Mithumo 7:36 - Bhiblia Yo Sawuleka

³⁶ Ngene a nga va humisa ngu kumaha sidiwukiso ni sikombiso ditikoni ka Egipta, ni Lineneni ko Bhilivila, ni txiwulani, mndani ka mune wa magumi a malembe.

Mithumo 7:36 Referans Kwoze

Eksodha 14:21

Sekoko Mosi a to nawuluta dianza dakwe txitimwi ka linene, se Mkoma a to abanisa mati ka wotshe wusiku wule, ngu moya wa mtamo, wa kuta ngu wutxani; se linene li txi maneka li di omile.

Eksodha 12:41

Ka ditshiku di ku nga ti guma 430 wa malembe, mabutho a tiyimbi ta Mkoma ma manekile ma txi huma ditikoni ka Egipta.

Eksodha 33:1

Mkoma a to khene kambe ka Mosi: “Tsula, kwela ngu hawa, awe ni vathu va u nga va humisa ditikoni ka Egipta, ka ditiko dile ni nga xambanya ka Abrahamu ka Isaake ni txi khani: Ni na di ninga ka liveleko lako.

Eksodha 16:35

Se vanana va ka Israyeli va dyite manna mndani ka mtengo wa mune wa magumi a malembe kala va txi hoka ka ditiko di di nga akwa va dyite manna kala va txi hoka mihinganoni ka ditiko da Kanana.

Vahebheru 8:9

Kha txi na mbi fana ni txitumelelano txi ni nga txi maha ni vatate vawe, ka ditshiku di ni nga va ñola ngu diwoko, ni va humisa ditikoni ka Egipta. Nguko, vona kha va vekisa txitumelelano txangu; ngu toneto, kha na va khatalela, kuwomba Mkoma.

Mithumo 13:18

Se ngu mtamo wa diwoko da txona txi va humisile ka ditiko dileya, txi va mahela wumbilu txiwulani, mndani ka malembe o lava kudingana mune wa magumi.

Mithumo 7:42

Aniko Txizimu txi to va tshuralela txi va ningeta kukhozelani ka sikwata sa tiyimbi sa nzuma, nga ti ti nga bhalwa dibhukuni ka Vaprofeti, va txi khene: Anu va nyumba ya ka Israyeli, ina mi ni mahete magandelo ni timhamba txiwulani, mndani ka malembe a mune wa magumi kani?

Masalmo 95:10

Mune wa magumi a malembe ni swirekile,” niza ni txi khani: “Vathu vava va timbilu tawe ta va timeta, kambe kha va si zivi sileleto sangu!”

Nehemiya 9:10

U kombisile sixamaliso ni sidiwukiso ka Faro, ni ka sotshe sithumi sakwe, ni ka vathu votshe va ditiko dakwe, nguko wu ti zivile ti va nga xanisisa tona vathu vako, se ngu kumaha keto u ti manete ditina, kufana ni ti ti wonekako nyamsi.

Dhewuteronome 8:4

Syambalo sako kha sa sakala ha mmidi kwako, hambi mikondo yako kha ya simba hagari ka ona malembeyo a mune wa magumi.

Eksodha 3:20

Ngu mhaka yeto, ni na nawuluta dianza ni txi peka ngu dona ditiko da Egipta, ngu sixamaliso sotshe ni no si maha kwawe; msana ka toneto ngu kona ene a no mi leka mi txi tsula.

Masalmo 95:8

“Mi nga bangiseni timbilu tanu, kufana ni vakale vanu ditikoni ka Meribha; ku nga ditshiku dile va nga ti txiwulani ka Masa,

Johani 4:48

Sekoko Jesu a to womba a txi khene kwakwe: “Anu, ngako mi si woni sixamaliso ni sidiwukiso, kha mi kholwi.”

Vahebheru 3:8

mi nga bangiseni timbilu tanu, nga ati ti nga maheka kudukwani ngu ditshiku da txiduko;

Vahebheru 3:9

Ahawa vatate vanu va nga ni duka kona, kasiku va txi ni xola, ve wona mithumo yangu, mndani ka mune wa magumi a malembe.