Mtuletelo 2:7 - Bhiblia Yo Sawuleka

⁷ Awu a ku ni tinzeve a na engise ati Moya wu embelako Mabanza: Ka wu a no xula, ni na m'tumelela kudya mndonga wa wutomi, wu ku paradhiseni ka Txizimu.

Mtuletelo 2:7 Referans Kwoze

Mtuletelo 2:17

Awu a ku ni tinzeve a na engise atile Moya wu embelako Mabanza: Ka wule a xulako, ni na mu tsunulela mana yawa ma nga siwa, ni na mninga kambe dirigwanyana do basa, dirigwanyana di ka dona ku nga bhalwa ditina da diphya, adi di si ziwiko ngu m'thu, hahanze ka wule a di amukelako.”

Mtuletelo 2:11

Awule a ku ni tinzeve a na engise ati Moya wu embelako mabanza. Awu a xulako kha na mbi va ni kuxaniswa ngu lifo la wumbidi.”

Matewu 11:15

Awu a ku ni tinzeve to engisa a na engise!”

Mtuletelo 13:9

Awu a ku ni tinzeve a na engise.

Matewu 13:43

Se valulami va na phatima nga ditambo Mfumoni ka Tate wawe. Awu a ku ni tinzeve a na engise!”

Matewu 13:9

Awule a ku ni tinzeve to engisa, a na engise!”

Mavingu 11:30

Mihando ya m'thu wo lulama mndonga wa wutomi, se wule a manako mihefemulo a txharihile.

Mtuletelo 22:14

Va katekile avale va kuwulako tinguwo tawe kasiku ve mana txyavelo ka mndonga wa wutomi, ni kusikota kuwulela didhoropani ngu ha sikeni ka dona.

Mtuletelo 21:7

Awu a no xula a na amukela thomba yiya, se ani ni na va Txizimu txakwe, ene a na va mwanana wangu.

Luka 23:43

Ene a mu xamute a txi khene: “Kha ditshuri na kugela tito: Nyamsi, u na va kumweko ni nani Paradhiseni.”

Genesisi 2:9

Se Mkoma Txizimu, a to maha ti to ku txi mila totshe tixaka ta mindonga ha mafuni, ayi yi tsakisako ni ku yi wona, ni yi yi ku ni mihando yo tshamba yo dyiwa, ni mndonga wa wutomi hagari ka thembwe, ni mndonga wa ta tinene ni to biha.

Mtuletelo 22:17

Moya ni txiwutwa va womba va txi kha vona: “Ngono!” Awule a engisako a na wombe nene a txi khene: “Ngono!” Awule a ku ni ditora, a na te. Awule a ti lavako a na amukele mahala mati a wutomi.

Marku 7:15

Ku walo txilo txi tako ngu hahanze ka m'thu, txi wulelako mndani kwakwe, txi sikotako ku mu bihisa; aniko asi si humako ngu mndani kwakwe ngu sona si mu bihisako.

Mtuletelo 22:2

Hagari ka mtendela wa didhoropa ni mabambe ka mnambo, ngu khe ni khe, ku ni mndonga wa wutomi, awu wu ningako mihando digumi ni kambidi ngu dilembe, ngu kuveleka mtxima ni mtxima: Mazokoro a wona ma thuma kuhanyisa mifumo.

1 Vakorinto 2:10

Aniko, kwathu, Txizimu txi si wonekisile ngu Moya wa txona wo Sawuleka, awu wu zivako totshe, hambi tile i ku ta wutumbu wa kueta wa Txizimu.

Johani 16:33

Ni mi gete timhaka tiya kasiku, kwangu, mi va ni kudikha. Mi nava ni sixaniso mu ditikoni, kambe tsanani msana, ni di xute ditiko.”

Ezekhiyele 28:13

U ti ti maneka Edheni, thembweni ka Txizimu; u fenengetwa ngu otshe marigwi a lisima: I ku sardhoni, topazi, dhayimani, turkeza, onekisi, jasiperi, safira, karbhukulu, esmeraldha, ni nzalama, i ku mthumo wa tingoma tako ni makhombela ako, si ti ti kwako; si nga lulamiselwa ka ditshiku dile u nga vangwa ngu dona.

Mavingu 13:12

Kuverela ko swela ka karalisa mbilu, aniko kuhoka ka tile ti navelwako, mndonga wa wutomi.

2 Vakorinto 12:4

a to hukwa e yiswa paradhisini, a txi engisa mapswi awa ma si wombekiko, aawa m'thu asi tumetiswiko ku ma womba.

Ezekhiyele 31:8

Mikedhari yi ti si sikoti ku wu phumelisa thembweni ka Txizimu, misululwani yi ti si dingana ni madhavi a wona, ni mikhungu yi ti si fani ni madhavi a wona amaphya; ku ti si nga ni mndonga wo tshura kufana nawo, thembweni ka Txizimu.

Mavingu 15:4

Mndonga wa wutomi, ngu lidimi li li hanyako, kambe wubihi wa lona, wa funya muhefemulo.

Mtuletelo 15:2

Ni woni kambe txo nga Linene la ngilazi yo pataniswa ni mndilo ni va va nga xula Txikalani, ni txithombe, ni txikombiso, ni txibalo txa ditina da txona: Va ti emile txitimwi ka Linene la ngilazi na va di ñote tiharipa ta Txizimu,

Mtuletelo 14:13

Konako ni to engisa dipswi da kuta ngu nzumani, di txi kha dona: “Bhala u txi khawe: Va katekile vafi vava, kukhukhela konkuwa va felako ka Mkoma. Ina, kuwomba Moya, va na humula ka mikaralo yawe, nguko mithumo yawe ya va heleketa.”

Mavingu 3:18

Wutxhari mndonga wa wutomi ka vale va wu ñolisisako, kambe va katekile votshe vale va wu veketako.

Marku 4:9

Se a txi khene: “Awu a ku ni tinzeve to engisa, a na engise.”

Luka 8:8

Aniko timwani ti to wela ha mafuni ka kunene, ti txi kula, ti veleka ngu dizana.” Ngako a di wombile-to, a to huwelela a txi khene: “Awu a ku ni tinzeve ta kuengisa a na engise.”

1 Johani 2:13

Ni bhalela anu vatate nguko ma m'ziva awule i ku ene kukhukhela makhatoni. Ni bhalela anu vavaphya, nguko mi xute m'bihi. Ni mi bhalete anu, vanavangu nguko ma m'ziva Tate.

Marku 7:16

[Awu a ku ni tinzeve ta kuengisa a na engise.”]