Mitengo 14:33 - Bhiblia Yo Sawuleka

³³ Se vanana vanu va na maha va nyampepe amu txiwulani, mune wa magumi a malembe, nava txi rwala mnandu wa kwa mbi thembeka kwanu, kala sirumbi sanu si guma txiwulani.

Mitengo 14:33 Referans Kwoze

Ezekhiyele 23:35

Ngu toneto, Mkoma Txizimu a khene: Ngako u nga ni divala, u ni tshuralela, u na rwala wubihi wako ni wugelegele wako.

Mitengo 32:13

Ngu toneto, ku to tura kuhenya ka Mkoma, e wukela va ka Israyeli, e va maha ve tsimbila ve txheka, liza li guma lotshe liveleko lile li nga ti mahile wubihi, masoni ka Mkoma.

Masalmo 107:40

Aniko Txizimu txi nyenya vaxanisi txi va pengapengisa txiwulani ko mbi na tinzila.

Dhewuteronome 2:14

Kukhukhela Kadhesi-Bharneya, kala hi txhatuka mlonga wa Zeredhi, dipfhumba dathu di tekile magumi mararu a malembe, ni mtxhanu wa malembe ni mararu, kala ku txi guma lotshe liveleko lile la masotxhwa, ale ma nga ti emisetwe yimbi, nga ti Mkoma a nga ti va xambanyete tona.

Hoseya 9:1

U nga tsake, awe Israyeli, u tshumela u ndaka-ndaka, kufana ni vathu; nguko u lekile Txizimu txako kufana ni digelegele; U randile kuholelwa ngu otshe mathala a fulaho.

Masalmo 107:4

Va to timela, ve pengapenga txiwulani, va si mani nzila ya ku va yisa ka didhoropa do zumba ka dona;

Joxuwa 14:10

Kukhukhela konako, Mkoma a ni xayisile ni txi hanya nga ti a nga themibisa. Konkuwa ma pindile mune wa magumi ni mtxhanu wa malembe, Mkoma a di wombile timhaketo ka Mosi, txikhatini txi Israyeli a nga ti tsimbila txiwulani, se konkuwa ni na ni mtxhanu wa magumi ni mararu, ni mtxhanu wa malembe.

Dhewuteronome 1:3

Se ku to maheka taku, ka dilembe da mune wa magumi, ka ditshiku do khata ka mtxima wa digumi ni wumwewo, Mosi a wombile ka vanana va ka Israyeli totshe ti Mkoma a nga mleleta, kasi ku e va gela,

Mitengo 33:38

Sekoko Aroni mphaxeli, a to kwela mmangoni ka Hori, madingano ni kuruma ka Mkoma; se a fete koneyo, ngu mtxima wa wutxhanu, na ku di pindile mune wa magumi a malembe, na vanana va ka Israyeli va di humile ngu ditikoni ka Egipta, ka ditshiku do khata da mtxima.

Mitengo 5:31

Kambe wamwamna a na va asi nga ni mnandu; aniko wamsikati a na rwala kubiha kwakwe.

Mithumo 7:36

Ngene a nga va humisa ngu kumaha sidiwukiso ni sikombiso ditikoni ka Egipta, ni Lineneni ko Bhilivila, ni txiwulani, mndani ka mune wa magumi a malembe.

Eksodha 20:5

U nga si khizamele, u txi si khozela; nguko ani Mkoma, Txizimu txako, ni Txizimu txa txiluse, ni tsayisako vanana ngu mhaka ya sionho sa vatate vawe, kala ka liveleko la wuraru ni la wumune, la vale va ni vengako.

Dhewuteronome 2:7

Nguko Mkoma, Txizimu txako, a kukatekisile ka yotshe mithumo ya manza ako; kambe ene a ku pangalatile mu kutsimbilani kwako, ngu mu ka txiwula txa hombe. Mndani ka mune wa magumi a malembe, Mkoma, Txizimu txako, a ti ti ni nawe, ni txa tximwetxo tximaha kha txa pwateka kwako.

Dhewuteronome 8:2

Alakanya yotshe nzila yi Mkoma, Txizimu txako, a nga maha ti to u txi tsimbila ngu yona, mune wa magumi a malembe, txiwulani, kasi ku kukhozisa ni ku kuduka, ti to e ziva ati ti ku mbiluni kwako, ti to mwendo u na vekisa sirumo sakwe, niku khu na mbi si vekisa.

Dhewuteronome 8:4

Syambalo sako kha sa sakala ha mmidi kwako, hambi mikondo yako kha ya simba hagari ka ona malembeyo a mune wa magumi.

Dhewuteronome 29:5

“Ani ni mi tsimbitisile ngu txiwulani, mndani ka mune wa magumi a malembe, syambalo sanu kha sa sakala mimidini kwanu, hambi tikathula tanu kha ta sakala mikondoni kwanu.

Joxuwa 5:6

Nguko vanana va ka Israyeli va tsimbite mune wa magumi a malenbe txiwulani, kala kuza va txi guma votshe vathu, i ku vavamna va yimbi, va nga huma ngu Egipta, va nga mbi engisa dipswi da Mkoma, kevo Mkoma a nga ti va xambanyete ti to kha na mbi va leka ve wona ditiko dile Mkoma a nga xambanya ka vatate vawe ku hi ninga, ditiko di di khulungako masi ni wulombe.

Masalmo 78:33

Ngu kumaha keto, Txizimu txi hetile masiku awe amu ka wukanganyisi, ni malembe awe amu ka xomulo.