Mika 3:6 - Bhiblia Yo Sawuleka

⁶ Ngu toneto, ku na maha wusiku kwanu, kuva ku si maneki wuprofeti, kambe ku nava ni txidema kuva ku si maneki wuhuti, evo vaprofeti di na va swela ditambo, se kwawe ditshiku di na maha da mtima.

Mika 3:6 Referans Kwoze

Isaya 29:10

Nguko Mkoma a mi thete moya wa wukohe wa hombe, kambe a tsivile maso anu, i ku vaprofeti, a fenengetile vathangeli vanu, i ku vahuti.

Isaya 59:10

Hi hulumetela maseta kufana ni mabhofu; ina, hi hulumetela kufana ni vale va singako ni maso, hi gutwa ni mitshikari kufana ni txidema, hagari ka makhalo a txidema, hi fana ni sirumbi.

Jeremiya 15:9

Awu a nga veleka mtxhanu wa vanana ni vambidi, a hohovate, a fite; ditambo dakwe di pswitikile na kuve i ngadi mitshikari; a rwate tingana ni kujujeka msungo. Ava va nga sala ni na va ningela ka ditxhari masoni ka valala vawe, kuwomba Mkoma!”

Jeremiya 13:16

Dhumisani Mkoma, Txizimu txanu, na ku si se maha txidema, mikondo yanu yi si se humbwa mimangoni ko phuma; mi txi ngadi mi verela liwoningo a na li phemberusa li maha mtsudi wa kufa, ni txidema txo phindeletisa kuphuma.

Masalmo 74:9

Se kha ku nga ho sidiwukiso hagari kwathu, kambe kha ku nga ho vaprofeti, ni wammweyo kha ti zivi ti to atiya ti na simama kala mbimo muni!

Ezekhiyele 7:26

Dikhombo di na londetwa ngu dikhombo, se huwa yi na dhana yimwani huwa; sekoko va na lava txiwoniso ngu ka mprofeti, kambe mlayo wa mphaxeli wu na lova, ni silayelo sa madhota.

Amosi 8:11

Wonani taku mata masiku, kuwomba Mkoma Txizimu, ni no rumela nzala ha mafuni, i si nga nzala ya sakudya mwendo ditora da mati, kambe do pfa dipswi da Mkoma.

Mika 2:6

Mi nga profeteni; ava va profetako, va nga profete ngu mahelo yiya, nguko ku nga humelela tingana.

Jeremiya 18:18

Sekoko va to kha vona: “Ngonani hi ta maha txikungo txo wukela Jeremiya; nguko vaphaxeli kha va na mbi tandeka ku hi ninga m'layo, hambi txhari ku hi ninga wusungukati, hambi vaprofeti ku hi ninga dipswi. Ngonani hi na ya muhika ngu tidimi tathu, hi si khataleli timhaka takwe.”

Ezekhiyele 13:9

Se dianza dangu di na lwisa vaprofeti vale va wonako ta manyala ni kuhuta makuhu; kha va na mbi maneka ka msengeletano wa vathu vangu, kambe kha va na mbi bhalwa ka nyumba ya ka Israyeli, hambi kuwulela ditikomi ka Israyeli; se mi na tiziva taku ani ngani Mkoma Txizimu.