Mika 2:2 - Bhiblia Yo Sawuleka

² Se va navela tithembwe ni tinyumba ve ti honyola; ngu kumaha keto va lwisa wamwamna ni mwaya wakwe, ni m'thu kumweko ni thomba yakwe.

Mika 2:2 Referans Kwoze

Isaya 5:8

Dikhombo ka vale va ku ni tinyumba ni tinyumba, va ku ni tithomba ni tithomba, kuza ku si maneki ni wukhalo, va txi zumbisa ku nga ova vona vokha ha mafuni!

Amosi 8:4

Engisani tiya, anu mi navelako kuxanisa vo pwata, mi hoxota sisiwana sa ha mafuni,

Jeremiya 22:17

Aniko maso ako ni mbilu yako si navela dibhindu dwe, ni kutheketa mnoha wa wu asi ngako ni mnandu, u maha ngu kutsindaveta ni timboyinga.

Ezekhiyele 18:12

a txi xanisa txisiwana ni wule wo pwata, a txi pa, kambe asi tshumeti sile so vekiswa, a gulako maso akwe me wonetela sithombe, e mahetela to nyenyeza,

1 Timoti 6:10

Nguko kuranda ngutu male, ngu wona mkoloti wa totshe tixaka ta wubihi; ngu mhaka ya kona kunavela kuwa ko mbi na mpimo, vamwani va hambani ni likholo, ve ti nemeta vapune ngu kuvilela ko tala.

Matewu 23:13

“Mi na ni dikhombo, anu vabhali ni nanu Vafarisi, vaxengeteli! Nguko ma tsivela vathu kuwulela Mfumoni ka nzumani, kha mi wuleli anu, kambe kha mi tuleli vale va lavako kuwulela.

Malakiya 3:5

Se ni nata hafuhi kwanu, ku ta mi lamula, kambe ni na va fakazi ya livilo yo lwa ni valoyi, ni kuwukela vale va mahako wugango, ni vale va xambanyako ta makuhu, ni vale va kanganyisako mthumi, ve honyola madingano a tinoni, ni vo felwa ngu vaveleki, ni vawuyi, kambe kha va ni thavi, kuwomba Mkoma wa Mabutho a Tiyimbi.

Mika 3:9

Engisani konkuwa tiya anu vathangeli va nyumba ya Jakobe, ni nanu vavathangeli va nyumba ya Israyeli; mi nyenyako wululamo, mi sanula totshe ti i ku madingano,

Ezekhiyele 22:12

Ku amuketwe siningo kasi kutheketa mnoha; so honyola ni so bhindulwa u tekile, u maha likungo ka mwakelani, u txi mkhozisa; kambe ani u ni divate, kuwomba Mkoma Txizimu.

2 Vafumeli 9:26

Ngu ditshuri, i tiku ni sa wona nyamnova ni mitshikari mnoha wa Nabhote ni mnoha wa vanana vakwe, kuwomba Mkoma, nga ni si ku dihi wukhalo wu wa wudotho wa thembwe, kuwomba Mkoma. Konkuwa mteke u txi mtshotsha ka wukhalo wu wa wudotho wa thembwe, madingano ni dipswi da Mkoma.

Eksodha 20:17

U nga navele nyumba ya mwakelani wako; u nga navele msikati wa mwakelani wako, ni txithumi txakwe txa wamwamna mwendo txa wamsikati, ni homu yakwe, ni mbongola yakwe, hambi ni tximwani tximaha txa mwakelani wako.”

Jobe 31:38

Ngako mafu ma txi ni dhana, ni kungako ni txi dila ni khongela.

1 Vafumeli 21:1

Se msana ka tiya, ku to maheka taku: Nabhote, Mujezireyeli, a ti ti ni Thembwe yi nga ti hafuhi ni nyumba ya wukoma ya Akabe, mfumeli wa Samariya,

Ezekhiyele 8:17

Sekoko a to ni gela ku khene: U ti woni, awe mwanana wa m'thu kani? Ku ni ti ti hehukelako nyumba ya ka Judha, kupinda manyala awa va ma mahetelako hawa kani? Va tatile ditiko ngu kulwisa, ve tshumela ve ni henyisa; se ndiva va tshuketisa ndonga tithonvuni kwawe.

Ezekhiyele 22:13

Wona taku, ni pekile manza ngu mhaka ya kufelela kwako aku u nga kumaha, ni mnoha wu wu nga theketwa kwako

Ezekhiyele 33:26

Anu mi ti thembisela ngu matxhari anu, mi mahetela ta manyala, se mmweyo ni mmweyo a navela msikati wa muakelani wakwe! Ina mi na lumbwa ngu ditiko diya kani?

Ezekhiyele 46:18

Kambe mthangeli kha na mbi teka txilo ka thomba ya vathu, kha na mbi va kanganyisa ka sile si va lumbako; ka thomba yakwe apune, a na siyela thomba vanana vakwe, kasi ku vathu vangu va si tekelwi, m'thu ni m'thu ni thomba yakwe.

Amosi 2:7

Va tsaka ngutu ngu kukandetela sisiwana hahatshi, va gombonyekisa tindzila ta va vo lulama; dijaha ni tate va wulelete dihorana dimwedo, kuve nyamisa ditina dangu.

Mika 6:12

Nguko vanyatithombe kona va tate ngu kulwisa, kambe vahanyi va kona va womba-womba makuhu; se lidimi lawe la kanganyisa mkanani kwawe.

Isaya 3:14

Mkoma a thethisa madhota a vathu vakwe kumweko ni vathangeli vawe; nganu mi nga onha thembwe yiya ya m'vhinya; asi mi nga honyola ka sisiwana si maneka tinyumbani kwanu.

Ezekhiyele 45:9

Mkoma Txizimu a khene: Ti dinganile, anu vathangeli va ka Israyeli; yisani kule timboyinga ni kulovisa, lamulani ngu wululamo, kambe thavisani mikhinyavezo yanu ka vathu vangu, kuwomba Mkoma Txizimu.

Amosi 4:1

Engisani mapswi awa anu vavasikati va Bhasani, mi ku mi mangoni ka Samariya, anu mi xanisaka sisiwana, mi khinyavezako vo pwata, migelako vanyamne vanu mi txi khanu: Wuyisani kheno hi sela.