Mitengo 15:25 - Bhiblia Yo Sawuleka

²⁵ Se mphaxeli a na maha mphaxo wa m'diho wa txionho, kasi kubasisa msengeletano wotshe wa vanana va ka Israyeli, kasi kudivalelwa, nguko kuonha ka kona kumahilwe ngu phazamo, se vona va henile mningelo wawe i ku mphaxo wu hiselwako Mkoma, ni mphaxo wawe masoni ka Mkoma, ngu mhaka ya sionho sawe, asi va nga si maha ngu phazamo yawe.

Mitengo 15:25 Referans Kwoze

Levhi 4:20

se ka didhuna diya, a na maha nga ti va nga mahisa txona ka didhuna da kudihela txionho. Mphaxeli a na maha mhamba yo divalela txionho, se va ka Israyeli va na divalelwa.

Vahebheru 2:17

Ngu toneto, ti ti fanete ku e fananiswa ka totshe ni vanawe, kasiku, masoni ka Txizimu e va mphaxeli wa hombe, wa kutala ngu wumbilu ni kuthembeka, ti to e sikota kudihela sionho sa vathu.

Varoma 3:25

awu txona txi nga m'sikela ti to a na va i di mhamba ya kudihela sionho ngu mnoha wakwe, ka wule a kholwako kwakwe; Txizimu txi mahile tiya kasiku kombisa kululama ka txona ngu kuva txi di divalete sionho si si nga mahwa kale,

1 Johani 2:2

Ene ngene i ku mhamba ya kudihela sionho sathu, kambe hi nga sionho sathu kugwita, aniko ni sa dotshe ditiko.

Mithumo 13:39

Se kululama ko hetiseka, akuwa mi nga mbi sikota kuningwa ngu Mlayo wa Mosi, wuhi ni wuhi a kholwako wa kumana ngu Jesu.

Luka 23:34

Se Jesu a ti ti khene: “Tata, va divalele, nguko kha va ti zivi ati va ti mahako.” Ngu msana, va to abanela syambalo sakwe, ngu kuxaxuva tixolo.

Levhi 4:26

Mafura otshe a txihari a na ma hisa ha txiluveloni, nga ti kumahwako ngu mafura a mphaxo wa ku ti ningela. Mphaxeli a na mahela mfumeliyo mhamba yo divalela txionho, se ngu konaho ene a na divalelwa.

Vahebheru 9:7

Aniko, ka ditenda da wumbidi ku ti wulela mphaxeli wa hombe ekha, kumweko ngu dilembe, aniko atiya, a ti si ti mahi a sa thanga ngu kumaha mningelo wa mnoha wa kuhiselwa sionho sakwe ni sa vathu.

Dhewuteronome 21:21

Sekoko vavamna votshe va didhoropa va na m'balisela ngu marigwi kala a txi fa. Ngu kumaha keto, u na heta wubihi hagari kwako, se votshe va ka Israyeli, ngako va txi tiengisa va na thava.

Ekleziyaste 5:6

U nga tumele taku txisofu txako txi onhisa mmidi wako, hambi kuwomba masoni ka ngelozi taku i phazamo; ngu kutxani Txizimu txi no henyela dipswi dako, txi khundumusela mithumo ya manza ako kani?

Levhi 4:31

Se a na thavisa otshe mafura, nga ti ti nga rumiswa tona madingano ni mhamba ya mpatano, se a na ma hisa ha txiluveloni, ma txi maha mhamba yo bhumula ka Mkoma. Mphaxeli a na maha mhamba yo divalela, se m'thu eneyo a na divalelwa txionho txakwe.

Levhi 4:35

Se mphaxeli a thavisa otshe mafura, nga ti a txavisisako tona mafura ka txinvutana txa mhamba ya kudikha, e ma hisa ha mndiloni, txitimwi ka txiluvelo, kasi kudhumisa Mkoma. Ngu toneto, mphaxeli a na maha mhamba yo divalela txionho, txi m'thu a nga maha, se a na divalelwa.

Levhi 15:15

Mphaxeli a na maha mningelo wa mhamba ngu txionho, ngu txinyana tximwetxo, e maha mningelo wo hiswa ngu tximwani txinyana, se mphaxeli a na maha mhamba yo kuwula txionho masoni ka Mkoma, ya mtungu wu a ngadi nawo.