Mithumo 16:17 - Bhiblia Yo Sawuleka

¹⁷ Se a to londeta Paulo ni nathu, na a txi kwangula, a txi khene: “Vathu vava mbathumeli va Txizimu Nyatxitimwi; vona va mi zivisa nzila ya kuhanyisa.”

Mithumo 16:17 Referans Kwoze

Johani 14:6

Jesu a to mu gela a txi khene: “Ani ngani Nzila, Ditshuri ni Wutomi. Kha nga ho awule a tako ka Tata, i si nga ngu ngani.

1 Pedro 2:16

Hanyani nga vathuseki; kambe, mi nga thumiseni wuthuseki wanu kasi kufenengeta wubihi, aniko hanyani nga sithumi sa Txizimu.

Marku 5:7

Se a txi peka huwa ngu dipswi da hombe a txi khene: “I mhaka muni u ku nayo ni nathu, awe Jesu Mwanana wa Txizimu Nyatxitimwi?”

Dhaniyeli 6:20

A di hokile diphalani, a to dhana Dhaniyeli ngu dipswi da kuxaniseka, a txi khene: Dhaniyeli, awe txithumi txa Txizimu txi txi hanyako! Ina Txizimu txako txi u txi thumelako masiku otshe, txi sikoti ku kuhulukisa ka tingonyamo, kani?

Dhaniyeli 3:28

Se Nebhukodhonosori a to womba, a txi khene: Ku na bongwe Txizimu txa Xadreke, ni Mixake, ni Abhedhi-Nego, txile txi nga rumela Ngelozi ya txona ku ta hulukisa sithumi sa txona, sile si nga themba ka txona, nguko kha va lava kulondisa dipswi da mfumeli, ve tumela kuningela mmidi yawe, kasiku va si thumeli hambi kukhozela tximwani txizimu txokari, hahanze ka Txizimu txawe.

Dhaniyeli 3:26

Sekoko Nebhukodhonosori a to tshuketa haditimbani ka txikho txa mndilo wo tura ngutu; e kwangula a txi khene: “Xadreke, Mixake, Abhedhi-Nego, anu sithumi sa Txizimu Nyatxitimwi, humani, ngonani kheno!” Sekoko Xadreke, Mixake ni Abhedhi-Nego va to huma ngu hagari ka mndilo.

Luka 4:41

Madhimoni ma to huma ka votala, me huwelela ma txi: “Awe u Mwanana wa Txizimu.” Kambe Jesu a to ma dhusa e ma tsimba kuwombawomba, nguko ma ti m'ziva ta tinene ti to ngene Mesiya.

Luka 4:34

a txi khene: “Ha! Nji txani u ku natxo ni nathu, awe Jesu wa Nazareta? U tete ku ta hi lovisa, kani? Na kuziva ti to ngawe mani, awe u Msawuleki wa Txizimu.”

Luka 1:79

ku ta woninga ava va manekako mtemani ni mtsudini ka lifo, ni ku hi tsimbilisa ngu nzila ya kudikha.”

Jona 1:9

Se ene a to va gela a txi khene: Ani ni Muhebheru, ni thava Mkoma, Txizimu txa nzumani, awu a nga maha linene ni mafu a kuoma.

Masalmo 57:2

Ni na dila ka Txizimu, Nyatxitimwi, Txizimu txi txi ni ningako sotshe si ani ni si lavako.

Mithumo 19:13

Se Vajudha vokari, i nga ti vo tsimbila ve tovela madhimoni, va to duketa ni vona kukhongela ngu ditina da Jesu txitimwi ka vale va nga ti ni mimoya yo biha, va txi kha vona: “Ani na kudhusa ngu Jesu wu a wombwako ngu Paulo.”

Mithumo 18:26

Ku ti ngako Prisila ni Akila va di mu engisile, va to mteka ve mu txhamusela ta tinene Nzila ya Txizimu.

Luka 20:21

Se va to mu wotisa, va txi kha vona: “M'gondisi, ha tiziva ti to wa womba-womba ni kugondisa kha kwati ni kululamisa, kambe khu woni ngu khohe ya m'thu, aniko u gondisa nzila ya Txizimu ngu ditshuri.

Luka 1:77

Kasi kuzivisa kuhanyiswa ka vathu vakwe ni kudivalelwa ka sionho.

Marku 12:14

Vona va to ta kwakwe va txi kha vona: “M'gondisi, ha tiziva ti taku u womba ti ti nga tsana ni ti taku khu thavi m'thu, nguko khu sawuli tikhohe ta vathu; aniko u gondisa nzila ya Txizimu ngu ditshuri. Ina hi na ni fanelo yo humisa mkhupo ka Khezari mwendo hi nga tona kani? Ha khupa mwendo kha hi khupi kani?”

Marku 1:24

“Nji txani u ku natxo ni nathu, Jesu wa Nazareta kani? U tela ku ta hi lovisa kani? Ani na kuziva ti to ngawe mani: U Msawuleki wa Txizimu.”

Matewu 22:16

Se va to m'rumela vagondiswa vawe ni va ka Herodha, va txi ya kha vona: “M'gondisi, ha tiziva ti to u na ni ditshuri ni ti to u gondisa nzila ya Txizimu ngu ditshuri, u si khatali ngu m'thu, nguko khu yi ngu txiemo txa m'thu.

Matewu 8:29

Vona va to peka huwa va txi kha vona: “I mhaka muni hi ku nayo ni nawe, Jesu Mwanana wa Txizimu kani? U tile hawa ku ta hi xanisa, yi sinzi kuhoka mbimo kani?”

Mika 6:6

Ni na ya ni di ni txani masoni ka Mkoma, ni txi ya nama ka Txizimu Nyatxitimwi kani? Ni nata masoni kwakwe ni di ni miphaxo yo hiswa, ni marole a dilembe dimwedo kani?

Dhaniyeli 6:16

Sekoko mfumeli a to leleta ti taku kutiswa Dhaniyeli, e rinzwa diphalani ka tingonyamo. Se mfumeli a to womba ka Dhaniyeli, a txi khene: “Txizimu txako, a txi u txi thumelako mbimo yotshe txi na kuhulukisa!”

Dhaniyeli 5:21

Se a to thaviswa hagari ka vanana va vathu, mbilu yakwe yi hunduka yi fana ni ya sihari, eya zumba ni timbongola ta txitinga; va to mmaha e dya mwasi, kufana ni tihomu, mmidi wakwe wu nakaniswa ngu mwando wa nzumani, kala kuza e tiziva ti to, Txizimu Nyatxitimwi, txa fuma txitimwi ka mifumo ya vathu, ni ku txa ninga wukoma, ka wule txi mrandako.

Dhaniyeli 5:18

Awe mfumeli, Txizimu, Nyatxitimwi, txi ningile tate waku, Nebhukodhonosori, mfumo, wuhombe, wudhumo, ni wudhundo wa hombe.

Dhaniyeli 4:2

Ni to wona ti to ndinene kwangu ku ni mi komba sikombiso ni sidiwukiso si Txizimu, Nyatxitimwi, txi ni mahelako.

Masalmo 78:35

Sekoko va ti ti khumbula ti to Txizimu i m'vhikeli wawe, ni ti to Txizimu Nyatxitimwi i ti mtiruli wawe.

Luka 8:28

Ku ti ngako a di woni Jesu, a to kwangula e ti wisa hahatshi masoni kwakwe, a txi womba ngu dipswi da hombe a txi khene: “I mhaka muni ni ku nayo ni nawe, Jesu, Mwanana wa Txizimu Nyatxitimwi? Na ku kombela, u nga ni xanise.”

2 Pedro 2:2

Vathu vavangi va na londeta tigondo tawe ta manyala, se ngu mhaka yawe, nzila ya ditshuri yi na nyetwa.