Mithumo 15:1 - Bhiblia Yo Sawuleka

¹ Sekoko vamwanyani va kuta ngu Judheya va ti ti gondisa vanawe, va txi kha vona: “Ngako mi si tumeli wukwera, kota kuruma ka Mlayo wa Mosi, kha mi na mbi sikota kuhanyiswa.”

Mithumo 15:1 Referans Kwoze

Vagalatiya 5:6

Nguko ka Jesu Kristu, wukwera hi nga wa txilo, hambi wukhutu ni wona hi nga txilo, hahanze ka likholo li li ti kombako ngu mithumo ya lirando.

Mithumo 15:5

Aniko vamwani va mtxawa wa Vafarisi, ava va nga amukela likholo, va to khukha va txi kha vona: “Ta laveka ku vamatiko ve yiswa wukwerani ni ku leletwa ti to ve veketa Mlayo wa Mosi.”

Vakolosa 2:8

Ti woneleni kasiku ni wammweyo asi mi mahi tikhumbi ngu mawombelo a marindi a wutxhari wa vathu, ngu kulondetela siheno sa vathu ni mtumbuluko wa mafu, i si nga ngu Mlayo wa Kristu.

Levhi 12:3

Se ka ditshiku da wutxhanu ni mararu mwanana a na yiswa wukwerani.

Mithumo 15:24

Ngako hi di engisile to vamwanyani vokari, va ka kwathu, va tile kwanu, na va sa rumelwa ngu ngathu, va ta mi dhukisela, va txi mi thela kukanakana timbiluni kwanu ngu mapswi awe,

Johani 7:22

Mosi a mi ningile wukwera (na i si nga ti to wukwera wu khatilwe ngu Mosi, aniko wu huma ka vakokwani), se ma yisa wukwerani m'thu ngu Sabbata.

Vagalatiya 2:1

Msana ka digumi da malembe ni mune, ni tshumete ni kwela ni ya Jerusalema, kumweko ni Bharnabhasi, ni txi teka kambe ni nene Titosi.

Mithumo 15:3

Ku ti ngako va di longetwe sotshe ve heleketwa ngu Dibanza, va to pinda ngu Fenikiya ni Samariya, va txi womba-womba ngu kuhunduluka ka vamatiko, se vanawe ve tsakiswa ngutu ngu mhaka yiya.

Mithumo 6:14

nguko athu hi muengisile, a txi khene: “Jesu wa Nazareta a na fuvisa Wukhalo wuwa e txitxa ni mahanyelo awa hi nga ningwa ngu Mosi.”

Vakolosa 2:16

Ngu toneto, m'thu a nga thuke a txi mi abanisa ngu mhaka ya kudya mwendo kusela, mwendo mibuso, kutsakela kumeka ka mtxima mwendo Masabbata.

Mithumo 21:20

Vona va ti dhumisa Txizimu ngu tile va nga ti tiengisa. Va txi gela Paulo, va txi kha vona: “Wa ti wona, mwanathu, ti to magumi a mazana a Vajudha va amukete likholo, hambiko votshe i ku vakhutaleli va Mlayo;

Mithumo 15:22

Sekoko, Vapostoli ni madhota, va di engisanile ni dotshe dibanza, va to wona ti to ndinene kusawula vamwani vokari hagari kwawe, kasi ku va rumela Antiyokiya kumweko ni Paulo ni Bharnabhasi. Ku khedhilwe Judha awu a dhanwako ku i Bharsabha ni Silasi, i ku vathu va kuxonipheka hagari ka vanawe.

Mithumo 1:15

Ka ona ale masiku, Pedro a to khukha a txi ema hagari ka msengeletano wa vanawe, avava mtengo wawe wu nga ti lava kuhoka ka 120, a txi khene:

Mithumo 15:23

Se va to rumela ngu vona dipasi di va nga bhala ta ku kha vona: “Vapostoli ni madhota, i ku vananu, kwanu vanathu mi ku va lihunzu la vamatiko va va ku Antiyokiya, ni Siriya ni Kilikiya, ha mi losa!

Mithumo 15:32

Se Judha ni Silasi, ngako i ku vaprofeti ni vona, va to laya vanawe ngu mapswi o tala, ve va tsanisa.

Vagalatiya 6:12

Avale va lavako ku ti maha vavanene masoni ka vathu, evo ngu vona va mi kurumetako kuyiswa wukwerani. Va maha eto kufela ku va si xaniswi ngu mhaka ya txihambano txa Kristu;