Mtuletelo 20:9 - Bhiblia Yo Sawuleka

⁹ Va to huma ve hangalaka ni dotshe ditiko ve randela midhuti ya vasawuleki ni didhoropa do randeka; kambe ku to txhika mndilo ngu nzumani wu txi ta va heta.

Mtuletelo 20:9 Referans Kwoze

Ezekhiyele 38:16

Se u na wukela vathu vangu va ka Israyeli, kufana ni direfu, di txi fenengeta ditiko; ngu magwito ka masiku, ku na maheka taku ni txi kutisa u ta wukela ditiko dangu, kasi ku matiko ma txi na ni ziva, mbimo yi ni no va ni di sawulekisile maso ako, awe Goge.

Ezekhiyele 39:6

Se ni na rumela mndilo txitimwi ka Magoge, ni hagari ka vale va zumbako ko tsana sitondoloni; va na tiziva taku ani ngani Mkoma.

Ezekhiyele 38:22

Se ni na mlwisa ngu mitungu ni kutheketa mnoha; ni na wisa mati a ndambi, ni marigwi a hombe a maralala, mndilo ni txivavula ni na si wisa txitimwi kwakwe, ni txitimwi ka masotxhwa akwe, ni ka votshe vathu votala va no maneka va di ni nene.

Ezekhiyele 38:9

Sekoko u na kwelela, u txi ta ni txihuhuri, u na nga direfu, kasi kufenengeta mafu, awe ni otshe masotxhwa ako, u di ni vathu votala.

2 Vatesalonika 1:8

a di ha mdhikilani ka mndilo, kasiku e pharela ka vale va si txi ziviko Txizimu, ni ka va va si engisiko Evhangeli ya Mkoma wathu Jesu.

Masalmo 106:18

Ku to relela mndilo wu txi wa txitimwi kwawe, wu hisa votshe avale va nga txi mahetela to biha.

Masalmo 97:3

Mndilo wu thangela masoni kwakwe wu txi hisa valala va va mrandelako.

Mtuletelo 13:13

Txona txa maha sixamaliso sa hombe: Ahawa koza txi sikota kumaha ti to mndilo wu txhika ngu nzumani, wu txi wa ha mafuni, wu wonwa ngu vathu.

Mtuletelo 11:5

Ngako m'thu a txi lava ku ti mahela wubihi tifakazi tile, ku na huma mndilo ngu txisofuni ka tona, awu wu no pfunulela valala va tona; inna, ngako m'thu a txi duketa ku ti mahela wubihi ngu tona ti a nga txi fanela kufisa tona.

Luka 17:29

Aniko ditshiku di Loti a nga huma ngu dona Sodhoma, mndilo ni txivavula si to wiswa ngu nzuma, si va daya votshe.

Luka 9:54

Va di woni tiya vagondiswa Jakobe ni Johani, va to kha vona: “Mkoma, wa ti lava hi rumela mndilo wu txi txhika ngu nzumani wuta va fuvisa kani?”

Isaya 37:36

Sekoko Ngelozi ya Mkoma yi to huma yi ya lovisa 185.000 wa vathu, wugoveloni ka Vasiriya. Se mbimo yi va nga wuka ni mixo ngutu, va to wona sirumbi dwe.

Mitengo 16:35

Sekoko Mkoma a to rumela mndilo wuta lovisa vathu va 250, va nga ti hungala ngu kuhisa dibaselo.

Mitengo 11:1

Ku to maheka ti to vathu ve khata kungungurukela tinzeveni ka Mkoma; se a di ti engisile eto Mkoma, kuhenya kwakwe ku to hisa, mndilo wakwe wu to tura hagari kwawe, wu tshokomisa vale va nga ti ti magwito ka wugovelo.

Vahebheru 13:13

Ngu toneto, ahi humeni hi ya m'hingeta hahanze ka ditenda hi txi rwala kuruketelwa kwakwe.

Habhakuki 1:6

Nguko wonani taku na wusa Vakaldheya, vathu vo karata ni kukuluveta, va rerelako ka otshe mafu ngu kuanama ka ona, kasi kuhonyola makhalo o mbi va lumba.

Mika 2:13

Mkombi wa nzila a na thangela masoni kwawe; Vona va na phim, se ve wulela ngu txike, ve tshumela ve huma ngu txona; se mfumeli a na thangela masoni kwawe, kambe Mkoma a na va ha mbanza kwawe.

Isaya 30:33

Nguko txikho txi lulamisilwe kukhukhela nyamnova, ina, kululamisetwe mfumeli; ene a lulamisile ngu kutshimisa ni kuanamisa; mtamo wakwe mndilo, kambe wu ku ni tikhuni to tala; kufuteta ka Mkoma ko fana ni ka mnambo wa txivavula, ku na txi dhivela.

2 Vafumeli 6:15

Se dijaha da Elixa m'thu wa Txizimu, di to wuka ni mixo ngutu di huma, na kuve dibutho di ti ti randete didhoropa ngu mahantxhi ni sikotxikani; sekoko dijaha dakwe di to m'gela tiya: Yowe! Awe nyamne wangu! Hi na maha txani kani?

Genesisi 19:24

Sekoko Mkoma a to wisa txivavula ni mndilo txitimwi ka didhoropa da Sodhoma ni da Gomora, si txi ta ngu nzumani, ka Mkoma Txizimu.

Luka 21:20

Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi.

Luka 19:43

Nguko ma nata masiku txitimwi kwako, aawa valala vako va nota kubhiyela ngu ona, ve kuranganyeta, ve ku tsivela ngu otshe madhawa.

Dhewuteronome 23:14

Nguko Mkoma, Txizimu txako, a tsimbilela hagari ka wugovelo wako, kasi ku kutxhatxhisa ni kuningela valala vako manzani kwako; ngu kumaha keto, wugovelo wako wu na va wo sawuleka, kasi ku asi ku tshuraleli, ngako a txi wona to biha kwako.

Masalmo 87:2

Ene wa di dhunda didhoropa da Jerusalema, wa ma dhunda matimba a Siyoni. Kupinda tinyumba totshe ta ka Jakobe.

Jobe 38:18

Mwendo ngu wuzivi wako u woni kuanama ka mafu kani? Ni zivise, ngako u txi tiziva totshe eto.