Mtuletelo 22:17 - Bhiblia Yo Sawuleka

¹⁷ Moya ni txiwutwa va womba va txi kha vona: “Ngono!” Awule a engisako a na wombe nene a txi khene: “Ngono!” Awule a ku ni ditora, a na te. Awule a ti lavako a na amukele mahala mati a wutomi.

Mtuletelo 22:17 Referans Kwoze

Johani 4:14

aniko awule a selako mati yawa ni no mninga ani, kha na mbiswa a txi pfa ditora; kambe mati yawa ni no mninga, ma na hinduka mndani kwakwe ma txi maha txisima txa mati yawa ma mu ningako wutomi wo mbi guma.”

Mtuletelo 21:6

A to engeta kambe a txi khene: “Ona mapswi awa ma tatisekile. Ani ngani Alfa ni Omega, ngani Makhato ni Magwito; ka wu a ku ni ditora ni na mninga mahala mati a txisima txa wutomi.

Johani 7:37

Ka ditshiku do gwitisa da M'buso, i ku ditshiku da hombe, Jesu a to khukha a txi ema, a txi gula dipswi a txi khene: “Ngako m'thu wokari a ti ni ditora, anate kwangu e ta sela.

Isaya 12:3

Se anu, ngu kutsaka, mi na reka mati ka sisima sa kuhanyisa.

Johani 4:10

Se Jesu a to xamula a txi khene: “Idiku wo txi ziva txihiwa txa Txizimu, ni ti to i mani wule a ku khene: ‘Hi nga niha mati o sela’ nga i di awe u mu kombelako ti to ene e kuninga mati a kuhanya.”

Masalmo 34:8

Duketani mipune mi txi ti wona to Mkoma mbwa mnene; a katekile m'thu wule a thembako ene!

Isaya 2:5

Ngonani, anu va nyumba ya ka Jokobe, he tsimbileni kuwonekelani ka Mkoma.

Mtuletelo 22:1

Msana keto, ngelozi yi to ni komba mnambo wa mati a wutomi, o khetima nga kristali; wu txi huma ngu ka txikhalo txa wukoma txa Txizimu ni txa Txinvutana.

Mtuletelo 21:9

Msana keto, yimweyo ka tingelozi ta mtxhanu ni timbidi, ti nga ti ni magombe a mtxhanu ni mambidi, ma di tate ngu mtxhanu wa mitungu ni yimbidi yo gwitisa, yi to ni tela yi ta ni gela yi txi kha yona: “Ngono ni ta kukomba txiwutwa, msikati wa Txinvutana!”

Mtuletelo 21:2

Sekoko, ni woni didhoropa do sawuleka, Jerusalema wamphya, a nga txi relela ngu nzumani, a txi khukhela ka Txizimu, didhoropa do tshurisa ku nga wamsikati wu a nga bombiselwa mkatawe.

Varoma 3:24

Na va si nga ni fanelo, va ningwa kululama ngu mtamo wa kateko ya txona Txizimu txi nga va tirula ngu Kristu Jesu;

Isaya 2:3

Se matiko amangi ma na rambana, ma txi kha ona: Ngonani, a hi kweleleni mmangoni ka Mkoma, Nyumbani ka Txizimu txa Jakobe, kasi ku txi ya hi gondisa tinzila ta txona, se athu hi na tsimbila ngu tinzila ta txona; nguko ku na huma mlayo ngu Siyoni, ni dipswi da Mkoma, ngu Jerusalema.

Mtuletelo 22:16

Ani Jesu, ni rumete Ngelozi yangu, kasi ku mi fakazela timhaka tiya ti lumbako mabanza: “Ani ni diphasikela da liveleko la Dhavhidha, ni nyeleti yi phatimako hale mixo.”

Mtuletelo 2:7

Awu a ku ni tinzeve a na engise ati Moya wu embelako Mabanza: Ka wu a no xula, ni na m'tumelela kudya mndonga wa wutomi, wu ku paradhiseni ka Txizimu.

Jeremiya 50:5

Va na wotisa va di nzilani ka Siyoni, tikhohe tawe ti na rendekela koneyo, va nata ti pananisa ni Mkoma, ka Txitumelelano txo mbi gwita, txi na kwa mbi dhuka txi divalwa.

1 Vakorinto 2:12

Se athu kha ha amukela moya wa mafu, aniko hi amukete Moya wu wu tako ngu ka Txizimu, awu wu hi ningako kuziva tikateko ti hi nga ningwa ngu txona.

Mika 4:2

Se matiko amangi ma na ya ma txi ya kha ona: Ngonani, a hi kweleni mmangoni ka Mkoma, ni Nyumbani ka Txizimu txa Jakobe, kasi ku txi ya hi gondisa tinzila ta txona, se athu hi na tsimbila ngu tinzila ta txona; nguko ku na huma mlayo ngu Siyoni, ni dipswi da Mkoma ngu Jerusalema.

Johani 4:29

“Ngonani mi ta wona m'thu wu a nga ni gela totshe ti ni nga ti maha. Ina hi nga ene Mesiya kani?”

Ezekhiyele 47:1

Msana keto, a to ni wuyiswa ka txike txo wulela ngu txona nyumbani, se ku ti ti huma mati ngu hahatshi ka msasimo wa nyumba, ngu wutxani; nguko masoni ka nyumba ku ti ti rendekete wutxani, mati ma ti ti ta ngu hahatshi, kukhukhela ka didhawa da txinene ka nyumba, ni didhawa da wuphemba kala txiluveloni.

Johani 4:11

Wamsikati a to khene: “Mkoma, khu nga ni txo reka ngu txona mati txisimani, kambe ni txona txisima txi hokomile, se u na ma mana hani mati a kuhanya kani?

Mtuletelo 7:17

Nguko Txinvutana txi txi ku ha txikhaloni ka wukoma txi na va dyisa, txi va kombisa nzila ya kuya ka sisima sa mati a wutomi. Se Txizimu txi na va bahulela mirongo yotshe ka maso awe.”

Mtuletelo 14:13

Konako ni to engisa dipswi da kuta ngu nzumani, di txi kha dona: “Bhala u txi khawe: Va katekile vafi vava, kukhukhela konkuwa va felako ka Mkoma. Ina, kuwomba Moya, va na humula ka mikaralo yawe, nguko mithumo yawe ya va heleketa.”

Johani 1:37

Vagondiswa vale va vambidi, ngako va txi engisa mapswi ale a nga ma womba, va to londisa Jesu.