Mtuletelo 11:3 - Bhiblia Yo Sawuleka

³ Aniko ni na ninga mtamo ka tifakazi tangu ta timbidi kasiku ti txi profeta, ti di ambate masaka, mndani ka 1.260 wa masiku.”

Mtuletelo 11:3 Referans Kwoze

Mtuletelo 12:6

Se wamsikati e thava e tsula txiwulani, ahawa a nga ti lulamisetwe wukhalo ngu Txizimu, kasi kuve zumba ve mphamela sakudya mndani ka txipimo txa 1.260 wa masiku.

Mtuletelo 11:2

Se mtendela wa hahanze ka Dithepele, wu leke u nga wu pime, nguko wona wu ningetwe ka vamatiko, ava va no kandetela ngu mikondo didhoropa do sawuleka txipimo txa mune wa magumi a mitxima ni yimbidi.

Mtuletelo 13:5

Txi to ningwa txisofu kasi kuwomba mapswi o eyisa ni o ruka Txizimu, ni mtamo wo thuma mbimo ya kudingana mune wa magumi a mitxima ni mitxima yimbidi.

Dhewuteronome 19:15

“Fakazi yimweyo yokha kha yi dingani ka mhaka ya m'thu, ni ka yihi mhaka yo biha mwendo txionho txokari, txi nga mahwa. Mhaka yi na tsaniswa ngu wufakazi wa vathu vambidi mwendo vararu.

Mithumo 13:31

Se ngu masiku o tala a ti wonekisile ka vale va nga ti kwete nayo kukhukhela Galileya kala kuya hoka Jerusalema, vonavo konkuwa i ku tifakazi takwe hagari ka ditiko:”

Mithumo 1:8

Aniko, mi na amukela mtamo wa Moya wo Sawuleka, wu no txhika txitimwi kwanu, se mi na va mi di tifakazi tangu ahawa Jerusalema ni ka dotshe ditiko da Judheya ni Samariya, kala magemeta-mitshi ka ditiko.”

Luka 24:48

Se anu mi tifakazi ta mhaka yiya.

Isaya 22:12

Se Mkoma, Mkoma wa Mabutho a Tiyimbi, a na mi dhana ka ditshiku dile, kuya dila, ni kuya peka huwa, ni ku kuyula misungo, ni ka muambalisi wa masaka.

Genesisi 37:34

Sekoko Jakobe a to vharula syambalo sakwe, e phamba disaka txiwununi kwakwe, a txi maha mkhwasi, ni masaluko o dila mwanana wakwe, ngu mbimo ya kulapha.

2 Vakorinto 13:1

Adiya nda wuraru ni txi ta kheyo kwanu. Yotshe mhaka yi nata tsaniswa ngu wufakazi wa vathu vambidi mwendo vararu.

Mithumo 2:32

Se ngene Jesu wu Txizimu txi nga mu wusa; hotshethu hi tifakazi ta mhaka yiya.

Johani 15:27

Nananu mi na va mi di tifakazi tangu, nguko mi ni nani kukhukhela kukhatani.”

Matewu 18:16

Aniko ngako asi kuengisi, teka mmwani m'thu, mwendo vambidi u txi tsula navo, kasiku yotshe mhaka yi txi lamulwa ngu wufakazi wa vathu vambidi mwendo vararu.

Sidilo 2:10

Sekoko madhota a dihorana da Siyoni ma khalahatshile ha ka mafu, ma txi dwe; me ti theletela lithulu ha misungo ma txi ambala masaka; votuma va Jerusalema va namisile misungo ha mafuni.

Jobe 16:15

Rungani mkhwasi aha ka nyama yangu, se mi rindilita msungo wangu lithuluni.

1 Makronika 21:16

Se ngako Dhavhidha a di guletile maso akwe, a to wona Ngelozi ya Mkoma, yi di ngu hagari ka mafu ni nzuma, ni ditxhari do swomolwa manzani ka yona, yi di di nawulutile txitimwi ka Jerusalema; sekoko Dhavhidha ni madhota, va ti fenengete tinguwo ta masaka, ve khizama ve namisa tikhohe hahatshi.

Mitengo 11:26

Kambe wugoveloni ku to sala vavamna vambidi, mmweyo wawe a ti dhanwa ku i Eldhadhe, awu mmwani i Medhadhe. Moya wu to ya khandama txitimwi kwakwe (ngako i ngadi vamwevo va vale va ngadi bhatwe, hambiko va nga si ngaho ditendani), se va to profeta kona wugoveloni.

Mtuletelo 19:10

Konako ni to ti wisa minengeni ka ngelozi, kasiku ni yi khozela, aniko yona yi to ni tsimba, yi txi kha yona: “Lambi! U nga mahe eto. Ani ni txithumi kufana ni nawe ni vakakwanu va veketako wufakazi wa Jesu. Txizimu ngu txona u fanelako ku txi khozela!” Kunene wufakazi wa Jesu ngu wona i ku mtamo wa wuprofeti.

Mtuletelo 1:5

ni ka Jesu Kristu i ku fakazi ya kuthembeka, matiwula ya vafi, Mkoma wa votshe vafumeli va mafu. Kwakwe, ene a hi randako, ene a nga hi kuwula sionho sathu ngu mnoha wakwe,

Mithumo 3:15

mi txi dayisisa mningi wa wutomi. Txizimu txi mwusile ngu ka vakufa; athu hi tifakazi ta eyo mhaka.

Dhaniyeli 12:7

Se ni to pfa wamwamna wule a nga ambala syambalo sa linyu, a nga ti ti emile txitimwi ka mati a mnamboni, mbimo yi a nga guleta dianza dakwe da txinene, ni dianza dakwe da txibhabha e komba nzumani, se a to xambanya ngu wule a hanyako ngu ha ku si gwitiko, ti to msana ka mbimo yokari, ka timbimo ni ka hafu ya mbimo, ni mbimo yile va nova va di hetile kuhoxota mtamo wa vathu vo sawuleka, totshe timhaka tiya ti nava ti di humelete.

Dhewuteronome 17:6

Ene a na dawa ngu mhaka ya tifakazi timbidi mwendo tiraru; ni wammweyo m'thu kha na kudawa ngu mhaka ya wufakazi wa m'thu wammweyo dwe.

Mtuletelo 20:4

Konako ni to wona sikhalo sa wukoma. Se avava va nga ti khalahatshile ka sona va to ningwa mtamo wo lamula. Ni to wona kambe mimoya ya vale va nga wilwa misungo ngu mhaka ya wufakazi wa Jesu ni Dipswi da Txizimu; ni vale va nga mbi khizamela txikalani ni txithombe txa txona. Kambe kha va amukela txixambanyo txa txona ha timbanza kwawe mwendo manzani kwawe. Vona va tshumete ve hanya ve fuma kumweko ni Kristu, txipimo txa 1.000 wa malembe.

Vaefesu 4:11

Se ene ngene a nga ninga vamwani mthumo wa wupostoli, vamwani mthumo wa wuprofeti, vamwani mthumo wa wuvhangeli, vamwani mthumo wa wudyisi ni wugondisi,

1 Vakorinto 12:28

Avale Txizimu txi nga va veka, mndani ka dibanza, kuthanga txi vekile vapostoli, ka wumbidi txi vekile vaprofeti, ka wuraru txi vekile vagondisi. Ngu msana kuta sihiwa sa kumaha sidiwukiso, sa kuhanyisa valwali, sa kuvhuna vamwani, sa kuthangelela mthumo, kuwombawomba tidimi to tala.

Johani 3:27

Johani a to xamula a txi khene: “M'thu kha sikoti kumana txilo ni txa tximwetxo, ngako a sa ningwa ngu nzuma.

2 Samuwele 3:31

A to khene koko, Dhavhidha ka Jowabhi ni ka vathu vale a nga ti ti navo: Vharulelani syambalo sanu; mi sunga tinguwo ta masaka mi mdila Abhineri. Se mfumeli Dhavhidha a to londisela txithathe txi txi nga ti rwate txirumbi.

1 Vafumeli 21:27

Mbimo yile koko, Akabe a nga pfa mapswi awa, a to vharula syambalo sakwe, a txi fenengeta mmidi wakwe ngu disaka, a txi ti tona; se a ti otela ha masakani, a txi tsimbila-tsimbila, ni dikhodho.

2 Vafumeli 19:1

Se mbimo yile Ezekhiya a nga ti mu engisete, a to vharulela syambalo sakwe, e ti fenengeta ngu disaka, se e wulela Nyumbani ka Mkoma.

Nehemiya 9:1

Se ka ditshiku da magumi mambidi ni mune, ka wona mtxima wuwa, vanana va ka Israyeli va to sengeletana, ve ti tona sakudya, va di ambate syambalo sa masaka, va di ti theletete mafu ha msungo kwawe.

Masalmo 69:11

hambi ni txi ambala mkhwasi vona va ni tseketsela.

Jeremiya 1:10

Wona, ka diya ditshiku, ni kuveka txitimwi ka matiko ni mifumo, kuva u dula ni kukhundumusa, kuhasamula ni kuwisa, kuaka ni kuphaya.”

Ezekhiyele 4:6

Se u di mahile tiya, u na otela kambe ngu didhawa dako da txinene, u rwala txionho txa ka Judha, amu ka mune wa magumi a masiku; ni ku ningile ditshiku dimwedo ka dilembe ni dilembe.

Dhaniyeli 7:25

Se a na womba mapswi o wukela Nyatxitimwi, e hangalasa vasawuleki va Nyatxitimwi, kambe a na phemberusa timbimo ni milayo; vasawuleki va na ningelwa manzani kwakwe ngu mbimo yokari, ni timbimo, ni hafu ya mbimo.

Dhaniyeli 8:14

Se a to khene kwangu: Kala 2.300 wa mixo ni minova, se wukhalo wo sawuleka wu na sawulekiswa.

Joyeli 1:13

Ti khutareleni mi ti dilela anu vaphaxeli; kumani anu vathumeli va txiluvelo; wulelani mi pinda mi di ambate masaka, ni wusiku anu, vathumeli va Txizimu txangu; nguko miningelo ya sakudya ni sa kusela si nga wilwa, nza nyumbani ka Txizimu txanu.

Jona 3:5

Se vathu va Ninivha va to kholwa ka Txizimu, se ve nuwela mhaka ya kutitona. Se va to ambala masaka, kukhukhela ka wa hombe kala ka wam'dotho.

Jona 3:8

Aniko vathu ni sihari si nave si di fenengetilwe ngu masaka, se si dila ngutu ka Txizimu, si txi hunduluka, tximwetxo ni tximwetxo ka nzila ya txona yo biha, ni kulwa kule ku kuho manzani ka sona.

Matewu 11:21

“Dikhombo dako, Korazini! Dikhombo dako, Bhetsayidha! Nguko sidiwukiso si si nga mahwa kwanu, idiku si ti mahilwe madhoropani ka Tiro ni Sidhoni, nga va di kombile kale kuhunduluka kwawe, ngu kuambala masaka ni kutola dikhuma.

Luka 10:13

“U na ni dikhombo awe Korazini! U na ni dikhombo awe Bhetsayidha! Nguko sixamaliso si si nga mahwa hagari kwanu, idiku si mahilwe Tiro ni Sidhoni, madhoropa awa, nga ma di hundulukile kale ngu kuphamba masaka ni kuzumba ha dikhumani.

Mtuletelo 11:6

Tona ti ni mtamo wa kuseka nzuma ti to ma si wi mati ka masiku a wuprofeti wa txona. Tina ni mtamo kambe wo hindula mati otshe me maha mnoha; tina ni mtamo wo peka mafu ngu mitungu yihi ni yihi, sotshe sikhati, ngako ti txi ti lava.