Mtuletelo 6:17 - Bhiblia Yo Sawuleka

¹⁷ nguko di hokile ditshiku da hombe da kuhenya kwawe, se i mani a no sikota kuema, kani?

Mtuletelo 6:17 Referans Kwoze

Malakiya 3:2

Kambe i mani a no tsanisela ka ditshiku da kuta kwakwe kani? Ni ku i mani a no simama a diho, ngako ene a txi ta kani? Nguko ene a na nga mndilo wa mnyivilikisi, ni ku nga sephu ya vakuwuli.

Joyeli 2:11

Se Mkoma wa guleta dipswi dakwe masoni ka masotxhwa akwe; nguko magovelo a kona nga mangi ngutu; nguko a ni mtamo, wu a mahako ti di nga womba dipswi da Mkoma; nguko ditshiku da Mkoma nda hombe kambe da thisa, se i mani waku a ngadi xanisa kani?

Masalmo 76:7

Awe, Mkoma, wa thisa ka votshe; kuwalo wo tsana e tserama masoni kwako, ngako u di henyile.

Mtuletelo 16:14

nguko ngu yona mimoya ya madhimoni yi mahako sixamaliso, yi hoka ni ka vafumeli va dotshe ditiko, kasi ku yi va tshanganisa ku yalwa yimbi ya ditshiku da hombe, da Txizimu txa mtamo wotshe.

Joyeli 2:31

Ditambo di na hinduka di maha txidema, se mtxima wu na maha mnoha, na di si se ta ditshiku da hombe da Mkoma.

Jeremiya 30:7

Yowe! Ani sikwangu! Ditshiku diya da hombe, kha ku na dimwani do fana nado! Kambe i mbimo ya dikhombo ka Jakobe; hambi keto, ka dona, a na huluka.

Varoma 2:5

Kambe ngu kubanga ka mbilu yako, ayi yi si laviko kuhunduluka, wa ti sengeletela txiviti txi u nota txi mana ka ditshiku da txiviti, ahawa ku nota humelela kulamula ku ko lulama ka Txizimu;

Mtuletelo 11:18

Mifumo yi ti ti kwatile, aniko kuhenya kwako kuhokile, i mbimo yo lamula vafi, I mbimo yo ninga hakhelo ka vaprofeti sithumi sako, ni ka vasawuleki vako va va thavako ditina dako, vavadotho ni vahombe, I mbimo kambe ya kufuvisa avava va nga onhisa mafu.”

Judha 1:6

Se tingelozi ti ti nga mbi veketa wukoma wa tona, aniko ti nga leka wukhalo wa tona, a ti vekile mtemani, ti di sungilwe ngu makhodha o mbi guma, ti verela kulamulwa ka ditshiku da hombe.

Luka 21:36

Khutalani na mi txi khongela txotshe txikhati, kasiku mi va ni mtamo wa kuhuluka ka totshe ti ti no humelela, ni kuema mi di tsani masoni ka Mwanana wa M'thu.”

1 Samuwele 6:20

Sekoko vavamna va Bheti-Semi, va to kha vona: I mani a nga emako masoni ka Mkoma, Txizimu txiya txo sawuleka kani? Ni ku i mani kwathu a no kwelela kani?

Masalmo 2:12

Khizamani masoni kwakwe, kasiku asi henyi, na nanu mi si lovi mi di ngadi ha nzila, nguko kuhenya kwakwe ka kuluveta kutura. Va katekile avale va thembako Mkoma!

Masalmo 110:5

Mkoma a maneka txineneni kwako; ngako ene a txi henya, a na ganyatela vafumeli.

Isaya 63:4

Nguko ditshiku da kuphota di mbiluni kwangu, ni dilembe da vo tirulwa vangu di hokile.

Joyeli 1:15

Yowe! Ditshiku dile! Nguko ditshiku da Mkoma di hafuhi, di nata kufana ni kufuvisa ka wu wa Mtamo-wotshe.

Joyeli 2:1

Vetani mpundu aniya Siyoni mi dila ngu dipswi do guleka mmangoni kwangu ko sawuleka; va na dhudhumele votshe vaaki va ha mafuni, nguko ditshiku da Mkoma data, di hafuhi;

Nahume 1:6

I mani a no ema masoni ka txiviti txa Mkoma kani? I mani a no timisela masoni ka kutura ka kuhenya kwakwe kani? Txiviti txakwe txi thekete ku nga mndilo, se marigwi ma hoxotilwe ngu ngene.