Mithumo 12:7 - Bhiblia Yo Sawuleka

⁷ Kunukunuko Ngelozi ya Mkoma yi to woneka, se kukhanya ku txi woninga nyumbani. Se ngelozi yi to gwesa Pedro, ha didhawa, yi mu wusa yi txi kha yona: “Kuluveta u txi khukha!” Se titxhini ti nje kuwa ngu manzani kwakwe.

Mithumo 12:7 Referans Kwoze

Mithumo 5:19

Kambe Ngelozi ya Mkoma yi to tula matimba mkorani ni wusiku, yi va humisa hahanze, yi txi kha yona:

Mithumo 16:26

Kunukunuko ku to humelela kudekadeka ka hombe ka mafu, kuza kudekadekiswa ni marigwi a hahatshi ka mkora; matimba me tuleka, se titxhini ta votshe ti thuseka.

Masalmo 146:7

a lamulako ngu kululama ava va tsindavetwako; a ningako dipawu ka vale va ku ni nzala.

Masalmo 107:14

A va humisile txidemani ni mtsudini ka lifo, kambe a bhenute makhodha awe.

Masalmo 34:7

Ngelozi ya Mkoma ya vhikela avale va mthavako yi va hulusa ka tiphango.

Mithumo 10:30

Se Korneliyo a to xamula, a txi khene: “Kupindile masiku mararu kala konkuwa, ni ti maneka ni txi khongela nyumbani kwangu, ngu txikhati txa wutxhanu ni mune. Konako ni to wona m'thu a di emile masoni kwangu, na a di ambate tinguwo to phatima, a txi khene:

Vaefesu 5:14

ani sotshe si si humiswako ha kubasani, sa hinduka si maha liwoningo. Ngu toneto, ti wombwako va txi kha vona: “Wuka awe u otelako, wuka hagari ka vafi, se Kristu a na kuwoninga.”

Mithumo 2:24

Aniko Txizimu txi mwusile ngu ka vo fa, txi txi m'hulukisa ka sixaniso sa lifo, ngako ti nga ti si koteki ti to e zumba a di ñotwe ngu lifo.

Luka 24:4

Se, va di ngadi va txi xamala ngu tona, hingani wona: Vavamna va vambidi va to humelela kwawe, va di ni tinguwo to phatima.

Luka 2:9

Ngelozi ya Mkoma yi to woneka hafuhi kwawe, se kuphatima ka Mkoma ku txi va randela, se vona ve khata kutelwa ngu dizowa.

Mika 7:9

Ni na xaniswa ngu kuhenya ka Mkoma, nguko ni mu onhete, kala kuza e lamula mhaka yangu, e ni mahela madingano angu, ene a na ni wuyisa kuwonekelani, se ani ni na wona kululama kwakwe.

Dhaniyeli 6:22

Txizimu txangu txi rumete Ngelozi ya txona yi ta vhala sisofu sa tingonyamo, kasiku ti si ni mahi txilo, nguko ni manekile ni si na mnandu masoni ka Txizimu; hambi masoni kwako, awe mfumeli, kha ni khali kumaha wubihi ni wawumwewo.

1 Vafumeli 19:7

Se Ngelozi ya Mkoma yi m'gwesa ka wumbidi, na yi txi kha yona: Wuka u txi dya, nguko yi laphile nzila yako.

Mithumo 12:23

Kambe kunukunuko, Ngelozi ya Mkoma yi to peka Herodha, nguko kha dhumisa Txizimu. Se a to dyiwa ngu timbungu, efa.

Mithumo 9:3

Ngako a di ngadi hagari ka kutsimbila, hafuhi ni Dhamasku, kunukunuko kukhanya ka kuta ngu nzumani ku to mu woninga.

Habhakuki 3:4

Kuphatima ka txona kufana ni ka ditambo, miseve yo phatima yi na hume ngu manzani ka Txizimu, se eho ku ti ti ni wusisalelo wa mtamo wa txona.

Ezekhiyele 43:2

Kuphatima ka Txizimu txa ka Israyeli ku ti ti ta ngu nzila ya wutxani; se dipswi da txona di ti nga ova diguwa da mati amangi, se mafu ma to vangamela ngu mhaka ya kuphatima ka txona.

Isaya 60:1

Wuka, woninga, nguko liwoningo lako lata, ni wudhumo wa Mkoma wa humelela txitimwi kwako.

Masalmo 116:16

Mkoma, ani ni txithumi txako; ni txithumi txi i ku mwanana wa txithumi txako txa wamsikati! Ni ponise ka majoke a lifo.

1 Vafumeli 19:5

Se a to otela hahatshi ka mndonga; se ku to woneka ngelozi yi txi ta m'gwesa, yi to kha yona: Wuka u txi dya.

Mtuletelo 18:1

Msana ka tiya, ni to wona yimwani ngelozi yi txhika ngu nzumani; yi ti ni mtamo wa hombe, se mafu me woningwa ngu wudhumo wa yona.

Vahebheru 1:14

Ina tingelozi totshe hi nga mimoya yi yi thumako mithumo, ayi yi nga rumelwa kuthumela avale va fanelako kuamukela thomba ya kuhanyiswa, kani?

Mithumo 12:6

Ku ti ngako Herodha a txi pimisa ku mu humisa masoni ka vathu, ni wusiku wa kona Pedro a ti otete hagari ka masotxhwa mambidi, na a di sungilwe ngu titxhini timbidi, na kambe ha txikeni ka mkora ku ti ni vawoneleti.

Habhakuki 3:11

Ditambo ni mtxima si emile makhaloni ka sona; Si nyamalaliswa ngu kuwoninga ka miseve yakwe, ni kuphatima ka kukeluka ka ditxhari dakwe.

Isaya 37:30

Txikombiso txa kona ngu txiya: Dilembe diya ku na dyiwa sile si no mila sipune, se ka dilembe da wumbidi, asile si no huma; aniko ka dilembe da wuraru, phayani mi funyela, mi phaya mivhinya, mi dya mihando ya kona.

2 Samuwele 22:29

Nguko awe Mkoma u liwoningo langu; kambe Mkoma wa woninga txidema txangu.

Masalmo 68:6

Txizimu txa komba ka txikulungu wukhalo wa kuhanya ka wona txa txhatxhisa avale i ku vo sungwa; aniko vakanganyisi va na hanyela ditikoni ko oma.

Jeremiya 40:1

Dipswi di di nga ta ka Jeremiya ngu ka Mkoma msana ka kuva Nabhuzaradhani, mthangeli wa vawoneleli, a ti mu txhatxhisile Rama, eho a nga mmana kona a ti sungilwe ngu titxhini, na a ti hagari ka va va nga ñolwa votshe va niya Jerusalema ni Judha, ava va nga yiswa wukhumbini ka Bhabhilona.

Dhaniyeli 3:28

Se Nebhukodhonosori a to womba, a txi khene: Ku na bongwe Txizimu txa Xadreke, ni Mixake, ni Abhedhi-Nego, txile txi nga rumela Ngelozi ya txona ku ta hulukisa sithumi sa txona, sile si nga themba ka txona, nguko kha va lava kulondisa dipswi da mfumeli, ve tumela kuningela mmidi yawe, kasiku va si thumeli hambi kukhozela tximwani txizimu txokari, hahanze ka Txizimu txawe.

Matewu 2:13

Msana ka kuva ti di khukhile titxhari, Ngelozi ya Mkoma yi to woneka ngu miloro ka Josefa, yi txi mu gela tiya: “Khukha, teka mwanana ni mame wakwe, thava u txi ya Egipta. Inda ya zumba konakheyo kala nita kuzivisa, nguko Herodha a na lava mwanana wu kasiku e m'daya.”

Mithumo 12:8

Ngelozi yi to m'gela, yi txi kha yona: “Ti sunge libhande txiwununi, u txi ambala masandazi ako.” Se ene a to maha toneto. Ngelozi yi to engeta yi txi kha yona: “Fenengela nguwo yako, u txi ni londisa.”