Mtuletelo 3:21 - Bhiblia Yo Sawuleka

²¹ Ka wu a xulako ni na mninga kateko yo khalahatsha kumweko ni nani ha txikhaloni kwangu ka wukoma, kufana ni nani ni nga xula, se ni nga khalahatsha kumweko ni Tate wangu ha txikhaloni kwakwe ka wukoma.

Mtuletelo 3:21 Referans Kwoze

2 Timoti 2:12

ngako hi txi xaniseka kumweko nayo, hi na fuma kumweko nayo. Ngako hi txi mlamba, nene a na hi lamba;

Matewu 19:28

Jesu a to xamula a txi khene: “Kha ditshuri na mi gela ku khani: Ka mbimo ya kuwusetwa ka wuphya wa sotshe, ditshiku diya Mwanana wa M'thu a nota khalahatsha ha txikhaloni kwakwe ka wukoma wa kupfaliswa, na nanu, mi nga ni londisa, mi nata khalahatsha ka digumi da sikhalo sa wukoma ni simbidi, mi txi lamula tihunzu ta digumi ni timbidi ta ka Israyeli.

Johani 16:33

Ni mi gete timhaka tiya kasiku, kwangu, mi va ni kudikha. Mi nava ni sixaniso mu ditikoni, kambe tsanani msana, ni di xute ditiko.”

Mtuletelo 2:7

Awu a ku ni tinzeve a na engise ati Moya wu embelako Mabanza: Ka wu a no xula, ni na m'tumelela kudya mndonga wa wutomi, wu ku paradhiseni ka Txizimu.

Matewu 28:18

Jesu a to tshuketa hafuhi, a txi khene kwawe: “Ni ningilwe mtamo wotshe, nzumani ni ha mafuni:

Luka 22:30

kasi ku mi txi dya ni kusela ha mezani kwangu, ka Mfumo wangu; ni ti to mi txi khalahatsha ka sikhalo sa wukoma mi txi lamula tihunzu ta digumi ni timbidi ta ka Israyeli.”

Mtuletelo 20:4

Konako ni to wona sikhalo sa wukoma. Se avava va nga ti khalahatshile ka sona va to ningwa mtamo wo lamula. Ni to wona kambe mimoya ya vale va nga wilwa misungo ngu mhaka ya wufakazi wa Jesu ni Dipswi da Txizimu; ni vale va nga mbi khizamela txikalani ni txithombe txa txona. Kambe kha va amukela txixambanyo txa txona ha timbanza kwawe mwendo manzani kwawe. Vona va tshumete ve hanya ve fuma kumweko ni Kristu, txipimo txa 1.000 wa malembe.

Mtuletelo 1:6

a txi hi maha vakoma ni vaphaxeli ngu mtamo wa Txizimu Tate wakwe: Kupfaliswa ni mtamo si na lumbe ene kala kupinduka. Amen.

Mtuletelo 12:11

Kambe vona va mu xute ngu mhaka ya mnoha wa Txinvutana ni ngu mhaka ya dipswi di va ngadi fakazela, nguko kha va khatala ngu wutomi wawe kala kufani.

Mtuletelo 17:14

Va na lwa ni Txinvutana, aniko Txinvutana txi na va xula, nguko txona i Mkoma wa vakoma ni Mfumeli wa vafumeli, se kumweko natxo kambe va na xula, avale va nga dhanwa, avale va nga sawulwa, ni makholwa.”

Mtuletelo 7:17

Nguko Txinvutana txi txi ku ha txikhaloni ka wukoma txi na va dyisa, txi va kombisa nzila ya kuya ka sisima sa mati a wutomi. Se Txizimu txi na va bahulela mirongo yotshe ka maso awe.”

Mtuletelo 6:2

Se konako ni to wona dihantxhi do basa, mgadhi wa dona a di ni wulaho. Va mu ningile m'bhoti, se e huma, nga ndena, yi yi yako kuxulani.

Matewu 25:21

Nyamne wakwe a ti khene kwakwe: ‘Ngu tona, txithumi txa txinene, txa kuthembeka, u thembekile ka simaha sa sidotho, ni na kuveka txitimwi ka sasingi. Wulela litsakoni ka nyamne wako.’

Mtuletelo 5:10

Ngu vona u mahete Txizimu txathu, mfumo wa vaphaxeli, se vona va na fuma ha mafuni.”

Mtuletelo 20:6

Va katekile ni kusawuleka avale va manako txyavelo txa kuwuka ko khata ka vafi. Txitimwi kwawe lifo la wumbidi kha li nga ni mtamo, vona va na va vaphaxeli va Txizimu ni va Kristu, va na fuma nayo 1.000 wa malembe.

Johani 13:32

Ngako Txizimu txi di pfalisilwe kwakwe Mwanana, ni txona Txizimu txi na mpfalisa kunukunuko.