Mithumo 10:33 - Bhiblia Yo Sawuleka

³³ Ngu konaho ni nga kuluveta kuruma vathu va ta kudhana. Se u tshambisile u nga ta. Konkuwa hi maneka hawa hotshethu masoni kwako, kasi kuengisa totshe ti Txizimu txi nga kuleleta tona.”

Mithumo 10:33 Referans Kwoze

Jakobe 1:19

Ti ziveni tiya, vanathu vo randeka; m'thu wuhi ni wuhi a na kuluvete kuengisa, a txi swela kuwomba, a txi swela kuhenya.

Vagalatiya 4:14

Kambe anu kha ma komba ku ni nyenya mwendo ku ni vengela, hambiko malwati angu i nga ti txiduko kwanu; aniko mi ni amukete kota mtumi wa Txizimu, kota nga Jesu Kristu apune.

Jakobe 1:21

Ngu konaho, thavisani yotshe nzambwa ni wubihi wu wu pindako, mi txi amukela ngu kudikha dipswi di di nga phaywa timbiluni kwanu, adi di nga sikotako ku mi hulukisa.

1 Vakorinto 3:18

Mi nga ti kanganyiseni mipune. Ngako m'thu a txi pimisa ti to a txharihile ngu wutxhari wa ha mafuni, a na ti mahe txipumbu, kufela ku e mana wutxhari wa ditshuri.

Mithumo 28:28

“Ti ziveni koko ti to mhaka yiya ya kuhanyiswa ngu Txizimu yi rumetwe ka vamatiko, se vona va na yi engisa.”

Marku 10:15

Kha ditshuri na mi gela ku khani: Awule asi amukeliko Mfumo wa Txizimu nga mwanana, txima kha na mbi wulela ka wona.”

Matewu 18:4

Ngu konaho, awu a no ti veka hahatshi a txi fanana ni mwanana wuwa wam'dotho, ngene a no va i di wa hombe Mfumoni ka nzumani.

Mavingu 25:12

Awule a gondako ngu kuengisa sileleto, i txhuko kupinda singeda sa nzalama yo hehuka.

Mavingu 1:5

kasi ku txhari yi engisa, ni kukula mu ka wutxhari, ni ku awule a gondiswako e mana sileleto sa wutxhari;

2 Makronika 30:12

Dianza da Txizimu di ti ti txitimwi ka vathu va ka Judha, di va ninga mbilu yimweyo yo maha kuruma ka mfumeli ni ka vathangeli madingano ni dipswi da Mkoma.

1 Vatesalonika 2:13

Ngu toneto, nanathu ha bonga yotshe mbimo ka Txizimu, nguko msana ka kuva mi di amukete dipswi da Txizimu, adi hi nga txhumayela, mi di amukete kota nga dipswi da Txizimu mpela, i si nga ku di fananisa ni dipswi da kuhuma ka m'thu. Atiya ngu tona ti ti mi ningako mtamo anu mi kholwako.

Matewu 19:30

Vavangi vo thanga va na va i di vo gwitisa, ani vavangi vo gwitisa va na i di vo thanga.”

Mavingu 18:15

Mbilu ya txhari ya mana wuzivi, se nzeve ya titxhari ya mana wuzivi.

Mithumo 10:32

Rumela vathu Jopa, veya dhana Simoni, awu dimwani ditina i ku Pedro, a endete nyumbani ka Simoni, mtxhuki wa madhowo, hafuhi ni linene.’

Mithumo 10:34

Konaho Pedro a to khata kuwombawomba, a txi khene: “Kha ditshuri se na ti wona ti to Txizimu kha txi khedhi m'thu.

Dhewuteronome 30:13

Kambe kha wu nga mtxhatuko ka linene, aha koza u txi womba ku khawe: “I mani a no hi tshunda kutxhatuka, kasi ku wu wuyisa kwathu, ti to hi txi sikota ku wu engisa, hi wu xayisa, kani?”