Mitengo 11:20 - Bhiblia Yo Sawuleka

²⁰ Se nga ha mi nga kanyisa Mkoma, mi na dya nyama mtxima wotshe, kala nyama yiza yi pfhuruka ngu tithonvuni kwanu, miza mi xamuka ngu yona. Ni kambe mi dite, mi txi khanu, ngu kutxani hi nga huma ditikoni ka Egipta kani?

Mitengo 11:20 Referans Kwoze

Masalmo 106:15

Txizimu txi va ningile asi va nga kombela, aniko txi va pekile ngu mtungu mimindini kwawe.

Mitengo 21:5

Se vathu va to sola Txizimu ni Mosi, va txi kha vona: Ngu kutxani u nga hi humisa Egipta, kasi hi tafa txiwulani ko nga tiya kani? Nguko amuwa, kha ku na sakudya, hambi mati o sela, kambe athu hi karate, timbilu tathu ta swihala ngu sipawana sa kwa mbi vhuna txilo.

1 Samuwele 10:19

Aniko anu nyamsi mi lambile Txizimu txanu, txi txi nga mi hulukisa ka yotshe mithumo yanu yo biha, mi txi khanu ka txona: Veka mfumeli txitimwi kwathu. Konkuwa koko ti vekeni masoni ka Mkoma ngu tihunzu tanu ni ngu timwaya tanu.

1 Vatesalonika 4:8

Ngu toneto, awu a nyenyako gondo yiya, kha nyenyi m'thu, aniko a nyenya Txizimu, txona txi ka ditshuri, txi mi ningako Moya wa txona wo Sawuleka.

Mithumo 13:41

‘Wonani, anu vakanyisi, xamalani mi va mi lova! Nguko ka masiku anu, ni na maha mthumo, awu mi ndinova mi si wu tumeli, idiku mo ziviswa ngu m'thu.’ ”

Malakiya 1:6

Mwanana wa mfana a na thava tate wakwe, ni txithumi txi na thava nyamne wa txona; se, ngako ani ni di tate, txi hayi txithavo kwangu kani? Ngako ani ni di Mkoma, ku hani kuthavwa kwangu kani? Kuwomba Mkoma wa Mabutho a Tiyimbi kwanu, anu vaphaxeli, mi txhipisako ditina dangu, mi txi khanu: Hi di txhipisisa kutxani ditina dako kani?

Mavingu 27:7

M'thu wu a nga khura a kandetela ni dihesa da wulombe, aniko ka nyanzale, sotshe so bava sa lombela.

2 Samuwele 12:10

Konkuwa koko, kha di na mbi ngadi di huma kambe ditxhari nyumbani kwako, nguko u ni eyisile, u teka msikati wa Uriya, Muheti, kuva e maha msikati wako.

1 Samuwele 2:30

Ngu kumaha keto, Mkoma Txizimu txa Israyeli, a khene: Ngu ditshuri ani ni wombile ti taku, nyumba yako ni nyumba ya tate wako, ti na tsimbila masoni kwangu kala kupinduka; aniko konkuwa, kuwomba Mkoma,: Timhaketo ti nave kule ni nani! Nguko ni na thava avale va ni thavako, kambe avale va ni eyisako va na wiswa tingana.

Joxuwa 24:27

Joxuwa a wombile kambe ka vathu a txi khene: “Wonani dirigwi diya di na va fakazi yi yi no hi mangalela athu, nguko dona di engisile otshe mapswi awa Mkoma a nga hi gela; di na va fakazi kwathu, kasiku, anu mi; si kaneti Txizimu txanu.”

Eksodha 16:13

Ni minova ku to huma titshukwa ti ta fenengeta wugovelo wawe; ni mixo ku ti pometwe ngu hunguva ka makhalo otshe a wugovelo.

Eksodha 16:8

Mosi a to womba kambe a txi khene: “Minova yiya Mkoma a na mi ninga nyama midya, se ni mixo, a na mi ninga sakudya si mi no khura ngu sona, nguko a engisile kungungurukela kwanu ngu mhaka yakwe. Nguko athu, hi vamani kani? Kungungurukela kwanu hi ngako wukela athu, aniko ngo wukela Mkoma.”

Mitengo 11:19

kha mi na mbi dya ditshiku dimwedo dwe, mwendo masiku mambidi, hambi mtxhanu wa masiku, hambi digumi da masiku, hambi magumi mambidi a masiku.

Mitengo 11:21

Se Mosi a to khene: Vathu va ni ku hagari kwawe i 600.000 wa vavamna, na kuve awe u khawe: Ani ni na va ninga nyama va txi dya amu ka mtxima wotshe!

Eksodha 16:3

Vanana va ka Israyeli va va gete va txi kha vona: “I ti txhuko idiku Mkoma a ti hi date ngu dianza dakwe ditikoni ka Egipta, nguko hi ti khalahatshile hafuhi ka tikhadi ta nyama, mbimo yi hi nga ti ti dya sakudya hi khura! Aniko anu mi hi tisile txiwulani muwa, kasiku dibutho diya mi txi di daya ngu nzala.”

Mitengo 11:13

Ni na yi mana hani nyama yo ninga vathu kani? Nguko va ni dilela, va txi kha vona: “Hi ninge nyama hidya!”

Mitengo 14:3

Ni kambe ngu kutxani ene Mkoma a txi hi yisa ka ditikodo, hi na ya guma ngu kudawelwa ngu matxhari hi ya ningela vasikati vathu ni vanana vathu, ve mahwa tikhumbi kani? I si nga tshuko hi tshumela hi txi ya Egipta kani?”

Mitengo 14:4

Ka mhakeyo va to wombawombisana mmwani ni mmwani, va txi kha vona: “A hi sawuleni mthangeli wa yimbi, hi tshumela hi tsula Egipta.”

Mitengo 16:13

Nguko awe wo yi maha mhaka yayidotho, aku u nga hi humisa ka ditiko do khulunga masi ni wulombe, u hi daya mu txiwulani, u tshumela u ti kulisa txitimwi kwathu kani?

Mitengo 20:4

Se ngu kutxani mi nga neha msengeletano wa Mkoma amu txiwulani, kasi ku ta fela muwa, nguko athu ni sifuyo sathu kha hi nga ni mati kani?