Mtuletelo 5:13 - Bhiblia Yo Sawuleka

¹³ Ni ka sotshe sivangwa si si ku nzumani ni ha mafuni ni hahatshi ka mafu ni lineneni ni sotshe si si kuho ani ni si engisile si txi womba, si txi kha sona: “Ka wule a nga khalahatsha txitimwi ka Txikhalo txa Wukoma ni ka Txinvutana, ku na ningwe kubonga, txithavo, wudhumo ni mtamo kala kupinduka.”

Mtuletelo 5:13 Referans Kwoze

Vafilipiya 2:10

kufela ku, ha ditinani ka Jesu, otshe mazolo ya vale va ku txitimwi nzumani ni ya vale va ku ha mafuni, ni ya vale va ku hahatshi ka mafu, me mu khizamela;

1 Makronika 29:11

Wudhumo ni mtamo, ni nduma, ni kuxula ni wuhombe, nzako Mkoma; nguko sotshe si si ku nzumani ni ha mafuni nzako, mfumo mbwako Mkoma, kambe awe u ti guletile txitimwi ka votshe, kuva mthangeli.

Mtuletelo 5:3

Aniko ku ti si nga ho ni mnweyo, hambi nzumani, hambi ha mafuni, hambi hahatshi ka mafu, wo sikota kutula mwendo kurinza maso mndani ka dona.

Mtuletelo 5:12

Tona ti wombile ngu dipswi da hombe ti txi kha tona: “Txinvutana txi txi nga bhaywa txi ni fanelo ya kuamukela Wukoma, thomba, wuzivi, mtamo, ni wudhumo, kupfaliswa ni kubongwa.”

Varoma 11:36

Nguko sotshe si ta ngu kwakwe, sotshe si ho ngu mtamo wakwe, sotshe si konama ene. Wudhumo wu nave kwakwe kala kupinduka. Amen!

1 Pedro 5:11

Ka txona kupfaliswa ni mtamo kala kupinduka! Amen.

Luka 2:14

“Txi na dhumiswe Txizimu txitimwi nzumani ni kudikha ku na tale ha mafuni, ka vale txona txi va dhundako.”

Isaya 42:10

Embelelani ka Mkoma dando ya yiphya, ni ku m'dhumisa kukhukhela magwito ka mafu, anu mi sambelako lineneni, ni sotshe si si ku ka lona; anu sitondolo, ni vaaki va sona.

Mtuletelo 6:16

Ve gela mimango ni marigwi va txi: Khundumukani mi txi hi khubhunyeta, mi hi sisa ka khohe ya wu a nga khalahatsha ha txikhaloni ka wukoma, ni ka kuhenya ka Txinvutana,

Judha 1:25

ka txona txokha i ku Txizimu ni Muhanyisi wathu, txi nga hi hulukisa ngu Mkoma Wathu Jesu Kristu, wudhumo, wuhombe, mtamo ni kufuma, si nave ka txona kukhukhela ka totshe timbimo ti ti nga pinda, ni konkuwa, ni ka malembe ni malembe. Amen.

Varoma 16:27

Ka Txizimu i ku txona txokha txo txhariha, ku na mahwe sidhumiso ngu Jesu Kristu, ngu malembe ni malembe. Amen!

Varoma 9:5

avava i ku lixaka la vakokwani vathu, avava hambi Kristu a nga velekelwa kwawe ngu ka wuthu, ene a ku txitimwi ka sotshe somaha, i ku Txizimu txi txi dhumiswako yotshe mbimo. Amen.

Mtuletelo 5:6

Ngu toneto, hagari ka txikhalo txa wukoma kumweko ni mune wa sivangwa so hanya, ni madhota, ni woni Txinvutana txi di emile, nga txi to bhaywa. Txi ti ni mtxhanu wa titxheho ni timbidi, ni mtxhanu wa maso ni mambidi, i ku mtxhanu wa Mimoya ni yimbidi ya Txizimu, yi nga rumwa ka dotshe ditiko.

Mtuletelo 1:6

a txi hi maha vakoma ni vaphaxeli ngu mtamo wa Txizimu Tate wakwe: Kupfaliswa ni mtamo si na lumbe ene kala kupinduka. Amen.

1 Pedro 4:11

Awu a wombawombako, a na womba-wombe ngu kulondisa dipswi da Txizimu. Awu a thumako a na thume madingano ni txyavelo txi a nga hiwa ngu Txizimu, kasiku, Txizimu txi pfaliswa ka sotshe somaha, ngu Jesu Kristu, i ku ene a lumbwako ngu kupfaliswa, ni mtamo, ngu ha ku si gwitiko. Amen!

Vaefesu 3:21

txi na dhumiswe amu Dibanzani ni ka Jesu Kristu, ka liveleko ni liveleko, kala kupinduka. Amen.

Isaya 24:14

Avava va na guleta mapswi awe, ve embelela ngu kutsaka; ngu mhaka ya wudhumo wa Mkoma, va na huwelela kukhukhela lineneni.

Mtuletelo 5:9

va txi embelela ndando ya yiphya va txi: “U ni fanelo yo amukela dibhuku, u txi tula sixambanyo sa dona, nguko u datwe, se ngu mnoha wako u xavete Txizimu vathu va totshe tihunzu, totshe tidimi, otshe matiko ni yotshe mifumo.

Vakolosa 1:23

kambe mi fanete kutsana amu ka likholo, mi si hambuki amu ka txithembo txa Evhangeli yi mi nga yi amukela, ayi yi nga nuwelwa ka sotshe sivangwa si si ku hahatshi ka nzuma, Evhangeli yoneyo nani Paulo ni nga mahwa txithumi txa yona.

Matewu 6:13

U nga hi leke hi txi wa kudukwani, kambe hi thuse ka m'bihi.” [Ngukuva Mfumo mbwako, ni mtamo ni wudhumo kala kupinduka. Amen.]

1 Timoti 4:16

Ti wonele upune, u txi xola ni gondo yi u gondisako. Tsana ka sona, nguko ngako u txi maha toneto, u na ti hanyisa awe ni va va ku engisako.

Johani 1:29

Mangwanani ka kona, Johani a to wona Jesu, a nga txi ta kwakwe, se a txi khene: “Wonani Txinvutana txa Txizimu atxi txi kuwulako sionho sa ditiko.

Mtuletelo 5:1

Msana keto, ni to wona awule a nga ti khalahatshile ha txikhaloni ka wukoma, a di ñote, ngu dianza da txinene, dibhuku do bhalwa mndani ni hahanze di di lemilwe ngu sixambanyo sa mtxhanu ni simbidi.

Mtuletelo 13:8

Votshe vaaki va ha mafuni va na txi khozela, avava matina awe ma nga mbi bhalwa, kukhukhela makhatoni ka ditiko, amu ka dibhuku da wutomi da Txinvutana, atxi txi nga bhaywa.