Mithumo 2:2 - Bhiblia Yo Sawuleka

² Ngu txidhukisa, ku to pfala txiwuta, txi txi ta ngu nzumani, txo fana ni kufuteta ka diphuho da txihuhuri txa mtamo, txi nga tata yotshe nyumba yi, va nga ti ka yona.

Mithumo 2:2 Referans Kwoze

Mithumo 4:31

Ku ti ngako va di khongete, wukhalo wu va nga ti sengeletani ka wona, wu to dekadekiswa, se votshe ve tala ngu Moya wo Sawuleka, ve womba dipswi da Txizimu ngu kutsana.

1 Vafumeli 19:11

Se Mkoma a to khene ka Elija: Huma hahanze u txi ya maneka mmangoni masoni ka Mkoma. Se Mkoma a txi pinda, kumweko ni moya wa hombe wa mtamo, wu nga txi bhandelela mmango, ni kukhundumusa marigwi masoni ka Mkoma; aniko Mkoma a ti si ngaho ka moya wule; wu di pindile moya wule ku to zinginika mafu; emo kambe asi ngaho Mkoma.

Masalmo 18:10

Txi puruma txi di gadhile dikerubhima, txi tsimbila txi di mabhapini ka diphuho.

Johani 3:8

Diphuho di futeta mu di randako kona, se u pfa txiwudi txa dona, aniko khu ti zivi ti to di ta ngu hani ni ti to di ya hani. Ngu toneto, ti mahekako ni ka votshe va va nga velekwa ngu Moya wa Txizimu.”

Isaya 65:24

Se ku na maheka ti to ni va xamula, va sanzi kupeka huwa; va txi ngadi ve womba-womba ni na va engisa.

Malakiya 3:1

Wonani taku, ni mi rumela ngelozi yangu, ayi yi no ni lulamisela nzila, se msana keto, Mkoma wule anu mi mlavako, a nata ngu kukuluveta dithepeleni kwakwe, Ngelozi ya txitumelelano, ayile anu mi yi verelako; wonani taku yata, kuwomba Mkoma wa Mabutho a Tiyimbi.

Ndando ya Tindando 4:16

Khukha, moya wa wuphemba, ngono awe moya wa wulambwe; futeta thembweni kwangu, kasi kupfalisa kunungela ka yona. Ha! I ti ku txota txirandwa txangu thembweni ka txona, txi ta dya mihando ya txona yo tshamba.

Luka 2:13

Kunukunuko dibutho da yimbi ya nzumani di to patana ni ngelozi, ve dhumisa Txizimu, va txi kha vona:

Mithumo 2:3

Konaho va to wona so nga tidimi ta mndilo, ti nga huma ti txi abaneka, limwelo ni limwelo li txi ya khandama txitimwi ka mmweyo ni mmweyo wawe.

Mithumo 2:6

Txikhati txile va nga engisa diguwa dileya da txihuhuri, vathu va to sengeletana wukhalo wumwewo, ve tala ngu kuxamala, nguko mmwani ni mmwani a ti ti va engisa va txi womba-womba ngu lidimi la ka kwawe.

1 Pedro 1:12

Txizimu txi kombisile ka vaprofeti vava ti to i ti si nga so lumba vona, aniko si ti mahelwa anu, simaha siya mi ziviswako konkuwa ngu vale va mi txhumayelako Evhangeli ngu mtamo wa Moya wo Sawuleka, wu wu nga rumelwa ngu nzumani, i ku sikombiso si tingelozi tipune ti navelako ku si wona.