Mithumo 11:21 - Bhiblia Yo Sawuleka

²¹ Se diwoko da Mkoma di ti navo; vathu votala va to hunduluka ve kholwa ka Mkoma.

Mithumo 11:21 Referans Kwoze

Mithumo 2:47

Va txi dhumisa Txizimu, na va txi thembeka ka votshe vathu. Se ditshiku ni ditshiku, Mkoma a ti ti engetela mtengo wa vale va nga txi wulela nzilani ka kuhanyiswa.

Luka 1:66

Votshe va va nga txi tiengisa, va ti ti veketa hakhana kwawe, va txi kha vona: “A nava i di wo txani ene mwanana wuwa kani?” Kunene mtamo wa Mkoma wu ti ni nene.

1 Vatesalonika 1:5

Nguko, Evhangeli yathu kha ya hoka kwanu ngu mapswi dwe, aniko yi fakazetwe ngu mtamo wa Moya wo Sawuleka, ni mahanyelo o kholwisa. Ma tiziva ti hi nga hanyisa tona ni nanu ngu mhaka ya lirando kwanu.

Mithumo 9:35

Se votshe va va nga aka ditikoni ka Lidha ni Saroni, ngako va txi mu wona, va to hunduluka ve kholwa ka Mkoma.

Isaya 59:1

Wonani taku dianza da Mkoma kha da khwanyela, a ti to di si sikoti kuhanyisa; hambi nzeve yakwe, kha ya tsiveka, ko naza yi tandeka kuengisa.

Mithumo 11:24

Bharnabhasi i ti wamwamna wamnene, awu a nga ti tate ngu Moya wo Sawuleka ni likholo. Ngu konaho, dibutho da hombe da vathu, di to namarela ka Mkoma.

Mithumo 6:7

Ti di ngeto, Dipswi da Txizimu di to khata kuanda, se mtengo wa vagondiswa wu to engeteleka ngu kutsakisa ditikoni ka Jerusalema; se dibutho do tala da vaphaxeli ve kholwa.

Mithumo 5:14

Avale va nga kukholwa ka Mkoma va ti engeteleka ngutu, dibutho da vavamna ni vavasikati.

Mithumo 4:4

Hambi keto, vathu votala va nga engisa dipswi, va to kholwa. Mtengo wa vavamna wu ti lava kuva wa 5.000.

Isaya 53:1

I mani a nga kholwa ka txhumayelo yathu kani? Niku diwoko da Mkoma di wonekisilwe ka mani kani?

Nehemiya 2:18

Sekoko ni to va gela nga ha dianza da Txizimu txangu di nga ni mahela wunene, ni mapswi ale mfumeli a nga ti ma wombile kwangu. Sekoko va to kha vona: Ahi khukheni hi aka! Se va to ti ningetetela kumaha mthumo wa wunene.

Nehemiya 2:8

ni papilo yo ya ka Asafe, muwoneleli wa thembwe ya mfumeli, kasi ku a na ni ninga tiphande to aka ngu tona sike sa mkhokhola, ni ta diguma da didhoropa, ni ta nyumba yi ani ni no zumba ka yona. Se mfumeli a to ni ninga, madingano ni wunene wa dianza da Txizimu, txitimwi kwangu.

Ezra 8:18

Ngu dianza da dinene da Txizimu, va to hi tisela wamwamna wo ziva ngu ka vanana va Mali, mwana Levhi, mwanana wa Israyeli, i ku Serebhiya, ni vanana vakwe, ni vanawe, votshe digumi ni mtxhanu ni vararu.

Ezra 7:9

nguko ka ditshiku do khata da mtxima wo khata, ngu dona i ku makhato a kukhukha kwakwe Bhabhilona; se ka ditshiku do khata da mtxima wa wutxhanu va to hoka Jerusalema, dianza da dinene da Txizimu di ti txitimwi kwakwe.

2 Makronika 30:12

Dianza da Txizimu di ti ti txitimwi ka vathu va ka Judha, di va ninga mbilu yimweyo yo maha kuruma ka mfumeli ni ka vathangeli madingano ni dipswi da Mkoma.

Mithumo 15:19

“Ngu konaho, ani ni lamula ti to kha ti nga ni fanelo kukarata mahedheni awa ma hundulukako me wuya ka Txizimu.