Mithumo 15:18 - Bhiblia Yo Sawuleka

¹⁸ Awu a nga zivisa simaha siya kukhukhela ka timbimo ta kale.’ ”

Mithumo 15:18 Referans Kwoze

Vaefesu 3:9

ni kukombisa masoni ka votshe txyavelo txa makungo awa ma nga ti sisilwe ngu kale ni kale ngu Txizimu, m'vangi wa sotshe,

Vaefesu 1:4

Ngu kota yakwe, Txizimu txi hi sawute, di sinzi kumahwa ditiko, kasi ku hi txi mana wululami wa lirando ni kuzumba hi si nga ni txisolo masoni ka txona.

1 Pedro 1:20

Ene a nga ziwa ngu kale, na ku sinzi kumahwa ditiko, kambe a txi wonekiswa ka sikhati sa nyamsi, asi i ku so gwitisa, ngu mhaka yanu.

Vaefesu 1:11

Ngu ngene Kristu kambe, Txizimu nathu txi hi mahile vadyi va thomba ya Txona, nga ti txi nga ti wonisa tona txona txi kotako totshe ngu mtamo wa kuranda ka txona,

Mithumo 17:26

Na txi txi khukhela ka m'thu mmweyo, txi vangile totshe tixaka ta vathu, kasiku ve eneta otshe mafu, txi va vekela tinyango ti ti nga sawulwa ngu txona ni mihingano ya muwa va fanelako kuzumba kona:

Mitengo 23:19

Txizimu kha txi na makuhu nga m'thu. Lambi, txona hi nga mwanana wa m'thu wo txitxa-txitxa. Txizimu hi nga txo womba dwe txi si mahi, ina kha txi mahi ti txi nga womba kani? Kasi hi nga txo womba ti txi tatiseka kani?

2 Vatesalonika 2:13

Kasi i di athu, hi fanete kubonga Txizimu yotshe mbimo ngu kota yanu, vanathu, mi randwako ngu Mkoma, nguko Txizimu txi mi sawute kukhukhela makhatoni, kasiku mi txi huluswa ngu Moya wu wu basisako, ni kukholwa ka ditshuri.

Matewu 13:35

kasi kutatiseka ati ti nga wombwa ngu mprofeti, a nga khene: “Ni na tula txisofu txangu ni womba-womba ngu sidinganiso; ni nuwela timhaka ti ti nga ti sisilwe kukhukhela kumahwani ka ditiko.”

Mtuletelo 17:8

Txikalani txi u nga txi wona, txi ti ti ho, aniko kha txi swi txi diho; txi hafuhi ni kuhuma ngu diphalani ko hokoma, kambe txi ya kulovani: Vaaki va ha mafuni, avava matina awe ma nga mbi bhalwa dibhukuni ka wutomi, kukhukhela ditiko di tumbuluka, va na xamala mbimo yi va no wona txikalani, nguko txona txi ti ti ho, konaku kha txiswi txi diho, aniko txi na tshumela txi humelela.

Mtuletelo 13:8

Votshe vaaki va ha mafuni va na txi khozela, avava matina awe ma nga mbi bhalwa, kukhukhela makhatoni ka ditiko, amu ka dibhuku da wutomi da Txinvutana, atxi txi nga bhaywa.

Matewu 25:34

“Sekoko Mfumeli a na gela vale va ku txinene a txi khene: ‘Ngonani anu mi nga katekiswa ngu Tate wangu, amukelani thomba ya Mfumo, ayi mi nga lulamiselwa kukhukhela di txi mahwa ditiko.

Isaya 44:7

Se i mani a no dhana kufana ni nani, e zivisa eto, e ti txhatxhameta masoni kwangu, kukhukhela ku ni nga txhatxhameta vathu ngu ha ku si gwitiko kani? Awu a zivisako asi si tako, ni si si ku ngadi si txi nata.

Isaya 45:21

Zivisanani mi tshuketa, mi maha txikungo motshenu; i mani a nga zivisa tiya kukhukhela kale kani? I mani kukhukhela kaleko a nga zivisa kani? Ina hingani Mkoma kani? Se kha ku na tximwani Txizimu hahanze kwangu; Txizimu txo lulama, ni M'uhanyisi, kha txingaho, hahanze kwangu.

Amosi 9:12

kasi kuve mana asi si nga sala ka ditiko da Edhomi, ni otshe matiko ale ma dhanwako ngu ditina dangu, kuwomba Mkoma, a mahako timhaka tiya.

Zakariya 14:7

Aniko di na va ditshiku do ziwa ngu Mkoma; kha ku na mbi va ni mitshikari mwendo wusiku; se ku na maheka taku, ngu mbimo ya mitshikari ku nava ni kuwonekela.