Mitengo 14:34 - Bhiblia Yo Sawuleka

³⁴ Nga ha mi nga heta mune wa magumi a masiku ngu kuxola ditiko, konkuwa mi na heta kambe mune wa magumi a malembe; nguko dilembe dimwedo di dingana ditshiku, kasi mi tiziva tito, kuhambana kwangu ni nanu nga kutxani!

Mitengo 14:34 Referans Kwoze

Ezekhiyele 4:6

Se u di mahile tiya, u na otela kambe ngu didhawa dako da txinene, u rwala txionho txa ka Judha, amu ka mune wa magumi a masiku; ni ku ningile ditshiku dimwedo ka dilembe ni dilembe.

Mitengo 13:25

Va di fungate mune wa magumi a masiku, va to wuya ngu kuxolani ka ditiko.

Dhaniyeli 9:24

Mtxhanu wa magumi ni mambidi a mavhiki ma emisetwe txitimwi ka vathu vako ni txitimwi ka didhoropa dako do sawuleka, kasi kufuvisa wuhambunyeti ni kuheta sionho, ni kubasisa wubihi, ni kutisa kululama ko mbi na magwito, ni kutsanisa txiwoniso ni txiprofeto, ni kutota Msawuleki wa vasawuleki.

Vahebheru 4:1

Ngu toneto, ngako txithembiso txa kuwulela kuhumulani ka Txizimu txi di ngadi tsani, ahi ti woneleni ti to mmwani hagari kwanu asi maneki a di sate msana.

Masalmo 95:10

Mune wa magumi a malembe ni swirekile,” niza ni txi khani: “Vathu vava va timbilu tawe ta va timeta, kambe kha va si zivi sileleto sangu!”

2 Makronika 36:21

kasiku txi na tatiseka dipswi di Mkoma, a di womba ngu txisofu txa mprofeti Jeremiya, kala ku ditiko di txi titsakela ngu Masabbata a dona; di humula mbimo yotshe, kala mu ka mtxhanu wa magumi ni mambidi wa malembe.

1 Samuwele 2:30

Ngu kumaha keto, Mkoma Txizimu txa Israyeli, a khene: Ngu ditshuri ani ni wombile ti taku, nyumba yako ni nyumba ya tate wako, ti na tsimbila masoni kwangu kala kupinduka; aniko konkuwa, kuwomba Mkoma,: Timhaketo ti nave kule ni nani! Nguko ni na thava avale va ni thavako, kambe avale va ni eyisako va na wiswa tingana.

Mtuletelo 11:3

Aniko ni na ninga mtamo ka tifakazi tangu ta timbidi kasiku ti txi profeta, ti di ambate masaka, mndani ka 1.260 wa masiku.”

Zakariya 11:10

Se ni to teka ndonga yangu yi i ku Wunene, ni funya, kasi kutxhatxha txitumelelano txangu, atxi ni nga ti txi mahile ni votshe vathu vava.

Ezekhiyele 14:10

Se mprofeti ni m'thu wule, va na rwala mnandu wawe; mnandu wa wule a wotisako wu na va mnandu wa mprofeti;

Masalmo 105:42

Txizimu txi to alakanya mapswi a txona o sawuleka, awa txi nga xambanya ka Abrahamu msawulwa wa txona.

Masalmo 77:8

A nga va ene a di lekile ku hi randa kani? A nga va a di lekile txithembiso txakwe ka liveleko ni liveleko kani?

Masalmo 38:4

Sionho sangu si tshutshutile si ni khubhunyetile ni msungo; sa ni kama kufana ni mrwalo wo nemela ngutu.

1 Vafumeli 8:56

A na dhumiswe Mkoma, a nga ninga kuhumula vathu vakwe va ka Israyeli, madingano ni totshe ti a nga womba; hambi ni dipswi ni da dimwedo ka mapswi akwe otshe amanene kha da ngawa, ayale a nga ma womba ngu mthumo wa txithumi txakwe Mosi.

Mitengo 18:23

Ngu mhaka yeto, va na thuma mthumo wa ditenda da msengeletano, ve rwala vapune mnandu wawe. Atxiya txi na va txileleto txa kala kupinduka, ka tiveleko tanu, kha si na mbi va ni thomba hagari ka vanana va ka Israyeli.

Levhi 20:19

Kufana ni toneto, u nga sikote kumaha wugango ni ndiya ya tate wako, hambi ni mkoma mwendo mnanda wa mame wako, nguko ngu ziva wumbwiri wa maxaka ako o thisa, se ngu wumbidi wawe va na rwala mnandu wa wubihi wawe.

Mithumo 13:18

Se ngu mtamo wa diwoko da txona txi va humisile ka ditiko dileya, txi va mahela wumbilu txiwulani, mndani ka malembe o lava kudingana mune wa magumi.

Dhewuteronome 2:7

Nguko Mkoma, Txizimu txako, a kukatekisile ka yotshe mithumo ya manza ako; kambe ene a ku pangalatile mu kutsimbilani kwako, ngu mu ka txiwula txa hombe. Mndani ka mune wa magumi a malembe, Mkoma, Txizimu txako, a ti ti ni nawe, ni txa tximwetxo tximaha kha txa pwateka kwako.

Ezekhiyele 4:5

Nguko ni vekile malembe a kuonha kwawe, o dingana ni 390 wa masiku; se u na rwala txionho txa nyumba ya ka Israyeli.

Mitengo 32:13

Ngu toneto, ku to tura kuhenya ka Mkoma, e wukela va ka Israyeli, e va maha ve tsimbila ve txheka, liza li guma lotshe liveleko lile li nga ti mahile wubihi, masoni ka Mkoma.

Joxuwa 14:10

Kukhukhela konako, Mkoma a ni xayisile ni txi hanya nga ti a nga themibisa. Konkuwa ma pindile mune wa magumi ni mtxhanu wa malembe, Mkoma a di wombile timhaketo ka Mosi, txikhatini txi Israyeli a nga ti tsimbila txiwulani, se konkuwa ni na ni mtxhanu wa magumi ni mararu, ni mtxhanu wa malembe.

Ezekhiyele 23:35

Ngu toneto, Mkoma Txizimu a khene: Ngako u nga ni divala, u ni tshuralela, u na rwala wubihi wako ni wugelegele wako.

Hoseya 9:12

Hambi va txi ta wunja vanana vawe, ani ni na va tekela, ku si sali m'thu ni wammweyo; nguko dikhombo kwawe, ngako kambe vona va txi ni leka!