Hananeli.

Nehemiya 3:1 Referans Kwoze

Nehemiya 12:39

se kukhukhela ka Txike txa Efrayime, ni kukhukhela ka Txike txa Kale, ni kukhukhela ka Txike txa Sihaka, ni ka Txitezi txa Hananeli, ni ka Txitezi txa Meya, an'ze ka Txike txa Sifuyo; se va to ya ema ka Txike txa Mkorani.

Jeremiya 31:38

Wona mata masiku, kuwomba Mkoma, aawa didhoropa diya di no aketetwa di lumba Mkoma, kukhukhela ka txitezi txa Hananeli kala ka Txike txa Dikhonani.

Johani 5:2

Aniya Jerusalema ku ti ni diziva do sambela ka dona, hafuhi ni Txike txa Tinvuta, adiya di dhanwako ngu Txihebheru ku i Bhetesdha. Diziva diya di ti ni mtxhanu wa sike.

Zakariya 14:10

Dotshe ditiko di na maha libala, kukhukhela Gebha kala Rimoni, ngu wulambwe ka Jerusalema; ene a na guletwa, ni kuaketwa wukhaloni kwakwe, kukhukhela ka txike txa Bhenjamini, kala ka wukhalo wa txike txo khata, kala ka txike txa Dikhonani, ni kukhukhela ka txitezi txa Hananeli, kala ka mapipa a mfumeli.

Mavingu 3:9

Dhunda Mkoma ngu thomba yako, ni sotshe so khata sa mu ka dibhindu dako;

Nehemiya 13:28

Mmweyo ka vanana va Joyadha, mwana Eliyasibhe, mphaxeli wa hombe, i ti mwane wa Sambalati, muhoroni, ngu mhaka yeto, ni to mtovela masoni kwangu.

Nehemiya 3:32

Se ngu hagari ka nyumba ya magwito, ni Txike txa Sifuyo, ku aketile vatshuli va nzalama ni va nyamabhindu.

Mavingu 3:6

Alakanya ene ka totshe tinzila tako, se ene a na lulamisa tinzila tako.

Masalmo 30:1

Ni na dhumisa wuhombe wako, Mkoma, nguko awe u ni hulukisile kambe khwa tumela ti to valala vangu va txi ni seka.

Nehemiya 12:30

Se vaphaxeli ni Valevhi va to ti sawulekisa; koneko va to sawulekisa vathu, ni matimba ni diguma.

Nehemiya 7:1

Ku to maheka kambe tito, msana ka kuva diguma di di akilwe, ani ni to guleta matimba; se kuvekwa vaxayisi va matimba, ni vaembeleli, ni Valevhi.

Nehemiya 6:1

Ku to maheka kambe ti taku, Sambalati, Tobhiya, Geseni, muarabhi, ni vamwani valala vathu, va di pfite ti to ani ni akile diguma, ni ti to ka dona kha ku na lisoko lo kari, hambi ku ka mbimo eyo ni sanzi kuvekela matimba ha sikeni.

Nehemiya 3:20

Msana ka Ezeri, ku to londeta Bharuke, mwana Zabhayi, e aketa dimwani didhawa, kukhukhela dikhonani kala ka txike txa nyumba ya Eliyasibhe, mphaxeli wa hombe.

Dhewuteronome 20:5

Sekoko madhota ma na womba ka vathu, ma txi kha ona: “I mani hagari kwanu a nga aka nyumba ya yiphya, ayi a sinziko kukhata kuotela ka yona kani? A na khukhe a txi tsula m'tini kwakwe, kasi asi fi yimbini, se nyumba yakwe yi txi sala yi txi khata kuotelelwa ngu vamwani.

Nehemiya 12:10

Se Jesuwa a to veleka Joyakimi, Joyakimi a to veleka Eliyasibhe, Eliyasibhe a to veleka Joyadhi,

Masalmo 48:12

Randelani didhoropa da Siyoni, mi di dhawula balani sitezi sa dona;

Dhaniyeli 9:25

Tizive u pfisisa, kukhukhela kuhumani ka txileleto txa kutshumetela ni kuaketa Jerusalema kala ka Mesiya, Mthangeli, ku nava ni mtxhanu wa mavhiki ni mambidi, ni mtxhanu wa magumi ni dimwedo a mavhiki ni mavhiki mambidi, magondo ni madhoropa si na aketwa; kambe ngu mbimo ya xomulo.

Nehemiya 3:21

Msana ka Bharuke, ku to londeta Meremote, mwana Uriya, mwana Kozi, e aketa didhawa dimwani, kukhukhela ka txike txa nyumba ya Eliyasibhe kala magwito ka nyumba ya Eliyasibhe.

Nehemiya 13:4

Hahanze keto, Eliyasibhe, mphaxeli, a nga ti xayisa Nyumba ya Txizimu txathu, a ti mahile wuxaka ni Tobhiya;