Nahume 1:2 - Bhiblia Yo Sawuleka

² Mkoma i Txizimu txa txiluse ni kuphota; Mkoma wa ti photela ni kutala ngu kuhenya; Mkoma wa ti photela ka vale va m'wukelako, txiviti txakwe a txi vekela valala vakwe.

Nahume 1:2 Referans Kwoze

Zakariya 8:2

A womba tiya Mkoma wa Mabutho a Tiyimbi: Ni wonelete Siyoni, ngu kuwonelela ka hombe, kambe ngu kuhenya ka hombe, ni kuhiseka.

Eksodha 20:5

U nga si khizamele, u txi si khozela; nguko ani Mkoma, Txizimu txako, ni Txizimu txa txiluse, ni tsayisako vanana ngu mhaka ya sionho sa vatate vawe, kala ka liveleko la wuraru ni la wumune, la vale va ni vengako.

Masalmo 94:1

Mkoma, awe u Txizimu txa kutsayisa wubihi! Txizimu, kombisa txiviti txako!

Eksodha 34:14

Khu na mbi khozela simwani sizimu, nguko Mkoma a dhanwa ku mbwa txiluse, i Txizimu txa txiluse.

Joxuwa 24:19

Sekoko Joxuwa a to khene ka vathu: “Kha mi na mbi sikota kuthumela Mkoma, nguko ene i Txizimu txo Sawuleka, Txizimu txo khatala, atxi txi no mbi sikota kutimisela ngu kueyisa kwanu ni sionho sanu.

Vahebheru 10:30

Nguko athu ha m'ziva awule a nga khene: “Kupharela kulumba ani, ani ngani ni no tshumetela.” A txi khene: “Mkoma a na lamula vathu vakwe.”

Isaya 42:13

Mkoma a na huma kufana ni ndena, kufana ni m'thu wa yimbini, a na wusa kukhatala; a na kwangula, e maha diguwa da hombe, kambe a na veka hahatshi valala vakwe.

Dhewuteronome 4:24

Nguko Mkoma, Txizimu txako, mndilo wu wu tshokomisako, Njizimu txa txiluse.

2 Pedro 2:9

Atiya ti womba ti to Mkoma wa sikota kuponisa vathu va wukhongeli ni kuveketa ava vo biha kasi ve ta tsayiswa ngu ditshiku do lamulwa;

Varoma 12:19

Vo randeka ngutu, mi nga photeni mipune, kambe lekani Txizimu txi ti henyela, nguko ti bhatwe ti taku: “Kuphota kulumba ani, ngani ni no tshumetela, kuwomba Mkoma.”

Mika 5:15

Se ni na tisa kuhenya ni txiviti txitimwi ka matiko ale ma si engisiko.

Joyeli 2:18

Sekoko Mkoma a na pfela ditiko dakwe, kambe a na va ni wumbilu ka vathu vakwe.

Ezekhiyele 39:25

Ngu konaho, Mkoma Txizimu a khene: Kona kuwa, ni na tshumela ni wuyisa tikhumbi ta ka Jakobe. Kambe ni na mahela wumbilu yotshe nyumba ya ka Israyeli, ni na emela ditina dangu do sawuleka.

Ezekhiyele 6:12

Awule a no va a di kule a na dawa ngu mtungu; kambe awule a ku hafuhi a na dawa ngu ditxhari; se awule a no sala a di randetwe ngu valala, a na dawa ngu nzala; se ni na va wukela ngu txiviti.

Jeremiya 4:4

Mahani Sithiva ka Mkoma, mi thavisa didhowo da timbilu tanu, anu vavamna va ka Judha, ni vaaki va Jerusalema. Kasi kuhenya kwangu ku si vhutuki nga mndilo, wu turako ha kaku wu si timwi, ngu mhaka ya kubiha ka mithumo yanu.

Isaya 51:20

Vanana vako va tsivate, va otete mahandakanyani ka totshe tinzila, kufana ni timhuti amu ka milawu; sekoko va tate ngu kuhenya ka Mkoma ni kukawuka ka Txizimu txako.

Isaya 51:17

Wuka, Wuka, khukha awe Jerusalema, u nga sela ka dianza da Mkoma, digombe da txiviti txakwe, u sete ni kupswonga nzambwa ka digombe di di levisako, u sete nzambwa ya digombe da kuthidhela.

Jobe 20:23

Hambi si diho so khurisa mrumbu wakwe, kambe Txizimu txi na rumela kutura ka kuhenya ka txona, se Txizimu txi na rumela kuhenya txitimwi kwakwe a txi ya kudyani.

Levhi 26:28

sekoko, ni na mi wukela ngu kuhenya, ni txi mi tsayisa kambe, ngu kuwuyeleta mtxhanu wa sikhati ni simbidi, ngu mhaka ya sionho sanu.

Varoma 13:4

nguko mfumeli njirumwa txa Txizimu, txa ku kuvhuna kumaha ta tinene. Kambe ngako u txi maha to biha, u fanete kuthava, nguko mfumeli kha ñoli ditxhari mahala. Njirumwa txa Txizimu kasi kulamula ni kutsayisa ava va mahako to biha.

Zakariya 1:14

Se ngelozi yile yi nga ti ti womba-womba ni nani, yi to ni gela tiya: Kwangula u txi khawe: Mkoma wa Mabutho a Tiyimbi a womba tiya: Ngu kuhiseka ka hombe, na hiseka ngu Jerusalema ni Siyoni.

Mika 7:18

I mani wo fana ni nawe, u divalelako wubihi u divala ni wueyisi wa miboti ya thomba yako kani? Mkoma kha veki kupandiseka kwakwe yotshe mbimo, nguko a tsakiswa ngu wumbilu amu ka wunene.

Ezekhiyele 38:18

Ku na maheka ka dona ditshiku dile: Ka ditshiku dile a nota ngu dona Goge kutalwa ni Israyeli, kuwomba Mkoma Txizimu, kuhenya kwangu ku na hoka tithonvuni kwangu.

Ezekhiyele 36:6

Ngu tona eto, profeta madingano ni ditiko da ka Israyeli, u womba ka mimango, ni ka simangwana, ni ka minambo ni ka mikova, u txi khawe: Mkoma Txizimu a khene: Wona taku ni wombile ngu kutiningetetela kuhenyani kwangu, nguko mi tekile sile mi nga honyola ka vamatiko.

Ezekhiyele 8:18

Ngu kumaha keto, nani ni na va henyela; diso dangu kha di na mbi va tsetsa, kambe kha ni na mbi va ni wumbilu; hambi va txo kwangula tinzeveni kwangu ngu dipswi da hombe, kha ni na mbi va engisa.

Ezekhiyele 5:13

Ngu kumaha keto kuhenya kwangu ku na maheka, ni na boxela kwawe txiviti txangu ni txi ti thavelela; kambe va na tiziva ti to ngani ani, Mkoma, ni nga womba ngu kuvihata, mbimo yi ni no va vitikela.

Sidilo 4:11

Mkoma Txizimu a hetisile kupandiseka kwakwe a kusute mndilo wa txiviti txakwe. Wu txi hisa m'ti wa Siyoni, wu txi hetisa ni makhato a wona.

Jeremiya 36:7

Mwendo va na khongela masoni ka Mkoma, se ve hunduluka mmwani ni mmwani ka nzila yakwe yo biha, nguko kuhenya ni txiviti txa Mkoma nza hombe, asi a wukelako ngu sona vathu vava.

Jeremiya 25:15

Nguko Mkoma, Txizimu txa Israyeli, a ti khene kwangu: Teka dijingo diya da vhinya da kuhenya manzani kwangu, u seta otshe matiko ni no kurumela ka ona.

Jeremiya 3:5

Ina a na va ni txiviti kala kupinduka kani?” Awe u wombile tongeto. Aniko u maha ti ti nga biha uza u ti hetisa.

Isaya 66:15

Nguko wonani taku Mkoma a nata ngu mndilo; se sikotxikani sakwe nga singulu, kasi kuhundulusa kuhenya kwakwe kumaha txiviti, ni kukawuka kwakwe ku na fana ni midhikila ya mndilo.

Dhewuteronome 7:10

aniko ene a tshumetela ngu ku va lovisa avale va m'vengako, kha sweli kudihisa, a na va tshumetela.

Jeremiya 28:8

Vaprofeti va va nga ti tiho masoni kwangu ni masoni kwako, kukhukhela kaleko va to profetela matiko o tala ni mifumo ya hombe, ati taku ku na vaho yimbi ni makhombo ni mitungu.

Ezekhiyele 38:19

Nguko ku ti hita kwangu ku ni gete, amu ka mndilo wa kuhenya kwangu, taku ka dona ditshiku dile ku nava ni kudhudhumela ka hombe, txitimwi ka ditiko da ka Israyeli,

Eksodha 34:7

Wo tala ngu lirando la hombe, kala ka magumi a mazana a tiveleko, wo divalela wubihi, kueyisa ni sionho, aniko kha fananisi muonho ni wamnene; kambe wa tsayisa vanana ni vatukulu, kala ka liveleko la wuraru ni la wumune, ngu mhaka ya sionho sa vatate vawe.”

Mitengo 25:11

Finiyasi, mwana Eleyazari, mwana mphaxeli Aroni, a vayilelisile dikhulo dangu txitimwi ka vanana va ka Israyeli, nguko a to ti ningela hagari kwawe. Se kha na nga va lovisa vanana va ka Israyeli, ngu kuhenya kwangu.

Jeremiya 50:15

Mu wukeleni ngu diguwa, mi txi mu horolokela; ene se a ti ningete; sitsaniso sakwe si wite, maguma akwe ma khundumusetwe; nguko yimbi yiya nja Mkoma; mlwiseni, nga ti a nga maha, mahisani toneto kwakwe.