Mtuletelo 4:7 - Bhiblia Yo Sawuleka

⁷ Txivangwa txo khata txo hanya txi ti fana ni ngonyamo; txivangwa txa wumbidi txi ti fana ni didhuna, txa wuraru txi ti ni khohe yo nga ya m'thu; txa wumune txi ti fana ni ngungwa.

Mtuletelo 4:7 Referans Kwoze

Ezekhiyele 10:14

Se dikerubhima dimwedo ni dimwedo di ti ti ni mune wa tikhohe: Khohe ya do khata i ti ti ya dikerubhima, khohe ya da wumbidi i ti ti ya m'thu, khohe ya da wuraru i ti ti ya ngonyamo, se khohe ya wumune i ti ti ya digama.

Ezekhiyele 1:10

Se khohe ya txona yi ti ti fana ni khohe ya m'thu; ka dianza da txinene, sotshe sa mune si ti ti ni tikhohe ta tingonyamo, ka dianza da txibhabha sotshe si ti ti ni tikhohe ta tihomu, ni khohe ya digama, sotshe sa mune.

Ezekhiyele 10:21

Dikerubhima dimwedo ni dimwedo di ti ti ni mune wa tikhohe, ni mune wa tibhapi, ni sa kufana ni manza a m'thu, ngu hahatshi ka tibhapi ta ona.

Mtuletelo 4:6

Masoni ka txona txikhalo txa wukoma, ku ti ni txo nga Linene la ngilazi lo fana ni kristali. Txikhalo txa wukoma txi ti ranganyetilwe ngu mune wa sivangwa so hanya, na si di tate ngu maso, masoni ni msana.

Dhaniyeli 7:4

Txihari txo khata txi ti fana ni ngonyamo, kambe txi ti ni tibhapi ta digama; Ni to txi wonetela kala kuza tibhapi ta txona ti gwatelwa, se txi to gulwa, txi emiswa ha mafuni ngu minenge ya txona txi txi nga m'thu, txi ningwa mbilu ya m'thu.

Ezekhiyele 1:8

Kambe si ti ti ni manza o nga a vathu, ngu hahatshi ka tibhapi ta sona, ka mune wa madhawa; se ngu kumaha keto, sotshe sa mune si ti ti ni tikhohe ta sona ni tibapi ta kona.

Isaya 40:31

Aniko avale va emako ka Mkoma, va na wuseta mitamo yawe, se va na kwelela ngu tibhapi kufana ni magama; va na tutuma va si karali, va na tsimbila va si rereki.

Dhewuteronome 28:49

Mkoma a na ku tisela mfumo wa kuta ngu kule, mfumo wa magwito ka mafu, awule wu nota ngu kupuruma nga ngungwa, mfumo wu wu wombawombako ngu lidimi li awe u si li ziviko.

Obhadhiya 1:4

Ngako u txi ti guleta kufana ni digama, u veka txisaka txako hagari ka tinyeleti, ngu koneho ni na kuwisa, kuwomba Mkoma.

Mavingu 28:2

Ngu mhaka ya wuhambunyeti wa mafu, mbangi va lavako wuthangeli, aniko ngu mahaka ya vathu vo txhariha ni kupfisisa, ma na simama ma diho.

2 Samuwele 1:23

Sawule ni Jonatani va ti ti dhundana ni kurandana ngutu kuhanyani kwawe, hambi kufani kwawe kha va hambana! Va ti ti ni livilo ngutu kupinda magama, ni mtamo ngutu kupinda tingonyamo.

Genesisi 49:9

Judha njingonyamwana; u txi wuya mwanangu ngu kuxotani! Wa bukhwama a txi humula nga ngonyamo ya matune, nga ngonyamo ya matune yo kale. I mani a no mu wusa kani?

1 Vakorinto 14:20

Vanathu, mi nga ti maheni vanana mapimoni kwanu. Ka tile to biha, eho ti maheni vanana, kambe amu ka mapimo ti maheni madhota.

Mitengo 24:9

A bukhwamile e baramela kufana ni ngonyamo ya matune, a txi nga ngonyamo ya mkati; i mani a no mkhukhisa kani? Va na kateka ava va ku katekisako. Se va na ruketelwe ava va mi ruketelako.”

Mitengo 23:24

Wonani tito, ava vathu va wuka kufana ni ngonyamo ya makati. Va ema kufana ni matune wa ngonyamo. Yona kha yi oteli yi sanzi kumita mpfimba wa yona, ni kusela mnoha wa vale yi nga va daya.”

Mtuletelo 6:3

Mbimo yi Txinvutana txi nga kwamula txixambanyo txa wumbidi, ni to engisa txivangwa txa wumbidi txo hanya txi txi kha txona: “Ngono!”

Mtuletelo 6:5

Mbimo yi Txinvutana txi nga kwamula txixambanyo txa wuraru, ni to engisa txivangwa txa wuraru txi hanyako, txi txi kha txona: “Ngono!” Konako ku to humelela dihantxhi da ntima, mgadhi wa dona a ti ni txikalo manzani.

Mtuletelo 6:7

Mbimo yi Txinvutana txi nga kwamula txixambanyo txa wumune, ni to engisa dipswi da txivangwa txo hanya txa wumune, di txi kha dona: “Ngono!”