Mithumo 5:30 - Bhiblia Yo Sawuleka

³⁰ Txizimu txa vatate vathu txi wusile Jesu, awule anu mi nga m'daya, ngu ku mu hayeka ha phandeni.

Mithumo 5:30 Referans Kwoze

Vagalatiya 3:13

Kristu a dihile kasiku a txi hi tirula ka dikhombo da kuruketelwa ngu Mlayo, ene a ti mahile wo ruketelwa ha wukhaloni kwathu, nguko Mibhalo yi kha yona: “A na ruketelwe wuhi ni wuhi a nga hayekwa ha phandeni.”

1 Pedro 2:24

Ene a nga rwala sionho sathu ngu mmidi wakwe, ha txihambanoni, kasiku, ngako hi txi fa ka txionho, hi na sikota kuhanya ngu kululama. Anu mi hanyisilwe ngu silonda sakwe.

Mithumo 10:39

Athu hi tifakazi ta yotshe mithumo yi a nga yi maha ditikoni ka Vajudha, didhoropani ka Jerusalema. Vona kambe va mu date ngu ku mu hayeka ha phandeni.

Mithumo 22:14

Se ene a to ni gela ku khene: ‘Txizimu txa vatate vathu txi ku sikete kasiku u txi ziva kuranda ka txona, kuwona Mlulami ni kuengisa dipswi da kuhuma ngu txisofuni kwakwe.

Mithumo 13:33

Txizimu txi tatisile txithembiso txiya kwathu, vanana vawe, ngu kuwusa Jesu, nga ti ti nga bhaliswa tona amu ka dibhuku da Masalmo, va txi kha vona: ‘Awe u mwanana wangu, ni ku velekile nyamsi.’ ”

Mithumo 3:26

Txizimu txi khatile ngu nganu ku mi wuyisela Txithumi txa txona Jesu, txi m'rumela ku ta mi katekisa, kasiku mi hunduluka, mmwani ni mmwani kubihani kwakwe.”

Mithumo 2:32

Se ngene Jesu wu Txizimu txi nga mu wusa; hotshethu hi tifakazi ta mhaka yiya.

Luka 1:72

Kasiku e maha wumbilu ka vatate vathu, a txi khumbuka txitumelelano txakwe txo sawuleka.

Luka 1:55

a nga wu thembisa ka vakokwani vathu, ka Abrahamu ni liveleko lakwe kala kupinduka.”

Ezra 7:27

A na dhumiswe Mkoma, Txizimu txa vatate vathu, a nga thela timhaka tongeto mbiluni ka mfumeli, kuva hi tshurisela Nyumbani ka Mkoma, kona Jerusalema.

1 Makronika 29:18

Mkoma Txizimu txa vatate vathu, Abrahamu, ni Isaake, ni Israyeli, vekisa eto mbimo yotshe, kunavela ka mipimiso ya timbilu ta vathu vako; u rendekelisa timbilu tawe kwako.

1 Makronika 12:17

Se Dhavhidha a to huma eya womba-womba navo, a txi khene: Ngako anu mi txi ta kwangu ngu kudikha ku ta ni vhuna, mbilu yangu yi na ti pata ni nanu; kambe ngako mi txi lava ku ta ni ningela ka valala vangu, ni sa onha txilo ngu manza angu, Txizimu txa vatate vathu txi na ti wone, txi lamula.