Mithumo 13:46 - Bhiblia Yo Sawuleka

⁴⁶ Aniko Paulo ni Bharnabhasi, na va si thavi txilo, va to womba, va txi kha vona: “Ku ti fanete kuthanga ngu kwanu hi txi huwelela dipswi da Txizimu. Aniko ngako mi di rethelako kule ni nanu mipune, mi ti pfako mi si nga ni fanelo ya wutomi wo mbi guma, senikoko athu ha tshumelela ka vamatiko.

Mithumo 13:46 Referans Kwoze

Mithumo 28:28

“Ti ziveni koko ti to mhaka yiya ya kuhanyiswa ngu Txizimu yi rumetwe ka vamatiko, se vona va na yi engisa.”

Mithumo 26:20

Aniko kukhata ni txhumayete ka va Dhamasku, ni va Jerusalema, ni va dotshe ditiko da Judheya, kala ka vamatiko, ti to ve phinduka ve wuya ka Txizimu, va txi maha mithumo yi yi dinganako kuphinduka kwawe.

Matewu 21:43

Ngu toneto, na mi gela ku khani: Mfumo wa Txizimu wu na thaviswa kwanu, wu ningelwa ka dimwani ditiko, adi di no sikota kuhumisa mihando ya wona.

Mithumo 3:26

Txizimu txi khatile ngu nganu ku mi wuyisela Txithumi txa txona Jesu, txi m'rumela ku ta mi katekisa, kasiku mi hunduluka, mmwani ni mmwani kubihani kwakwe.”

Varoma 2:10

Kambe wudhumo ni txithavo ni kudikha si na va txitimwi ka wuhi ni wuhi a mahako wunene, ka Mujudha kukhata ni ka Mugriki nene;

Varoma 1:16

Ani kha ni nga ni tingana ngu Evhangeli, nguko i mtamo wa Txizimu, awu wu hanyisako wuhi ni wuhi a kholwako, kukhata Mujudha, ngu msana nene Mugriki.

Mithumo 22:21

Aniko ene a to ni gela ku khene: ‘Tsula, ni na kurumela ka vamatiko, aniya kule.’ ”

Mithumo 13:26

“Vanathu, vanana va liveleko la Abrahamu! Ni nanu vamwani mi thavako Txizimu! Dipswi diya da kuhanyisa di rumetwe kwathu.

Johani 1:11

Ene i ku Dipswi a tile ka va ka kwawe, kambe va ka kwawe kha va mu amukela.

Isaya 55:5

Wona taku, u na dhana ditiko dile u si di ziviko, se ditiko dile di si khaliko ku ku ziviko, di na tutumela kwako, ngu kuranda ka Mkoma, Txizimu txako, ni ka Msawuleki wa Israyeli; nguko ene a ku dhumisile.

Mithumo 7:51

“Anu va tithamo to banga, makhutu a timbilu ni a tinzeve, anu ma kanyisa yotshe mbimo Moya wo Sawuleka: Mi tekelela vatate vanu.

Luka 24:47

ni tiya kambe taku ku na txhumayelwa, ngu ditina dakwe, mhaka ya kutilaya ni kudivalelwa ka sionho ka otshe matiko, kukhukhela Jerusalema.

Vafilipiya 1:14

Wungi wa vanathu, va nga tsaniswa ka Mkoma ngu mhaka ya kusungwa kwangu, va engetetwe kutsana ngutu ve huwelela Dipswi, na va si thavi txilo.

Dhewuteronome 32:21

Va wusile txiviti txangu ngu mhaka ya kulondeta si i singako Txizimu, va ni henyisile, ngu mhaka ya sithombe sawe sa walo, aniko nani ni na wusa txiluse txawe; ngu kutisawulela vathu va i si nga va vanene, ni na wusa txiviti.

Mithumo 13:14

Vona va to tshawunyeta ve pinda Perga, ve tsimbila veya hoka Antiyokiya ka Pisidhiya. Ngu ditshiku da Sabbata va to wulela disinagogani ve khalahatsha.

Mithumo 13:5

Ngako va di hokile Salamina, va to ya txhumayela dipswi da Txizimu masinagogani ka Vajudha. Va ti ni Johani, m'vhuneteli wawe.

Mithumo 4:13

Sekoko ku ti ngako va txi wona kutsana ka Pedro ni Johani, kuve va ti va ziva ti to mbathu va va nga mbi gonda ni ti to vo va i di vathu dwe, va to tala ngu kuxamala; kambe va ti va ziva ti to mbalondeteli va Jesu.

Johani 4:22

Anu mi khozela txa ku ambi txi ziva, athu hi khozela txi hi txi zivako, nguko kuhanyiswa kuta ngu ka Vajudha.

Matewu 10:6

Kukhata tsulani ka tinvuta ti ti nga hangalaka ta Nyumba ya ka Israyeli.

Mavingu 28:1

Vaonhi va thava na va sa tutumiswa ngu m'thu; aniko ni wihi wo lulama, a thembekile kufana ni txingonyamwana.

Vahebheru 11:34

va timile midhikila ya mndilo, va hulukile kudawa ngu matxhari, amu ka dikhodho va mani mtamo, va hindukile ve maha tindena yimbini, va tovete mitxawa ya tiyimbi ta valala.

Ezekhiyele 2:5

Aniko vona, mwendo va na tiengisa, mwendo kha va na mbi tiengisa (nguko mba nyumba yo kaneta), va na tiziva taku hagari kwawe, ku ti ti ni mprofeti wokari.

Matewu 21:41

Vona va to angula va txi kha vona: “A na va fuvisa vathuvo vo biha, senikoko a na ningela thembwe ya mivhinya ka vamwani vadimi, ava va na ku mu wuyisela mihando yakwe ngu nyango yi yi lavekako.”

Matewu 25:46

Se avava va na tsula kutsayiswani ko mbi guma; ani valulami va na yiswa ka wutomi wo mbi guma.”

Mithumo 9:20

Se Sawule kunukunuko, a to khata kugondisa ta Jesu masinagogani, e huwelela ti to ngene Mwanana wa Txizimu.

Mithumo 19:9

Vamwani va to bangisa timbilu tawe, se ha wukhaloni ka kukholwa, va to sola Nzila ya Mkoma, kona hale masoni ka vathu. Paulo a to khukha masoni kwawe e tsula, e teka vagondiswa ngu phuho, a txi va gondisa dipswi, ditshiku ni ditshiku, txikolani ka Tirano.